Mi mi bon long Montreal, bigfala city blong Quebec provins long Kanada. Mi mi gat wan sista mo tu smol brata. Mifala i gruap long wan naesfala ples klosap long Rosemont. Papa mo mama i lavem mifala mo tufala i lukaot gud long mifala. Mifala i gat wan laef we i gat pis mo i kwaet.

Taem mi smol, mi intres tumas long Baebol. Mi tingbaot taem we mi gat 12 yia nomo, mi laekem tumas blong ridim stori blong laef blong Jisas long Niu Testeman. Lav mo fasin sore we Jisas i gat long ol man i mekem se mi wantem tumas blong kam olsem hem. Be sore tumas taem we mi kam olfala lav ya i godaon mo mi stat blong joen wetem ol rabis fren.

Papa blong mi i wan man blong plei saksafon. Hem i givim saksafon blong hem long mi, mo i pulum mi blong laekem miusik. Miusik i kam haf blong laef blong mi. Mi laekem tumas miusik ale mi lanem tu blong plei gita. Samtaem afta, mi mekem wan smol grup blong miusik wetem sam fren. Mifala i stap go plei long ol defdefren ples. Sam man blong wokem miusik, oli laekem miusik blong mifala mo oli askem blong mi wok wetem olgeta. Mi saenem kontrak wetem wan bigfala kampani blong mekem miusik. Ol man oli stat blong laekem miusik blong mi mo plante taem, radio long Quebec i plei long hem.

I luk olsem se mi gat evri samting we mi stap tingbaot. Mi mi yang, ol man oli save gud mi, mo mi gat plante mane taem mi stap plei. Long dei, mi go mekem eksisaes, mi mekem ol intaviu, mi saen long ol buk o klos we ol man oli wantem, mo oli soem mi long televisin. Long naet, mi go plei miusik, mo mi go long ol pati. Blong mekem se mi no tingting tumas long ol man we oli luk mo harem mi mi plei, mi stat blong tekem alkol. Be sloslo, mi tekem drag tu. Fasin blong mi i raf mo mi mekem ol rabis fasin blong seks.

Sam man oli wantem gat sem laef olsem mi from we oli luk se mi hapi. Be taem mi stap mi wan, mi harem se laef blong mi i emti. Mi harem nogud mo mi wari. Taem miusik blong mi i stap kam bigwan moa, tu man we tufala i stap plei wetem mi tufala i kasem sik ya AIDS mo tufala i ded. !Mi mi sek long samting ya! Nating se mi laekem miusik, be mi no laekem kaen laef olsem.

Nating se mi kasem ol samting we mi wantem, mi luksave se i gat wan samting i no stret long wol ya. ?From wanem i gat tumas kruked fasin? Mi wantem save from wanem God i slo blong tekem aksen. Plante taem mi prea long God blong kasem ansa blong kwestin ya. Taem mi no moa go aot tumas, mi stat blong ridim Baebol bakegen. Mo nating se mi no kasem save plante samting we mi ridim, be mi luksave se en blong wol ya i klosap finis.

Taem mi stap ridim Baebol mi faenemaot se Jisas i no kakae blong 40 dei taem hem i stap long draeples. (Matiu 4:1, 2) Mi gat tingting se sipos mi tu mi mekem semak bambae God i ansa long mi, ale mi putum wan stret dei we bambae mi stat lego kakae. Be tu wik bifo long dei ya, tu Witnes blong Jehova i noknok long doa blong mi, ale mi singaot tufala i kam insaed, i olsem se mi bin wet long tufala. Mi lukluk stret long ae blong wan long tufala we nem blong hem Jack, mo mi askem se, “?Olsem wanem blong luksave se yumi stap laef long ol lasdei blong wol ya?” Hem i openem Baebol blong hem mo i ridim 2 Timoti 3:1-5. Mi askem plante kwestin long tufala, mo mi glad tumas blong kasem ansa blong evri kwestin blong mi we oli kamaot stret long Baebol. Afta we tufala i visitim mi plante taem, mi kasem save se i no nid blong mi lego kakae.

Mi stat blong stadi Baebol wetem ol Witnes. Biaen mi katem longfala hea blong mi, mo mi stat blong go long ol miting long wan Haos Kingdom we i stap klosap. Lav we ol brata mo sista oli soem long mi, i mekem mi sua fulwan se mi faenem trutok.

Be blong mekem ol samting we mi lanem long Baebol i wok long laef blong mi, mi mas mekem sam bigfala jenis. Sam long ol samting ya, hemia se mi mas stopem blong yusum drag mo stopem rabis fasin blong seks. Mo tu, mi mas jenisim fasin blong mi blong tingbaot mi wan nomo, be mi mas tingbaot narafala fastaem. Mi mi wan singel papa, mi mas lukaot gud long tufala pikinini blong mi, mo tijim tufala long trutok. Taswe mi lego miusik, mo mi mekem wan wok we mane blong hem i no bigwan tumas.

I no isi blong mekem ol jenis ya. Taem mi wantem stopem drag, plante taem i no isi. Samtaem mi harem se mi wantem tekem bakegen. (Rom 7:19, 21-24) I had tu blong lego rabis fasin ya blong seks. Mo tu, niufala wok blong mi i mekem se mi taet tumas, mo mi no glad long pei blong mi. I tekem tri manis blong mi kasem sem mane we mi bin stap kasem long tu aoa nomo taem mi stap plei miusik.

Prea i givhan long mi blong mi gohed blong mekem ol bigfala jenis ya. Mo tu mi faenem se i impoten blong ridim Baebol oltaem. I gat sam vas blong Baebol we oli leftemap tingting blong mi. Wan hemia long 2 Korin 7:1, we i talem long ol Kristin blong “wasemaot ol samting we oli mekem bodi mo tingting blong [olgeta] i kam doti.” Narafala vas we i givhan long mi blong luksave se mi save winim ol nogud fasin blong mi hemia Filipae 4:13, we i se: “Mi mi gat paoa blong fesem olgeta samting from God ya we i givim paoa long mi.” Jehova God i ansarem prea blong mi mo i givhan long mi blong kasem save mo mekem ol trutok blong Baebol i wok long laef blong mi. Samting ya i pulum mi blong givim laef blong mi long hem. (1 Pita 4:1, 2) Mi mi baptaes blong kam wan Witnes blong Jehova long 1997.

Mi mi sua se sipos mi stap gohed yet long rabis laef blong mi bifo, tede mi ded finis. !Naoia mi harem gud tumas blong gat wan laef we i fulap wetem trufala glad! Gudfala waef blong mi, Elvie, i rili wan blesing blong mi. Mitufala i glad blong mekem fultaem paenia mo wok tugeta blong tijim ol man long Baebol. Hemia i givim bigfala glad mo mi gat pis long tingting. Mi mi tangkiu bigwan long Jehova blong tekem mi mi kam klosap long hem.—Jon 6:44.