ICIPANDE ICIKALAMBA: IFYO TWINGASAMBILILA KULI MOSE

Bushe Mose Ali Nani?

Finshi mutontonkanya nga mwaumfwa ishina lya kwa Mose? Bushe mutontonkanya . . .

◼ pa kanya ako banyina bafishile mu museke mu Mumana wa Naelo?

◼ pali kalume uo bakushishe mu lupwa ulukankaala mu Egupti ku mwana mwanakashi wa kwa Farao lelo uushalabile ukuti ali mwina Israele?

◼ pa mwaume uwali kacema ku Midiani pa myaka 40?

◼ pa mwaume uwalandile na Yehova * ilyo icimpusa calepya?

◼ pa mwaume uwaebele imfumu ya bena Egupti mu kushipa ukuti abena Israele balubulwe mu busha?

◼ pa mwaume uwaebele imfumu ya bena Egupti pa lwa Finkunka Ikumi ifyali no kuponena abena Egupti ilyo imfumu yasaalwile Lesa?

◼ pa mwaume uwatungulwile abena Israele abali abengi nga nshi ukufuma mu Egupti?

◼ pa mwaume uo Lesa abomfeshe ukupaatula amenshi pali Bemba Wakashika?

◼ pa mwaume uwapeele abena Israele Amafunde Ikumi, ayafumine kuli Lesa?

MOSE alicitile fyonse ifi twalandapo e lyo ne fintu fimbi. Kanshi e mulandu wine Abena Kristu, abaYuda e lyo na baShilamu bacindikila sana uyu mwaume uwakwete citetekelo!

Ukwabula no kutwishika, Mose ali ni kasesema uwacitile “ifya kutiinya fyonse ifikalamba.” (Amalango 34:10-12) Mose alilekele Lesa ukumubomfya mu fintu ifingi sana nangu ca kuti ali fye umuntunse. Nga filya fine kasesema Eliya ali umuntunse fye, Mose na o ali fye “umuntu nga ifwe bene.” (Yakobo 5:17) Mose alekwata amafya nga aya yene tukwatako, lelo alishibe ifya kuyapwisha.

Bushe kuti mwatemwa ukwishiba ifyo Mose alepwisha amafya? Natulande pa mibele itatu iisuma iyo akwete e lyo ne fyo twingasambililako.

[Futunoti]