Long edukesen senta blong ol Witnes blong Jehova long Patterson, New York, i gat graduesen blong 48 studen, we oli stadi dip blong faef manis long Wajtaoa Baebol Skul Blong Gilead. I gat 9,694 we oli harem gud long program ya, hemia ol famle mo fren blong olgeta, mo sam narafala.

Stat long 1943, bitim 8,000 brata mo sista we oli gat ekspiriens long wok blong prij, oli kasem trening long skul ya, blong kam ol misinari. Baebol nao i bigfala buk we oli yusum long kos ya, hemia i mekem bilif blong ol studen i strong, mo i givhan long olgeta blong wokem ol gudfala fasin we oli nidim blong winim ol problem we oli fesem long misinari wok.

“Tingting Gud Long Olgeta Samting We i Mekem Man i Gat Lav.” Anthony Morris, wan memba blong Hed Kampani blong ol Witnes blong Jehova mo jeaman blong miting ya, i statem graduesen wetem wan sot tok long Filipae 4:8, we i talem se: “Yufala i mas gohed blong tingting long . . . olgeta samting we i mekem man i gat lav.”

Brata Morris i soemaot se sipos yumi tingting long olgeta samting we i mekem man i gat lav, yumi save holem wan gudfala tingting long medel blong ol man long wol ya we oli no gat lav. Hem i talem se: “Lukaotem ol samting we oli pulum yu blong yu gat lav, mo soemaot lav long ol narafala.”

Papa blong yumi long heven i soemaot nambawan eksampol taem hem i no gohed blong tingbaot ol mastik blong yumi. (Ol Sam 130:3) Brata Morris i givim advaes ya se: “Yu no mas tingting tumas long ol mastik blong ol brata mo sista, be yu mas holemtaet lav.”

“Gohed Blong Kasem Save Be Yu No Kam Waes Bitim Mak.” Harold Corkern, wan brata long Branj Komiti long Yunaeted Stet, i tokbaot Prija 7:16. God i wantem se yumi yusum gud save we yumi gat, be yumi no mas kam “big hed.”

Brata Corkern i talem tu se yumi mas soemaot lav taem yumi givim advaes o stretem narafala. Yumi no mas ekspektem moa long narafala i bitim samting we God i ekspektem. Hem i talem se: “Yusum waes mo save blong yu, mo traem kasem save long tingting blong narafala, nao ol brata mo sista bambae oli laekem tumas blong joen wetem yu.”

“Yu No Mas Fogetem Ol Fasin Blong God.” (Ol Sam 78:7) Guy Pierce blong Hed Kampani i eksplenem long stat blong tok blong hem, se fasin blong pikinini i save mekem i gud o i nogud long nem blong papa mo mama blong hem. (Ol Proveb 20:11) Sem mak long yumi, fasin blong yumi i save mekem i gud o i nogud long nem blong Papa blong yumi long heven. “Samting we i soemaot klia se hu i pikinini blong God, mo hu i pikinini blong Devel, i olsem: Man we i no stap mekem samting we i stret, hem i no kamaot long God.”—1 Jon 3:10.

Brata Pierce i talem se ol studen oli kasem invetesen blong kam long Skul blong Gilead from ol Kristin fasin blong olgeta, olsem tingting daon. Hem i rimaenem olgeta se oli mas gat tingting daon oltaem. Edukesen we oli kasem i no mekem olgeta oli hae moa long ol narafala, be i mekem se oli naf blong joen gud wetem ol brata mo sista long fulwol, mo soemaot wan gudfala eksampol long saed blong tingting daon. (Ol Sam 133:1) Brata Pierce i talem se: “Naoia, yufala i kasem save moa long Baebol, mo yufala i mas yusum ol save ya blong fren moa wetem Jehova.”

“Samting We Mifala i Mekem, Hemia Nao Wok We Mifala i Mas Mekem.” William Samuelson we i lukaot long Dipatmen Blong Ol Tiokratik Skul, i askem se: “?Bambae yu yu akseptem wan asaenmen long Jehova we yu no rili laekem?” Tingbaot samting we yumi save lanem long ol tok blong Luk 17:7-10: “Taem yufala i finisim olgeta wok we oli talem long yufala, yufala i mas talem se: ‘Mifala i slef nomo, mifala i gud blong nating nomo. Samting we mifala i mekem, hemia nao wok we mifala i mas mekem.’”

Ol studen oli spenem plante wik long wan klasrum blong oli stadi. Ating hemia i had long samfala. Be Brata Samuelson i talem se: “Yufala i mekem samting we yufala i mas mekem, mo naoia yufala i luksave olsem wanem stadi ya i givhan long yufala, mo i mekem bilif blong yufala i strong moa.” Hem i finisim tok blong hem olsem: “Yufala ol gudfala man blong wok we Jehova i trastem, i gud yufala i tinghae oltaem long nambawan blesing ya blong wok blong Masta blong yunives.”

“Taem Yu Fesem Hadtaem, Tingbaot Promes Blong Jehova.” Sam Roberson, we i namba tu brata blong lukaot long Dipatmen Blong Ol Tiokratik Skul, i givim woning long ol studen se samtaem tingting blong olgeta i save foldaon. Taswe, long taem olsem, oli mas tingbaot ol man blong Jehova bifo mo ol tok we i leftemap tingting blong olgeta. Wan eksampol, Moses i talem long Josua se: “Bambae [Jehova] i no livim yu yu stap yu wan, o i lego yu.” (Dutronome 31:8) Long en blong laef blong Josua, hem i talem se: “Olgeta gudfala promes we Jehova God blong yufala i talem, oli kamtru evriwan we i no mestem wan tok blong hem nating.”—Josua 23:14.

Jehova God i promes long ol man blong hem se: “Bambae mi mi neva lego yu, mo bambae mi neva livim yu yu stap yu wan.” (Hibru 13:5) Mining blong nem ya Jehova se “Hem i Mekem i Kam,” mo hem i promes se bambae hem i mekem eni samting we hem i nidim blong mekem, blong lukaot gud long ol man blong hem. Brata Roberson i talem se: “Yufala i mas neva givap, neva lego, neva stop. Tingbaot oltaem se Jehova bambae i neva, neva, neva lego yufala.”

“Noes Blong Olgeta i Goaot Long Olgeta Ples Long Wol.” (Rom 10:18) Wan tija blong Gilead, Mark Noumair, i givhan long ol studen blong ol defdefren kantri, blong oli talem o aktem sam ekspiriens we oli gat long wok blong prij long Patterson. Wan kapol blong Saot Afrika i glad tumas blong mitim tri woman ples blong olgeta, mo toktok long trifala long lanwis Zulu mo Xhosa. Wan kapol blong Sri Lanka i mitim wan man blong India we waef mo gel blong hem i stap long Sri Lanka. Man ya i neva luk wan Baebol bifo, ale kapol ya i glad blong givim wan Baebol blong tufala long hem.

“Yufala i Gat ‘Evri Samting We Yufala i Nidim Blong Mekem Evri Gudfala Wok.’” Gene Smalley, we i wan helpa blong Raeting Komiti, i mekem intaviu blong tu kapol. Wan kapol we i kam long Siera Leon, i tokbaot olsem wanem tufala i mas go karem wota i kam long haos evri dei. Be ol samting we i had olsem, oli nating nomo taem tufala i tingbaot glad we tufala i kasem blong mekem 50 Baebol stadi wetem olgeta we oli intres. Fofala i talem tangkiu from skul blong Gilead, we i givim evri samting we oli nidim blong mekem gudfala wok long ol ples we bambae oli go long hem.—2 Timoti 3:16, 17.

“Stanap Strong Gogo Kasem En—Mo Biaen.” Gerrit Lösch, we i wan memba blong Hed Kampani, i statem tok blong hem wetem wan pijatok blong ol man blong resis, mo olsem wanem oli mas ron blong oli save finisim wan longfala resis. Long spot, i gat wan man nomo we i winim resis, be long resis we ol Kristin oli mekem, evriwan we oli stanap strong go kasem en blong resis ya, oli win.

Fasin blong stanap strong i min se yumi gohed blong mekem wok blong God we yumi no stop, yumi no letem ol samting we oli blokem yumi, fasin agens, ol samting we oli traem yumi, o ol samting we oli no kamtru olsem yumi wantem, oli mekem tingting blong yumi i foldaon. Jisas i talem se: “Man we i stanap strong gogo kasem en, God bambae i sevem hem.” (Matiu 24:13) !Yumi harem gud tumas blong save se Jehova mo Jisas, tufala i makem olsem wanem yumi stap stanap strong! Nao Brata Lösch i tokbaot sam samting we bambae oli halpem yumi blong stanap strong, nating se yumi kasem trabol o hadtaem. Hemia sam long olgeta:

• Prea long God, we “i givim paoa blong yumi stanap strong longtaem” mo “evri dei i stap karem ol hevi samting blong yumi.”—Rom 15:5; Ol Sam 68:19.

• Yumi mas gat strong tingting se bambae yumi neva lego Jehova, mo yumi bilif strong se ‘God i stap holem promes blong hem, mo hem i no save letem wan samting i traem yumi we i strong tumas blong yumi winim. Mo taem samting olsem i traem yumi, hem bambae i mekem rod blong yumi naf blong stanap strong.’—1 Korin 10:13.

• Meksua se Kristin hop i stap klia long tingting blong yumi. Jisas “i tingbaot glad we bambae hem i kasem, taswe hem i stanap strong mo hem i no sem nating se hem i ded long wan pos.”—Hibru 12:2.

Brata Lösch i makem se yumi stap klosap long en blong resis, taswe yumi no mas givap. “Yumi mas stanap strong mo yumi ron long resis ya we i stap long fored blong yumi.”—Hibru 12:1.

Long en blong graduesen, wan studen i ridim wan leta long bihaf blong evriwan long klas, blong talem tangkiu from ol gudfala trening we oli kasem. Long leta ya, oli tokbaot dip stadi blong Baebol we oli mekem folem ol impoten yia we Baebol i makem. Hemia i halpem olgeta blong kasem save moa long ol plan blong God, mo tu, i mekem bilif blong olgeta i strong moa. Leta i talem se: “Mifala i gat strong tingting blong mekem ol gudfala samting we mifala i lanem, oli wok long laef blong mifala.”