Lesa alilaile kasesema Abrahamu ukuti mu muntu uukafuma mu bana bakwe e mo “inko shonse isha pe sonde shikaimwena amapaalo.” (Ukutendeka 22:18) Bushe uyu muntu ni nani?

Napapita imyaka mupepi na 2,000, ukutula apo Lesa apeelele Yesu uwafumine muli Abrahamu amaka ya kucita ifipesha amano. Ifi ifipesha amano Yesu alecita fyalelanga ukuti muli ena e mo inko shali no kupaalilwa.—Abena Galatia 3:14.

Ifipesha amano ifyo Yesu alecita fyalelanga ukuti e o Lesa ali no kubomfya ukupaala abantu, kabili fyalangile ifyo Lesa ali no kumubomfya ukupaala abantunse umuyayaya. Natulande pa fyo ifipesha amano Yesu alecita fyalelanga ukuti alikwata imibele iisuma.

Icikuuku—Yesu aleundapa abalwele.

Bushiku bumo, uwa fibashi apapete Yesu ukuti amundape. Yesu alimukumishe no kumweba ati: “Ee ndefwaya” kabili ilyo line fye ifibashi fyalipwile.—Marko 1:40-42.

Bukapekape—Yesu alepeela abali ne nsala ifya kulya.

Yesu talefwaya abantu ukwikala ne nsala. Ukucila pa muku umo, alifushishe imikate inono no tusabi no kupeela amabumba ayakalamba ukuti yalye. (Mateo 14:17-21; 15:32-38) Pa numa ya kulya, bonse baliikwite kabili ifya kulya ifingi fyalishele.

Uluse—Yesu alebuusha abafwa.

Inshita imo Yesu ‘aumfwilile uluse’ mukamfwilwa uwaleloosha umwana umo uo akwete fye kabili alibuushishe uyu mwana—Luka 7:12-15.