Nafyalilwe ku Acul, umusumba uunono uwabela mu ncende sha mpili mu calo ca Guatemala. Mu lupwa lwesu, tuli ba Ixil. Aba Ixil bafuma ku bena Maya. Indimi naishiba ukulanda ciSpanish e lyo ne ciIxil. Nafyelwe mu nshita ilyo mu calo ca Guatemala mwali inkondo pa myaka 36. Muli iyi myaka, aba Ixil abengi balifwile.

Ilyo nali ne myaka 4, umukalamba wandi uwali ne myaka 7 aleangasha ibomba, lyena ukwabula no kwenekela lyalipuuliike. Ilyo ili ibomba lyapuuliike, ndume nandi alifwile e lyo ine nalipofwile. E ico naile mu kwikala uko basungila abana abashimona mu Guatemala kabili ilyo nali uku, nalisambilile ukubelenga ifilembo fya mpofu. Ilyo nali kulya, nshaishibe icalengele ababomfi ba pali ici cifulo balenkanya ukulalanda na baice banandi, kabili abo nalesambilila nabo tabalemfwaya. Lyonse naleba fye neka kabili nalefuluka sana ukuya ku ng’anda mu kumona bamayo. Ku ng’anda naleikalako fye imyeshi ibili mu mwaka. Bamayo bena bali aba cikuuku kabili aba luse. Ku ca bulanda, ilyo nali fye ne myaka 10, bamayo balifwile. Nalyumfwile sana ububi ilyo bamayo bafwile pantu nalemona kwati e bantemenwe fye beka.

Ilyo nali ne myaka 11, nalibwelelemo ku Acul, uko naile mu kwikala na bakalamba bandi no lupwa lwabo. Nangu ca kuti balenshitila ifyo nalekabila, tabalensansamusha. Limo limo, nalepepa kuli Lesa nati: “Cinshi bamayo bafwila? Mulandu nshi napofwila?” Abantu balenjeba ukuti fyonse ifyalencitikila, kufwaya kwa kwa Lesa. Nasukile natendeka ukutontonkanya ukuti Lesa taba bwino. Nalefwaya ukuyipaya, nomba nalifililwe pantu nshalekwata ifya kubomfya.

Apo nalipofwile, naleumfwa sana ububi kabili abantu balencusha sana. Ilyo nali umwaice, abantu balincendele imiku iingi. Abantu abalencita ifi, nshalebasoselela pantu nalemona kwati abantu bonse tabambikileko amano. Abantu tabalelanda na ine sana kabili na ine nshalelanda no uli onse. Nshalefwaya ukuba na bantu bambi, naleumfwa sana ubulanda kabili nshacetekele umuntu nangu umo.

Ilyo nali ne myaka 13,  ba Nte babili abaupana baishile apo nali ninshi tuletuusha. Kafundisha umo uwambikileko sana amano, e wabebele ukuti bakesentandalila. Banjebele ukuti Baibolo yalanda ukutila abafwa bakabuuka no kuti kasuba kamo, impofu shikatendeka ukumona. (Esaya 35:5; Yohane 5:28, 29) Nalitemenwe sana ifyo balensambilisha, nomba apo nshabeleshe ukulanda na bantu, calengafya sana ukulanda nabo. Nangu calengafya ukulanda nabo, balentekanishisha sana kabili tabalekele ukwisa mu kunsambilisha Baibolo. Aba ba Nte baleenda amakilomita 10, kabili balepita mu mpili pa kuti bese ku mwesu.

Abakalamba bandi balenondolwela ukuti aba ba Nte balefwala ifya kufwala ifya busaka, lelo balemoka kwati te bakankaala. Nangu tabaali abakankaala, balintemenwe kabili balendetelako no tuntu tumo tumo. Nalimwene ukuti Abena Kristu ba cine fye, e bengantemwa ifi.

Nalesambilila Baibolo ukubomfya impapulo isho balemba mu filembo fya mpofu. Nangu ca kuti naleumfwa ifyo nalesambilila, fimo fimo fyalengafya ukusumina. Ku ca kumwenako, nalefilwa ukusumina ukuti Lesa alambikako amano, no kuti kwaliba abantu abengansakamana. Nalisambilile ico Yehova asuminishisha ifyabipa ukucitika, lelo calingafishe ukusumina ukuti Lesa ni Shifwe uwaba no kutemwa. *

Mu kuya kwa nshita, ifyo nalesambilila muli Baibolo fyalengele nayaluka mu fyo naletontonkanya. Ku ca kumwenako, nalisambilile ukuti Lesa alomfwa sana ububi abantu nga balecula. Ilyo ababomfi bakwe balebacusha, Lesa atile: “Nimona ukucula kwa bantu bandi . . . Ninjishiba ukukalipwa balekalipwa.” (Ukufuma 3:7) Ilyo naishibe imibele ya kwa Yehova iisuma, naliipeele kuli ena, kabili mu 1998, nalibatishiwe no kuba Inte ya kwa Yehova.

Ilyo papitile fye umwaka umo ukufuma apo nabatishiwilwe, naile ku sukulu uko balesambilisha impofu mupepi na ku Escuintla. Ilyo nabwelelemo ku mwesu, eluda umo alishibe amafya nalekwata pa kuya mu kulongana. Na kuba, icilonganino cali mupepi ni cilya cine ukwalefuma ba Nte babili abaleisa mu kunsambilisha Baibolo. Kanshi pa kuti ndesangwa mu kulongana, eluda alifwaile ba Nte aba mu Escuintla mwine ukuti balensunga. Ukufika no bwalelo, balansunga fye bwino kwati nine lupwa wabo.

Fingi ifyo ningalanda ifyo aba mu cilonganino bancitila ifilanga ukuti balintemwa. Ifi fyonse bancitila fyalilenga nashininkisha ukuti apo ndi Nte ya kwa Yehova, naba pa Bena Kristu ba cine.—Yohane 13:34, 35.

Nalileka ukutontonkanya ukuti nshacindama kabili nalikwata ne subilo. Pali ino nshita, naliba ne nsansa. Apo ndabomba ama awala ayengi ukusambilisha bambi Baibolo, ntontonkanya sana pa kusambilisha bambi Baibolo ukucila ukulatontonkanya pa fyo napofula. Pali ino nshita, nine eluda mu cilonganino. Ndalanda amalyashi mu cilonganino na pa kulongana kukalamba ukuba abantu abengi nga nshi.

Mu 2010, nalisangilwe kwi Sukulu lya Kukansha Ilya Butumikishi (ilyo nomba beta ukuti Isukulu lya Bakabila ba Mbila Nsuma ya Bufumu) ilyabelele mu El Salvador. Ili isukulu lyalingafwa ukulabomba bwino imilimo mu cilonganino. Ili isukulu lyalilenga nalamona ukuti kanshi nalicindama kabili Yehova Lesa alintemwa pa kunsambilisha ifya kubomba bwino umulimo wakwe.

Yesu atile: “Mwaba insansa ishingi mu kupeela ukucila ishaba mu kupokelela.” (Imilimo 20:35) Kale nalemona kwati te kuti imbe ne nsansa, lelo pali ino nshita naliba ne nsansa, kabili nalishiba ukutila kuti nayafwilishako bambi.