ICIPANDE ICIKALAMBA | IFYO MWINGACITA PA KUTI MULENONKELAMO SANA MU KUBELENGA BAIBOLO
Bushe Baibolo Kuti Yangafwa Shani Ukulaikala Bwino?
Baibolo yaliibela. Mwaba ukupanda amano ukufuma kuli Kabumba wesu. (2 Timote 3:16) Ifyebo fyabamo kuti fyatwafwa. Na kuba Baibolo itila: “Icebo ca kwa Lesa ca mweo kabili ca maka.” (AbaHebere 4:12) Yalikwata amaka ya kutwafwa ukwishiba ifya kulaikala bwino no kwishiba Lesa e lyo ne fyo atulaya.—1 Timote 4:8; Yakobo 4:8.
Ifyo ingamwafwa ukalaikala bwino. Baibolo yalilanda na pa fintu pamo nga:
-
Ifya kumfwana na bantu banensu. —Abena Efese 4:31, 32; 5:22, 25, 28, 33.
-
Ifyo mwingacita pa kukwata ubumi ubusuma. —Amalumbo 37:8; Amapinda 17:22.
-
Imibele iisuma.—1 Abena Korinti 6:9, 10.
-
Pa ndalama.—Amapinda 10:4; 28:19; Abena Efese 4:28. *
Abaupene nomba line aba ku Asia balitemenwe sana ifyo basambilile muli Baibolo. Nga fintu ciba ku bantu abengi nga baupana fye, calibafishe ukulaumfwana no kwishiba ifya kulanshanya bwino. Nomba ilyo batendeke ukucita ifyo balesambilila muli Baibolo ba Vicent, abalume batile: “Ifyo nalebelenga mu Baibolo fyalingafwile ukwishiba ifya kupwisha amafya twalekwata mu cupo. Ukulacita ifyo Baibolo ilanda kwalilenga tuleikala bwino.” Abena mwabo ba Annalou batile: “Ukubelenga pa bantu abalembwa mu Baibolo kwalitwafwa ukulaikala bwino. Pali ino nshita naliba ne nsansa kabili nalitemwa ifyo twikala mu cupo ne fyo tupanga ukucita.”
Ifyo mwingeshiba Lesa. Ba Vicent balandile no kuti: “Ukubelenga Baibolo kwalilenga nalaumfwa sana ukuti Yehova ni cibusa wandi ukucila ifyo naleumfwa kale.” Ifi ba Vicent balandile filanga fye ukuti Baibolo kuti yamwafwa ukwishiba bwino Lesa. Nga mulebelenga Baibolo, mwakulanonkela mu fyo Lesa atweba kabili mukaba cibusa wakwe. Na kabili mukeshiba ukuti alilanda pa fyo ifintu fikaba ku ntanshi, inshita ilyo tukakwata “umweo wine wine,” e kutila inshita ilyo tushakalefwa. (1 Timote 6:19) Takwaba icitabo cimbi icingatusambilisha pali ifi.
Nga mwatendeka ukubelenga Baibolo kabili mwatwalilila ukulaibelenga, mwakulaikala bwino kabili mukeshiba Lesa. Na lyo line, ilyo mulebelenga Baibolo, nalimo mukakwata amepusho ayengi. Na kabili nga mwakwata amepusho mulingile ukupashanya cilolo umwina Etiopia uwaliko imyaka 2000 iyapita. Alikwete amepusho ayengi pali Baibolo. Ilyo bamwipwishe nga alyumfwile ifyo alebelenga, atile: “Bushe kuti naishiba shani, apabula uwa kuntungulula?” * Lyena alisumiine ukuti bamusambilishe Amalembo kuli Filipi uwali umusambi wa kwa Yesu kabili uwaishibe sana ukusambilisha. (Imilimo 8:30, 31, 34) Na imwe nga mulefwaya ukwishibilapo na fimbi pali Baibolo, kuti mwalemba formu iyaba pa www.pr2711.com/bem nelyo ukulembela ku maofeshi yesu ukubomfya ama adresi ayali muli ino ine magazini. Na kabili kuti mwalanda na ba Nte abekala uko mwikalila nelyo kuti mwaya ku Ng’anda ya Bufumu iyaba mupepi. Tulemukoselesha ukutendeka ukubelenga Baibolo lelo line pa kuti imwafwe ukulaikala bwino.
Nga muletwishika nga ca kutila kuti mwacetekela ifyo Baibolo ilanda, tambeni vidio iitila Bushe Kuti Twashininkisha Shani Ukuti Ifyo Baibolo Ilanda fya Cine? Kuti mwaisanga nga mwacita scan code nelyo mwaya pa jw.org/bem. Kabiyeni apo balemba ati IMPAPULO >AMAVIDIO > BAIBOLO
^ para. 8 Nga mulefwaya ukwishibilapo na fimbi pa fyo Baibolo ingamwafwa kuti mwaya pa webusaiti yesu iya jw.org/bem. Kabiyeni apo balemba ati AMASAMBILISHO YA MU BAIBOLO > AMASUKO KU MEPUSHO YA MU BAIBOLO.
^ para. 11 Belengeni ne cipande cileti “Cinshi Cawamina Ukwishiba Umwalola Ifyo Baibolo Ilanda?” muli ino ine magazini.
Nalimo Kuti Mwatemwako ne fi
AMASUKO KU MEPUSHO YA MU BAIBOLO
Finshi Mufwile Ukucita pa Kuti Mwishibe Baibolo?
Te mulandu ne nkulilo yenu, kuti mwaishiba amashiwi ya kwa Lesa ayaba mu Malembo ya Mushilo.
ULUPUNGU LWA KWA KALINDA
Bushe Nimwe Cibusa wa kwa Lesa?
Abantu bengi nga nshi balishininkisha ukuti Lesa abamona ukuti ni bacibusa bakwe.
AMASAMBILISHO YA MU BAIBO AYACINDAMA
Bushe Lesa Alikwata Ishina?
Lesa alikwata amalumbo ayengi pamo nga Uwa Maka Yonse, Kabumba, na Shikulu. Lelo Lesa alikwata ishina ilyo balemba imiku 7,000 mu Baibolo.
AMASAMBILISHO YA MU BAIBO AYACINDAMA
Bushe Baibolo Cebo ca kwa Lesa?
Nga ca kuti Lesa e walengele Baibolo ilembwe, ninshi ifwile ukucila ifitabo fimbi ifyabako.
AMASAMBILISHO YA MU BAIBO AYACINDAMA
Nani Umwine wa Fyebo Fyaba mu Baibolo?
Bushe ifi abantu e balembele Baibolo, kuti twatila Baibolo “Cebo ca kwa Lesa”? Bushe ifyalembwa mu Baibolo fya kwa ani?
