“Mi mi presem ol memba blong ogenaesesen blong yufala from we oli wantem tumas blong mekem wok blong God. Mifala i glad mo mifala i tinghae long ol gudfala wok we yufala i mekem long ol narafala Witnes mo long komuniti.”

Hemia nao samting we Kasim Reed, i talem long leta blong hem. Hem i mea blong taon blong Atlanta, Georgia, U.S.A. Leta ya i blong welkamem ol Witnes Blong Jehova we oli gat tri bigfala asembli long ples ya.

Mo Kaonsel blong Taon blong Atlanta, i talem welkam long ol brata mo sista we oli kam from asembli ya. Oli talem se: “I gat klosap eit milian Witnes Blong Jehova long fulwol, we oli kamaot long . . . ol defren kantri mo oli toktok defren lanwis, be yet . . . yufala i joengud from yufala i gat sem tingting . . . [Yufala] i wantem ona long Jehova, God blong Baebol mo Man we i wokem olgeta samting.”

I gat tri defren asembli long Julae mo Ogis long 2014, tu i stap long Inglis mo wan long Spanis. Ol man we oli kam from asembli ya oli blong samwe 28 defren kantri, mo asembli we i kamaot long Inglis, oli transletem i go long Japanis mo lanwis Rasia, blong givhan long olgeta we oli toktok long tufala lanwis ya. I gat 95,689 man we oli kam long trifala asembli ya.

Long 2014, ol Witnes blong Jehova oli gat 24 intenasnal asembli long naen defren kantri, mo 16 long olgeta i stap long Yunaeted Stet.