Long taem blong trabol, ol Witnes blong Jehova oli givhan long ol Kristin brata mo sista blong olgeta mo ol narafala man tu. Oli mekem olsem from we oli gat lav, hemia fasin we i makemaot ol trufala Kristin.—Jon 13:35.

Biaen, i gat ripot blong sam ples we ol Witnes oli givhan long taem blong disasta, long ol 12 manis bifo long medel blong yia 2012. Antap long ol samting we ripot ya i tokbaot, ol Witnes oli givim help long saed blong spirit mo filing tu. Ol branj ofis oli putumap ol Disasta Rilif Komiti blong oganaesem help ya. Ol brata mo sista long ol kongregesen raonabaot long ples we disasta i hapen, olgeta tu oli givhan.

Japan: Long 11 Maj 2011, wan bigfala etkwek mo tsunami long not blong Japan i spolem plante handred taosen man. Ol Witnes blong Jehova long fulwol oli givim mane, olting, mo yusum gudhan blong olgeta blong halpem olgeta we oli safa. Wajem video we i tokbaot hadwok we oli mekem long Japan blong givhan long taem blong disasta ya.

Brasil: Plante handred man oli ded taem bigfala ren i foldaon, wota i ron olbaot, graon i brobrok, mo sofmad i kavremap plante ples. Kwiktaem nomo, ol Witnes blong Jehova oli sanem 42 tan blong kakae, 20,000 botel wota, 10 tan klos, mo 5 tan blong ol samting blong klinim ples, wetem meresin mo sam narafala samting tu.

Kongo (Brasavil): Wan ples blong doti we oli sakem ol tul blong faet long hem, i bosta, nao i spolem haos blong 4 Witnes blong Jehova fulwan, mo i damejem haos blong 28 narafala Witnes. Ol Witnes oli givim kakae mo klos long olgeta, mo oli tekem sam famle i go stap long haos blong olgeta.

Kongo (Kinsasa): Oli karem meresin i go long olgeta we oli kasem sik ya kolera. Olgeta we wota i spolem ples blong olgeta from bigfala ren we i foldaon, oli kasem klos we ol narafala oli givim fri. Olgeta long ol kamp blong refuji oli kasem meresin, sid blong planem long garen, mo plante tan blong klos we ol narafala oli givim fri.

Veneswela: Bigfala ren i mekem se wota i ron olbaot mo sofmad i kamdaon long ol hil mo kavremap plante ples. Ol Disasta Rilif Komiti oli halpem 288 Witnes we oli kasem trabol olsem. Oli bildim bitim 50 niufala haos blong olgeta. Mo tu, oli givhan long olgeta we maet wota i kam insaed long haos blong olgeta, taem Lek Valencia i kam antap.

Filipin: Ol bigfala hariken oli mekem se wota i kavremap plante ples long kantri ya. Branj ofis i sanem kakae mo klos long olgeta we oli stap long ples blong disasta, mo afta we wota i godaon, ol Witnes long eria ya oli givhan blong klinap.

Kanada: Wan bigfala faea blong bus i bonem plante ples long Alberta. Afta long hemia, ol Witnes long eria ya oli givim bigfala mane long kongregesen blong Slave Lake, blong halpem olgeta long taem blong klinap. Oli no yusum olgeta mane ya, ale oli givim haf mane we i stap i go olsem presen mane, long ol narafala ples long wol we disasta i spolem olgeta.

Aevori Kos: Afta long wo long kantri ya, ol brata mo sista oli kasem olting, ples blong slip, mo meresin we oli nidim.

Fiji: Taem wota i kavremap ples from bigfala ren, klosap 192 famle we oli Witnes oli lusum fam blong olgeta, we oli stap kasem kakae mo mane long hem. Be ol narafala oli givim kakae we oli nidim.

Gana: Taem bigfala wota i kavremap plante ples long is blong kantri ya, olgeta we oli lusum olting blong olgeta oli kasem kakae, sid, mo wan narafala haos blong slip long hem.

Yunaeted Stet: Ol hariken oli damejem 66 haos blong ol Witnes long tri stet, mo oli spolem fulwan 12 haos blong ol Witnes. Bighaf blong ol Witnes ya oli gat insurens, be oli kasem presen mane blong givhan long olgeta blong klinap.

Ajentina: Ol kongregesen blong ol Witnes blong Jehova oli halpem olgeta long saot blong kantri, we asis blong volkeno i damejem haos blong olgeta.

Mosambik: Oli karem kakae i go long bitim 1,000 man we bigfala draetaem i spolem olgeta.

Naejeria: Twanti-fo Witnes we oli kasem kil taem wan bas i aksiden, oli kasem presen mane blong givhan long olgeta. Long not blong kantri ya, plante oli mas ronwe long haos blong olgeta from faet blong ol man blong defdefren laen mo jos, mo olgeta tu oli kasem help.

Benin: Oli givim meresin, klos, moskito net, klin wota, mo ples blong slip, long olgeta we bigfala wota i ron long ples blong olgeta.

Dominikan Ripablik: Afta long hariken Irene, ol kongregesen raonabaot oli fiksimap ol haos mo givim ol samting we ol narafala oli nidim.

Itiopia: Long tu ples we bigfala draetaem i spolem, mo wan ples we bigfala ren i mekem wota i ron olbaot, oli kasem presen mane blong pem ol samting we oli nidim.

Kenia: Olgeta we oli kasem hadtaem from we ples i drae bitim mak, oli kasem presen mane blong givhan long olgeta.

Malawi: Olgeta we oli stap long refuji kamp long Dzaleka oli kasem help.

Nepal: Graon i brok mo i damejem bigwan haos blong wan Witnes. Hem i kasem wan ples blong slip blong smoltaem, mo kongregesen blong hem i givhan long hem.

Papua Niu Gini: Sam rabis man oli bonem haos blong eit Witnes. Plan i stap gohed blong bildim ol haos ya bakegen.

Romania: Sam Witnes oli lusum haos blong olgeta from bigfala wota we i ron. Oli kasem help blong bildim ol haos ya bakegen.

Mali: Olgeta long nekis kantri Senegal, oli givim presen mane long olgeta we oli no gat kakae from draetaem i spolem garen blong olgeta.

Siera Leon: Sam dokta blong Franis we oli Witnes, oli kam blong halpem mo givim meresin long ol Witnes we oli stap long ol eria we faet i bin gohed.

Taelan: Bigfala wota we i ron i spolem plante provins. Ol grup blong ol Witnes oli fiksimap mo klinim 100 haos mo 6 Haos Kingdom.

Jek Ripablik: Bigfala wota we i ron i damejem plante haos long Jek Ripablik. Ol Witnes long nekis kantri, Slovakia, oli givhan blong fiksimap olgeta.

Sri Lanka: Klosap Disasta Rilif Komiti i finisim wok blong fiksimap ol ples, afta we tsunami i spolem.

Sudan: Oli sanem kakae, klos, sus, mo ol bigfala plastik i go long ol Witnes blong Jehova, we oli mas ronwe long haos blong olgeta from faet long kantri ya.

Tansania: Taem bigfala wota i ron, 14 famle i lusum olting blong olgeta. Ol kongregesen raonabaot oli givim klos mo ol samting we oli nidim long haos. Oli mas bildim bakegen wan haos.

Simbabwe: Long wan ples long kantri ya, plante man oli hanggri from we ples i drae tumas. Oli sanem kakae mo mane long olgeta we oli nidim.

Burundi: Disasta Rilif Komiti i stap givhan long ol refuji, mo givim meresin long olgeta tu.