ABENA Kristu abaliko mu nshita ya batumwa baleipeeleshe pa kubila ‘imbila nsuma iya bufumu’ ku bantu abengi. (Mat. 24:14) Bamo baleya na ku fyalo fimbi. Ku ca kumwenako, ilyo umutumwa Paulo ali pa nyendo shakwe isha bumishonari alibilile imbila nsuma na mu citungu umwabela icalo ca Turkey pali ino nshita. * Pa numa ya myaka nalimo 2,000, mu mwaka wa 2014 aba bwananyina mu calo ca Turkey balikwete kampeni iyaibela. Mulandu nshi kwabelele iyi kampeni? Kabili ni bani babombeleko iyi kampeni?

Mu calo ca Turkey mwaba bakasabankanya ukucila pali 2,800 lelo muli ici calo mwaba abantu amamilioni 79. Kanshi kasabankanya umo mu Turkey alingile ukubila imbila nsuma ku bantu 28,000. Nga fintu mwamona bakasabankanya bashimikila fye abantu abanono imbila nsuma. Ico kwabelele kampeni yaibela kubila ku bantu abengi mu nshita iinono. Ilyo kwali iyi kampeni, aba bwananyina nalimo 550 abena Turkey abekala mu fyalo ifyalekanalekana balile ku Turkey ku kuya bombela pamo na ba bwananyina aba muli ici calo. Finshi fyafuminemo?

Balibilile ku bantu abengi. Aba mu cilonganino cimo mu musumba wa Istanbul balembele abati: “Ilyo abantu batumwene baleipusha abati: ‘Bushe kuli ukulongana ukukalamba ukwaibela? Inte sha kwa Yehova bali fye mpanga yonse!’” Aba mu cilonganino cimbi ica mu musumba wa Izmir nabo balembele abati: “Umwaume umo uubomba pa citesheni ca myotoka ishinono aipwishe eluda umo ati, ‘Finshi filecitika? Bushe nomba namutendeka ukubila sana?’” Ukwabula no kutwishika abantu balimwene ifyalecitika ilyo kwali iyi kampeni.

Bakasabankanya abafumine ku fyalo fimbi balitemenwe sana ukubila imbila nsuma. Ba Steffen, abafumine ku Denmark batile: “Cila bushiku nalebila ku bantu abashabalile abomfwapo pali Yehova. Nalitemenwe ukuti nalelenga abantu baishiba ishina lya kwa Yehova.” Ba Jean-David abafumine ku France balembele abati: “Twalibilile mu musebo umo pa maawala ayengi. Ala caliweme! Abantu abengi tabaishibe Inte sha kwa Yehova. Pa mayanda ayengi apo twaleya twalelanshanya na bantu,  twalebatambisha amavidio, kabili twalebapeela ne mpapulo.”

Bakasabankanya 550 balipeele abantu impapulo 60,000 mu milungu fye ibili! Cine cine kampeni yalilengele babila imbila nsuma ku bantu abengi.

Bakasabankanya balitendeke ukubombesha. Kampeni yaibela yalilengele bakasabankanya mu Turkey batendeka ukubombesha. Abengi batampile ukutontonkanya pa kubomba umulimo wa nshita yonse. Na kuba, mu mwaka umo bakasabankanya 82 balitendeke bupainiya bwa nshita yonse.

Bakasabankanya abafumine ku fyalo fimbi balilandile ifyo ilya kampeni yabafwile mu mulimo wabo uwa kubila imbila nsuma ilyo babwelele ku mwabo. Ba Şirin, bankashi abafumine ku Germany, balembele abati: “Aba bwananyina mu Turkey balabila bwino sana ubunte bwa mu lyashi. Ndomfwa insoni ukushimikila abantu imbila nsuma mu bunte bwa mu lyashi. Lelo ilya kampeni yalingafwile sana, ifyo aba bwananyina abena Turkey balebila, no kupepa lyonse fyalingafwile ukutendeka ukubila ubunte bwa mu lyashi. Naleshimikila na bantu imbila nsuma kabili nalebapeela na matrakiti pa citesheni ce shitima! Pali ino nshita insoni shalicepako.”

Ba Johannes abafumine ku Germany, batile: “Nalisambilileko ifya kubomba umulimo wa kubila imbila nsuma. Aba bwananyina balafwaisha ukusambilisha abantu abengi icine. Balashimikila abantu imbila nsuma konse uko babasanga. Ifi fine e fyo natendeke ukucita ilyo nabwelela ku Germany. Pali ino nshita ndabila imbila nsuma ku bantu abengi ukucila abo nalebilako ilyo nshilabombako muli iyi kampeni.”

Ba Zeynep abafumine ku France batile: “Ala iyi kampeni yalingafwile sana. Yalilenga nashipa pa kubila imbila nsuma kabili nalicetekela sana Yehova.”

Iyi kampeni yalengele bakasabankanya baba ifibusa sana. Aba bwananyina mu Turkey na bafumine ku fyalo ifyalekanalekana tabalabile ifyo batemwanene ne fyo balebombela pamo. Ba Jean-David abo tulandilepo kale batile: “Twaliimwenene ifyo aba bwananyina bapokelela abeni. Balitupokelele kwati fye tuli fibusa fyabo, kabili kwati tuli lupwa lwabo. Balitupokelele mu mayanda yabo. Nalishibe ukuti  tuli ba bwananyina aba mwi sonde lyonse; kabili ifi e fyo nalebelenga na mu mpapulo. Lelo ilyo twali ku Turkey e lyo naimwenene na menso yandi. Na kuba, naleumfwa icilumba ukuba umuntu wa kwa Yehova kabili ndamutasha sana pali ili ishuko ampeela.”

Ba Claire abafumine ku France batile: “Abafumine ku Denmark, ku France, ku Germany, na bena Turkey bonse twali fye ulupwa lumo. Cali kwati Lesa alifuutile imipaka ya fyalo ku ca kufuutilako icikalamba.”

Ba Stéphanie abafumine ku France batile: “Ilya kampeni yalilengele twasambilila ukuti icilenga twikatane te ntambi nelyo ululimi tulanda lelo ni co bonse twalitemwa Yehova.”

Bakasabankanya abengi abafumine ku fyalo fimbi baletontonkanya pa kubwelela ku Turkey ku kwafwilisha aba bwananyina ukubomba umulimo wa kubila imbila nsuma. Abanono balibwelelamo kale. Ala aba bakasabankanya tulabatasha nga nshi.

Natulande pe bumba lya bakasabankanya abali 25 ababela ukutali ukushaba icilonganino. Pa myaka iingi ili bumba lyakwete fye eluda umo. Elenganyeni ifyo bakasabankanya muli ili bumba batemenwe ilyo baeluda 6 abafumine ku Germany na ku Netherlands baile kuli ili bumba mu 2015!

Finshi ifyo bakasabankanya abakukiila ku Turkey balanda pa fyo bekala muli ici calo? Kwena abaya uko bakasabankanya bacepa balakwata amafya, lelo balapaalwa sana. Natulande pa fyo bamo bailandile:

Ba Federico abafumine ku Spain, abaupa abali ne myaka ukucilako panono pali 40 batile: “Apo nakwata fye ifintu ifinono, ndabika amano ku fintu ifyacindama.” Bushe kuti bakoseleshako na bambi ukubomba uyu mulimo? Ee! Batile: “Nga ca kuti wakukiila ku calo cimbi ku kwafwa abantu ukwishiba Yehova ninshi waeba Yehova ukuti alekusakamana. Kuti waumfwa ukuti cine cine Yehova alasakamana.”

Ba Rudy abafumine ku Netherlands, abaupa abali ne myaka mupepi na 60 batile: “Ukubombela uko  aba kubila imbila nsuma bacepa no kwafwa abantu ukwishiba icine ico bashabala abomfwapo kulalenga twaba ne nsansa nga nshi. Nga twamona ifyo abantu baba ne nsansa nga basambilila icine tulasekelela nga nshi.”

Ba Sascha abafuma ku Germany, abaupa abali ne myaka ukucilako panono pali 40 batile: “Lyonse ilyo ndebila imbila nsuma ndasanga abantu abashatala umfwapo icine. Ndomfwa bwino sana ukwafwa abantu ba musango uyu ukwishiba Yehova.”

Ba Atsuko bankashi abaupwa abafuma ku Japan abali ne myaka nalimo 35 batile: “Kale nalefwaya ukuti Armagedone ise bwangu. Nomba ilyo nakukiile ku Turkey ndatasha pa fyo Yehova atekanya. Nga namona ifyo Yehova atungulula umulimo wa kubila imbila nsuma mwi sonde lyonse, ndamutemenwako.”

Ba Alisa bankashi abafuma ku Russia abashilafisha imyaka 35 batile: “Ukubombela Yehova uko aba kubila imbila nsuma bacepa kwalilenga namona ubusuma bwakwe. (Amalu. 34:8) Yehova Mufyashi wandi kabili ni cibusa wandi sana kabili alangafwa ilyo ndebombela kuno. Naliba ne nsansa, mu mulimo momba mulafuma ifisuma kabili Lesa alimpaala!”

Pa mulandu wa kampeni iyali mu Turkey, abantu abengi balyumfwile imbila nsuma. Na lyo line kucili ififulo umo bashilabila imbila nsuma. Cila bushiku bakasabankanya abakuukila ku Turkey balasanga abantu abashabala umfwapo pali Yehova. Bushe kuti mwatemwa ukubombela mu cifulo ca musango uyu? Nga kuti mwatemwa, tulemukoselesha ukuti, “Inuneni amenso no kumona amabala, ukuti nayabuuta, ni nshita ya kuseepa.” (Yoh. 4:35) Bushe kuti mwatemwa ukubombela mu calo umo “inshita ya kuseepa” ifikile? Nga kuti mwatemwa, tendekeni ukucita ifingalenga mukayebombako. Ukwabula no kutwishika nga mulebombesha mu mulimo wa kubila imbila nsuma ukufika “na ku mpela ya pano isonde,” mukapaalwa ukucila na pa fyo mwingenekela!—Imil. 1:8.