Bushe Amashiwi Yaba mu Malembo ya Mushilo Baliyalula?
Abantu bamo balatwishika nga ca kuti ifyebo ifyaba mu Amalembo ya Mushilo pali ino inshita e fyalimo ilyo bayalembele fye. Na lyo line, kasesema Esaya alandile ukuti icebo ca kwa Lesa “cikabako umuyayaya.” (Esaya 40:8) Bushe kuti twashininkisha shani ukuti Amalembo ya Mushilo tabayalula?
Lesa alikwata amaka ya kucingilila Icebo cakwe pa kuti abantu bealula amashiwi yabamo. Kale ilyo balekopolola Amalembo ya Mushilo ukubomfya iminwe, bakalemba balebikako sana amano ica kuti balependa icilembo cimo cimo pa kuti bealula, befumyamo, nelyo ukulundamo amashiwi. Nomba abantu fye bonse balalufyanya, kanshi naba bene bakalemba balipangileko utulubo utunono.
KUTI TWASHININKISHA SHANI UKUTI IFYALI MU MALEMBO YA MUSHILO AYA KUBALILAPO E FYABA NA MU YO TUBOMFYA PALI INO INSHITA?
Kwaliba ama manyuskripti ayengi aya kale sana aya Malembo ya Mushilo. Kanshi nga muli manyuskripti imo mwaliba icilubo, kuti babomfya ama manyuskripti yambi pa kuti bamone ifilingile ukubapo. Nga mulefwaya ukwishibilapo na fimbi belengeni icipande citila: “Has the Bible Been Changed or Tampered With?” icaba pa jw.org.
Ku ca kumwenako, natulande pa ma manyuskripti ya kale sana ayo beta ukuti Ifimfungwa fya muli Bemba Wafwa. Ababedouin e basangile aya ma manyuskripti mu ncengo ishaba mupepi na Bemba Wafwa mu 1947. Muli aya ma manyuskripti mwaba Amalembo ya Mushilo ayo balembele imyaka ukucila pali 2,000 iyapita. Abasambilila sana balilingenye aya ma manyuskripti ku Malembo ya Mushilo ayo tubomfya pali ino nshita. Bushe finshi basangile?
Aba abasambilila sana basangile ukuti ifyaba mu Malembo ya Mushilo ayo tubomfya pali ino inshita, tafyapusana ne fyali mu Malembo ya kubalilapo. * Ifyo basangile mu ma manyuskripti ya kale sana fyalilenga twashininkisha ukuti amashiwi yaba mu Malembo ya Mushilo ayo tubomfya pali ino nshita, e yali mu Malembo ya kubalilapo. Tatutwishika ukuti Lesa alilenga Amalembo ya Mushilo ukutwalilila ukuba filya fine fye yali ilyo bayalembele.
Kanshi ilyo tulebelenga Amalembo ya Mushilo, kuti twacetekela ukuti ifyo tulebelenga e fyali mu Malembo ya kubalilapo.
^ para. 7 Aya amashiwi yaba mu citabo citila The Complete Dead Sea Scrolls in English, pe buula 16. Abalembele ici citabo ni ba Geza Vermes.
Nalimo Kuti Mwatemwako ne fi
ULUPUNGU LWA KWA KALINDA
Baibolo Yalitwalilila Ukubako Nangu ca Kuti Abantu Balefwaya Ukwalula Ubukombe Bwabamo
Abantu bamo balafwaya ukwalula ubukombe bwa mu Baibolo. Balifililwe ukucita ifyo balefwaya?
AMASAMBILISHO YA MU BAIBO AYACINDAMA
Bushe Baibolo Cebo ca kwa Lesa?
Nga ca kuti Lesa e walengele Baibolo ilembwe, ninshi ifwile ukucila ifitabo fimbi ifyabako.
AMALYASHI BASHIMIKE
Balicindike Baibolo—Vidio Iyo Baipifya (William Tyndale)
Ifyo William Tyndale atemenwe Baibolo fyalimoneke mu mulimo alebomba kabili tulanonkelamo mu fyo abombeshe.
