ABANTU BALAFWAYA UKUTEMWIKWA. Pa kuti abaupana, aba mu lupwa, e lyo ne fibusa baleumfwana, balingile ukutemwana. Ukutemwa e kulenga abantu baleba ne nsansa e lyo no kuba no bumi ubusuma. Nomba “kutemwa” kwa musango nshi tulelandapo?

Tatulelanda pa citemwiko iciba pa mwaume no mwanakashi, nangu ca kuti ici icitemwiko na co calicindama. Nomba ukutemwa tulelandapo ni kulya ukulenga umuntu ukulabika amano ku bantu bambi. Na kabili uku ukutemwa kutungululwa na mashiwi ya kwa Lesa ayaba mu Cebo cakwe. Na lyo line, uku ukutemwa takupelela fye mu kumfwa ukuti twalitemwa bambi, lelo kulalenga tulebacitila ifisuma.

Amashiwi ayasuma ayatwafwa ukwishiba ifyo ukutemwa kwaba yatila: “Mu kutemwa mwaba ukushishimisha ne cikuuku. Mu kutemwa tamwaba ubufuba, tamwaba ukuitakisha, nangu ukuituumika. Mu kutemwa tamwaba ukucita ifishayana, tamwaba ukucita ifya kuisekesha, tamwaba ukukalifiwa. Tamwaba ukusunga ifilubo. Tamwaba ukusekelela pa fishilungeme, lelo mwaba ukusekelela pa cine. Ukutemwa kulasuulako ku fya bubifi fyonse, . . . kusuubila fyonse, kushipikisha fyonse. Ukutemwa takupwa.”—1 Abena Korinti 13:4-8.

Uku ukutemwa “takupwa,” lelo kuya kulekulilako fye. Na kabili apo uwaba no kutemwa alashishimisha, wa cikuuku kabili aleelela, kuti twatila ukutemwa “cikakilo cafikapo ica kwikatana.” (Abena Kolose 3:14) Kanshi abantu nga bali no kutemwa kwa musango uyu, balaba sana ne nsansa kabili balomfwana bwino na bantu nangu ca kuti tabapwililika. Ku ca kumwenako, lekeni tulande pa fyo ciba mu cupo.

Yesu Kristu alilandile pa fintu ifyacindama ifingalenga icupo ukuwama. Ku ca kumwenako, atile: ‘“Umwaume akasha wishi na nyina no kulambatila ku mukashi wakwe kabili aba babili bakaba umubili umo” . . . Kanshi, ico Lesa alundenye, umuntu ecilekanya.’ (Mateo 19:5, 6) Kwaliba ifintu fibili ifyo tusambililako kuli aya amashiwi.

“ABA BABILI BAKABA UMUBILI UMO.” Abantu balatemwana sana na bena mwabo ukucila ifyo batemwana na bantu bambi, kabili ukutemwana kuti kwabacingilila ku kucita ubucende, pantu umuntu nga acita ubucende ninshi aba “umubili umo” no muntu ushili mwina mwakwe. (1 Abena Korinti 6:16; AbaHebere 13:4) Ubulalelale bulalenga abaupana ukunacetekelana kabili bulalenga ifyupo ukupwa. Nga ca kuti abaupana balikwata abana e lyo umo acita ubucende, abana balomfwa sana ububi, balomfwa kwati tabatemwikwa nelyo tabakwata aba kubacingilila kabili balaba ne cikonko.

“ICO LESA ALUNDENYE.” Lesa alicindika sana icupo. Abaupana abaishiba ici icishinka balabombesha ukukosha icupo cabo. Tabafwaya ukupwishiba ifyupo fyabo nga bakwata amafya. Balatemwana sana kabili balashipikisha ilyo baba na mafya. Ukutemwa bakwata “kushipikisha fyonse,” kabili ici cilalenga baleesha na maka ukupwisha amafya pa kuti baletwalilila ukumfwana.

Nga ca kuti abafyashi balitemwana, abana balaba sana ne nsansa. Jessica atile: “Batata na bamayo balitemwana kabili balicindikana sana. Nga namona bamayo bali no mucinshi kuli batata, maka maka nga fwe bana e po tuli, ndafwaya sana ukulabapashanya.”

Lesa alikwata sana ukutemwa. Na kuba Baibolo itila: “Lesa kutemwa.” (1 Yohane 4:8) Kanshi tatufwile ukupapa pali filya Baibolo ilanda pali Yehova ukuti ni “Lesa wa nsansa.” (1 Timote 1:11) Na ifwe bene tukaba sana ne nsansa nga tulepashanya imibele ya kwa Kabumba wesu, maka maka ukutemwa. Baibolo pa Abena Efese 5:1, 2 itila: “Mulepashanya Lesa, apo muli bana bakwe abo atemwa, kabili muletemwana.”