Alatupeela Ifintu ‘Ifingi Ifilenga Imitima Yesu Ukusangalala’
PALAMENI KULI LESA
Alatupeela Ifintu ‘Ifingi Ifilenga Imitima Yesu Ukusangalala’
Bushe cine cine Yehova alatusakamana, nelyo bushe tabikako amano ku mafya abantu bakwata? Ifyo Baibolo ya-asuka ici cipusho, filatulenga twaba ne nsansa. Ukwabula no kutwishika Lesa alatusakamana kabili alafwaya tuleba ne nsansa. Lyonse alafwaya abantu bonse, ukubikako fye na bashitasha, balenonkelamo mu fisuma ifyo atupeela. Natulande pa mashiwi umutumwa Paulo alembele.—Belengeni Imilimo 14:16, 17.
Ilyo Paulo alelanda na ba mu musumba wa mu Lustra abashalepepa Lesa wa cine, atile: “Mu nkulo ishapita [Lesa] asuminishe inko shonse ukuya mu nshila sha shiko, nelyo tailekele fye ukwabula ubushininkisho pantu acitile icisuma, pa kumupeela imfula ukufuma mu muulu ne nshita sha kutwala ifisabo, ukumupeela ifya kulya ifingi no kulenga imitima yenu ukusangalala.” Bushe abo Paulo alelandako balyumfwile umo amashiwi alandile yalolele?
Abena Lustra balishibe umwalolele ifyo Paulo alandile pantu baleikala mu mpanga iyali iya mufundo sana, umwali amenshi ayengi kabili umo balelima sana. Nga fintu Paulo abebele, Lesa e ulenga imfula ukuloka kabili e ulenga kube ne nshita ya kutwala ifisabo. Kanshi lyonse nga basombola ifisabo ifingi no kulya ifya kulya ifisuma, baleishiba ukuti ni Lesa e walelenga ukuti bakwate ifi fintu.
Ifyo Paulo aebele abena Lustra, filatusambilisha ifintu ifingi ifyacindama pali Yehova Lesa.
Yehova alitupeela ubuntungwa bwa kuisalila ifyo tulefwaya. Alisuminishe inko shonse “ukuya mu nshila sha shiko.” Icitabo ico abapilibula amaBaibolo babomfya citila, aya mashiwi kuti yapilibula no “kucita fyonse ifyo abantu balefwaya” nelyo “ukucita fyonse ifyo balemona ukuti e fili bwino.” Yehova tapatikisha nangu umo ukumupepa. Alitupeela ubuntungwa bwa kuisalila nampo nga tulefwaya ukuba no mweo nelyo iyo.—Amalango 30:19.
Yehova alafwaya ukuti tumwishibe. Paulo atile Lesa, “tailekele fye ukwabula ubushininkisho.” Icitabo tulandilepo ico abapilibula amaBaibolo babomfya cilanda pali aya mashiwi ukutila yapilibula ukuti, “alailanga apabuuta tuutu ifyo aaba.” Ifyo Lesa abumba filalanga “imibele yakwe,” pamo nga ubusuma, amano, amaka, no kutemwa. (Abena Roma 1:20) Yehova alitupeela Baibolo iilenga ukuti twishibe ifingi pali ena. (2 Timote 3:16, 17) Bushe ifi tafilanga fye ukuti Lesa alafwaya tumwishibe?
Yehova alafwaya ukuti tuleba aba nsansa. Paulo atile, Lesa “alatupeela ifya kulya ifingi no kulenga imitima yesu ukusangalala.” Nangu fye mubembu uushaishiba Yehova kuti alya ifya kulya no kuba ne nsansa. Na lyo line, Lesa alafwaya ukuti lyonse tuleba ne nsansa. Kuti twaba fye ne nsansa nga twasambilila icine pali Lesa no kulakonka ifyo atufunda.—Amalumbo 144:15; Mateo 5:3.
Bonse tulanonkelamo mu busuma bwa kwa Yehova cila bushiku. Bushe te kuti mutemwe ukwishibilapo na fimbi pa fyo mwingalanga ukuti mulatasha Lesa “uutupeela ifya kulya ifingi no kulenga imitima yesu ukusangalala”?
Amalembo ya kubelenga mu July
[Amashiwi pe bula 11]
Lyonse Lesa alafwaya abantu bonse, ukubikako fye na bashitasha, balenonkelamo mu fisuma ifyo atupeela
