Fas Leta Blong Jon 1:1-10
1 Mifala i raet i kam long yufala blong tokbaot man ya we i stap finis taem wol i no stap yet. Hem nao i karem tok blong laef we mifala i harem mo mifala i luk hem stret long ae blong mifala, mo mifala i luklukgud long hem, mo mifala i tajem hem.+
2 (Yes, laef i kam long klia ples, nao mifala i luk mo mifala i stap tokbaot.+ Mo mifala i stap talemaot long yufala, laef ya blong olwe+ we fastaem i stap wetem Papa, mo i kam long klia ples taem i kamtru long mifala).
3 Mifala i stap tokbaot man ya we mifala i luk fes blong hem mo mifala i harem voes blong hem.+ Mifala i mekem olsem blong yufala tu i save joen wetem mifala.* Mo yumi evriwan i save joen wetem Papa blong yumi mo Pikinini blong hem Jisas Kraes.+
4 Mo mifala i raetem tok ya i kam long yufala, blong bambae oltaem nomo yumi evriwan i save glad we i glad.
5 Tok ya we mifala i harem finis long hem, mo mifala i stap talemaot long yufala, i olsem: God hem i laet,+ mo i no gat tudak nating i stap long hem.*
6 Oraet, sipos yumi talem se: “Yumi joen gud wetem hem,” be long semtaem yumi stap gohed blong wokbaot long tudak, yumi stap giaman nomo mo yumi no folem trutok nating.+
7 Be sipos yumi stap wokbaot long laet olsem we God i stap long laet, bambae yumi evriwan i joen gud. Mo blad blong Jisas we i Pikinini blong hem, bambae i stap mekem yumi klin long olgeta sin blong yumi.+
8 Nao sipos yumi talem se: “Yumi no gat sin,” yumi stap giaman nomo long yumi,+ mo trutok i no stap long yumi.
9 Fasin blong God i stret mo yumi save trastem hem, taswe sipos yumi talemaot ol sin blong yumi, hem i save fogivim yumi, mo hem i save tekemaot ol fasin blong yumi we i no stret, i mekem yumi klin.+
10 Sipos yumi talem se: “Yumi neva mekem sin,” tok ya i olsem we yumi stap talem se God i stap giaman, mo tok blong hem i no stap nating long yumi.
Ol futnot
^ NT: “yufala tu i save kam patna blong mifala.”
^ NT: “i no gat tudak nating i joen wetem hem.”
