Ibumba Litungulula, libumba ilinono ilya Bena Kristu abatungulula umulimo wa Nte sha kwa Yehova mwi sonde lyonse. Imilimo babomba ni yi:

•   Balangalila umulimo wa kupekanya no kusambilisha ifyaba mu Baibolo ukubomfya impapulo, ukulongana, e lyo na masukulu ya Nte sha kwa Yehova.—Luka 12:42.

•   Balangalila umulimo wa kubila imbila nsuma uo Inte sha kwa Yehova babomba mwi sonde lyonse, kabili balashininkisha ukuti ubupe ubo abantu bapeela ku cilonganino bwabomfiwa bwino.

 Ababa mwi Bumba Litungulula balapashanya ‘abatumwa na bakalamba abali mu Yerusalemu’ abaliko mu nshiku sha batumwa abalepingula ifyo Abena Kristu bonse balekonka. (Imilimo 15:2) Nga filya abatumwa na bakalamba mu Yerusalemu baali, ababa mwi Bumba Litungulula te ntungulushi sha cilonganino cesu. Balakonka ifyo Baibolo ilanda, kabili balishiba ukuti Yehova Lesa alisonta Yesu Kristu ukuba Umutwe wa cilonganino.—1 Abena Korinti 11:3; Abena Efese 5:23.

 Ababa mwi Bumba Litungulula ni ba Kenneth Cook Jr., ba Gage Fleegle, ba Samuel Herd, ba Geoffrey Jackson, ba Stephen Lett, ba Gerrit Lösch, ba Mark Sanderson, na ba David Splane. Ba Jeffrey Winder. Aba bonse babombela pa maofeshi yakalamba aya Nte sha kwa Yehova mu Warwick, mu New York, ku America.

 Ibumba Litungulula lyalipanga amakomiti 6 ayangalila imilimo ya Nte sha kwa Yehova iyalekanalekana, kabili aba mwi Bumba Litungulula balaba muli komiti imo nelyo ukucilapo.

•   Komiti ya Bakampanya: Iyi komiti ilolekesha pa milandu ya mu filye kabili ilafwilisha bamunyinefwe abali na masanso e lyo nabo bacusha pa mulandu ne fyo basuminamo. Na kabili, iyi komiti ilalolekesha na pa fintu fimbi ifyakuma Inte sha kwa Yehova.

•   Komiti Isakamana Ababomba pa Bethel: Iyi komiti e isakamana ababombela pa Maofeshi ya Nte sha kwa Yehova mwi sonde lyonse.

•   Komiti ya Kusabankanya: Iyi komiti e yangalila umulimo wa kupulinta, ukusabankanya, no kutuma impapulo shilanda pali Baibolo ku ncende shalekanalekana kabili e ilolekesha pa makuule ya fifulo fya kupepelapo, amaofeshi ya bakapilibula e lyo na maofeshi ya musambo aya Nte sha kwa Yehova.

•   Komiti ya Mulimo: Iyi komiti e yangalila umulimo wa kubila ‘imbila nsuma iya bufumu.’—Mateo 24:14.

•   Komiti ya Kusambilisha: Iyi komiti e yangalila umulimo wa kupekanya ifya mu Baibolo ifyo tusambilila pa kulongana e lyo ne fyo basambilisha mu masukulu ya Nte sha kwa Yehova. Na kabili, iyi komiti ilangalila no mulimo wa kupekanya ifya kukutikako e lyo na mavidio.

•   Komiti ya Kulemba: Iyi komiti e yangalila umulimo wa kulemba impapulo ishilanda pa fyaba mu Baibolo ishapulintwa e lyo ne shaba pa webusaiti yesu, kabili ilangalila no mulimo wa kupilibula impapulo.

 Na kabili, ababa mwi Bumba Litungulula balakumana cila mulungu ku kulanshanya pa fyo icilonganino cilekabila. Ilyo balelanshanya, balakonka ifyo Amalembo yalanda kabili balaleka umupashi wa mushilo ulebafwa ukupingula no mutima umo.—Imilimo 15:25.

 Aba Bena Kristu ba cishinka abafwilisha mu makomiti ye Bumba Litungulula. (1 Abena Korinti 4:2) Abo basala ukubomba iyi imilimo ni bamunyinefwe abaishiba bwino ifya kubomba umulimo uo komiti babamo yangalila kabili ababomba pa nshita iitali. Cila mulungu balasangwa ku kumana kubako ukwa baaba muli iyo komiti. Nangu ca kuti tabapingulako ifyo icilonganino cikonka, balapanda amano aba mwi Bumba Litungulula. Na kabili, balashininkisha ukuti ifyo komiti babamo ipingwile fyatendeka ukubomba kabili balamona ne fyo fileenda. Inshita shimo Ibumba Litungulula lilabatuma ukuya mu kutandalila bamunyinefwe mu fyalo fyalekanalekana, e lyo limo balabeba ukulandako amalyashi pa kukumana kwa pa mwaka nelyo pali programu ya balepwisha Isukulu lya Gileadi.