“Ni Lesa wa ba Mweo”
PALAMENI KULI LESA
“Ni Lesa wa ba Mweo”
Bushe imfwa yalicila Lesa amaka? Awe iyo! Bushe imfwa nelyo “umulwani” kuti fyakwata amaka ukucila “Lesa Wa Maka Yonse”? (1 Abena Korinti 15:26; Ukufuma 6:3) Lesa alikwata amaka ya kufumyapo imfwa. Akacita ifyo ilyo akabuusha abafwa mu calo cipya nga fintu alaya. * Bushe ifi alaya, fikacitika? Amashiwi ya Mwana wa kwa Lesa, Yesu e yatulenga ukucetekela ukuti ubu bulayo, bwa cine.—Belengeni Mateo 22:31, 32.
Ilyo Yesu alelanda na baSaduke abashasumiine mu kubuuka kwa bafwa, atile: “Kabili pa mulandu wa kubuuka ku bafwa, bushe tamwabelenga ifyo Lesa alandile kuli imwe ati, ‘Nine Lesa wa kwa Abrahamu kabili Lesa wa kwa Isaki kabili Lesa wa kwa Yakobo’? Te Lesa wa bafwa iyo, lelo ni Lesa wa ba mweo.” Ilyo Yesu alelanda aya mashiwi, alelosha ku fyo Lesa alanshenye na Mose pa cimpusa icalepya. Umu mwali nalimo mu 1514 B.C.E. (Ukufuma 3:1-6) Ukulingana ne fyo Yesu alandile, amashiwi Yehova aebele Mose aya kuti, “Nine Lesa wa kwa Abrahamu kabili Lesa wa kwa Isaki kabili Lesa wa kwa Yakobo,” yalanga fye ukuti cine cine ukubuuka kukabako. Cinshi twasosela ifi?
Baleni moneni umwalolele aya mashiwi. Ilyo Yehova alelanda na Mose, ninshi palipita imyaka 329 ukutula apo Abrahamu afwilile. E lyo ninshi palipita ne myaka 224 ukufuma apo Isaki afwilile kabili palipitile ne myaka 197 ukutula apo Yakobo afwilile. Nangu cibe ifyo, Yehova atile, “nine” taatile “nali” Lesa wabo. Yehova alelanda kwati balya ababomfi bakwe aba cishinka batatu bali aba mweo pali ilya nshita. Mulandu nshi?
Yesu alondolwele ukuti: “[Yehova] te Lesa wa bafwa iyo, lelo ni Lesa wa ba mweo.” Aya mashiwi yalalenga twaishiba icintu icacindama sana pa lwa kubuuka. Nga ca kuti takwaba ukubuuka kwa bafwa, ninshi Abrahamu, Isaki na Yakobo, tabakabuuke. Nga tabakabuuke, ninshi Yehova ni Lesa wa bafwa. Ne ci kuti capilibula ukuti imfwa yalikwata sana amaka ukucila Yehova nelyo ukuti Lesa alifilwa ukulubula ababomfi bakwe ku mfwa.
Kanshi finshi twingalanda pali Abrahamu, Isaki na Yakobo e lyo na babomfi ba kwa Yehova bambi abafwa? Yesu alandile amashiwi ya kukoselesha aya kuti: “Kuli ena bonse ba mweo.” (Luka 20:38) Ee, ubufwayo bwa kwa Yehova ubwa kubuusha ababomfi bakwe bukacitika pantu abamona fye kwati bacili no mweo. (Abena Roma 4:16, 17) Yehova takalabe ababomfi bakwe bonse abafwa ukufikila fye akababuushe.
Bushe mulafwaisha ukwisaba pamo na batemwikwa benu abafwa? Nga mulafwaisha, lyonse muleibukisha ukuti, Yehova alikwata sana amaka ya kubuusha abafwa. Takuli icingamulesha ukufikilisha ubulayo bwakwe ubwa kubuusha abafwa. Kuti cawama nga mwasambilila ifingi pali Lesa na pa fyo alaya ukuti akabuusha abafwa. Ukucita ifi, kukamwafwa ukupalama kuli Yehova, “Lesa wa ba mweo.”
Amalembo ya kubelenga mu February
[Futunoti]
^ para. 3 Nga mulefwaya ukwishibilapo na fimbi pa fyo Lesa alaya ukubuusha abafwa mu calo cipya, belengeni icipandwa 7 mu citabo citila Bushe Cinshi Baibolo Isambilisha? Abalemba ici citabo ni Nte sha kwa Yehova.
[Amashiwi pe bula 7]
Yehova alikwata sana amaka ya kubuusha abafwa
