Seken Samuel 7:1-29
7 Taem king i stap gud long haos* blong hem,+ mo Jehova i mekem hem i spel long ol enemi we oli stap raonabaot long hem,
2 king i talem long profet ya Natan+ se: “Mi mi stap long wan haos we oli wokem long wud blong sida,+ be Bokis blong tru God i stap long medel blong tent we oli wokem long kaliko nomo.”+
3 Nao Natan i talem long king se: “Yu go mekem samting we i stap long hat blong yu, from we Jehova i stap wetem yu.”+
4 Be long sem naet ya, tok blong Jehova i kamtru long Natan se:
5 “Yu go talem long man blong wok blong mi Deved, se: ‘Hemia wanem we Jehova i talem: “?Bambae yu wokem wan haos blong mi stap long hem?+
6 Stat long dei we mi tekemaot ol man Isrel long Ijip kam kasem tede, mi mi no stap long wan haos,+ be mi stap long tent nomo mo long tabenakel*+ taem mi stap muv* i go olbaot.
7 Long olgeta taem we mi stap go wetem olgeta man Isrel, mo mi putumap ol lida blong ol traeb blong Isrel olsem ol man blong lukaot long sipsip, blong oli lukaot long ol man Isrel we oli ol man blong mi, mi mi neva talem long olgeta se: ‘?From wanem yufala i no bildim wan haos blong mi long wud blong sida?’”’
8 Naoia yu mas talem tok ya long man blong wok blong mi Deved, se: ‘Hemia tok we Jehova komanda blong ol ami i talem: “Taem yu yu stap lukaot long ol sipsip long ples we ol animol oli stap kakae gras long hem, mi mi tekemaot yu+ blong yu kam lida blong ol man blong mi, ol man Isrel.+
9 Mo bambae mi stap wetem yu long eni ples we yu go long hem,+ mo bambae mi kilim i ded evri enemi blong yu long fes blong yu,+ mo bambae mi mekem nem blong yu i go antap+ olsem nem blong ol haeman long wol.
10 Bambae mi jusumaot wan ples blong ol man blong mi, ol man Isrel, mo mi putum olgeta long hem, mo olgeta bambae oli stap gud long ples ya mo ol man bambae oli no hambag long olgeta. Nao ol man nogud bambae oli no moa mekem i strong long olgeta bakegen olsem we oli bin mekem bifo,+
11 stat long dei ya we mi putumap ol jaj+ blong oli lukaot long ol man blong mi, ol man Isrel. Mo bambae mi mekem yu spel long olgeta enemi blong yu.+
“‘“Mo tu Jehova i talem long yu se Jehova bambae i mekem wan haos* blong yu.+
12 Taem yu kasem en blong laef blong yu+ mo yu go spel wetem ol olfala blong yu, bambae mi putumap pikinini* blong yu, stret boe blong yu,* blong i king afta long yu, mo bambae mi mekem kingdom blong hem i stap strong.+
13 Hem nao bambae i bildim haos we i karem nem blong mi,+ mo bambae mi mekem jea blong king long kingdom blong hem i stap strong blong olwe.+
14 Bambae mi mi kam papa blong hem, mo hem bambae i kam boe blong mi.+ Taem hem i mekem mastik, bambae mi stretem hem wetem stik we ol man oli yusum mo wetem wip blong ol pikinini blong man.*+
15 Bambae mi lavem hem oltaem mo bambae mi no tekemaot lav ya long hem, olsem we mi bin tekemaot long Sol+ ya we mi aotem hem long fes blong yu.
16 Haos blong yu mo kingdom blong yu bambae i stap gud blong olwe. Mo jea blong yu blong king, bambae i stap strong blong olwe.”’”+
17 Nao Natan i talemaot long Deved olgeta tok ya mo ful vison ya we hem i luk.+
18 Nao Deved i kam mo i sidaon long fored blong Jehova, mo i se: “O Hae Masta Jehova, ?mi mi hu? Famle* blong mi i nating nomo be yu yu mekem plante samting blong mifala.+
19 O Hae Masta Jehova, ol samting ya oli plante tumas, be antap long hemia, yu talem se haos blong man blong wok blong yu bambae i stap blong longtaem. O Hae Masta Jehova, hemia loa* we yu givim long olgeta man.
20 O Hae Masta Jehova, yu yu savegud mi, taswe i no moa gat tok we man blong wok blong yu Deved i save talem.+
21 Yu yu mekem olgeta bigbigfala samting ya from tok blong yu mo from we hat blong yu i wantem,* mo yu soem ol samting ya long man blong wok blong yu.+
22 Hemia nao from wanem yu yu hae we yu hae,+ O Hae Masta Jehova. I no gat wan man we i olsem yu,+ mo yu wan nomo yu tru God,+ mo evri samting we mifala i harem oli pruvum samting ya.
23 Mo i no gat wan narafala nesen long wol ya we i olsem ol man blong yu, ol man Isrel.+ God i go mo i pemaot olgeta nao oli kam ol man blong hem.+ Mo hem i leftemap nem blong hem,+ taem hem i mekem ol bigbigfala samting blong sapraes blong givhan long olgeta.+ Yu ronemaot ol narafala nesen mo ol god blong olgeta long bihaf blong ol man blong yu, we yu wan yu pemaot olgeta long Ijip.
24 Yu jusumaot ol man Isrel se oli ol man blong yu blong olwe,+ mo yu, O Jehova, yu kam God blong olgeta.+
25 “Naoia, O Jehova God, yu mekem promes blong yu we yu bin mekem long man blong wok blong yu mo long famle blong hem i kamtru oltaem, mo i gud yu mekem stret olsem we yu promes blong mekem.+
26 I gud ol man oli leftemap nem blong yu blong olwe,+ nao oli save talem se: ‘Jehova komanda blong ol ami, hem nao i God blong ol man Isrel,’ mo i gud haos blong man blong wok blong yu Deved, i stap strong oltaem long fes blong yu.+
27 From we yu, Jehova komanda blong ol ami mo God blong ol man Isrel, yu bin talemaot long man blong wok blong yu se: ‘Bambae mi bildim wan haos* blong yu.’+ Hemia nao from wanem man blong wok blong yu i no fraet blong mekem prea ya long yu.
28 Mo naoia, O Hae Masta Jehova, yu nomo yu tru God mo ol tok blong yu oli tru,+ mo yu bin promes blong mekem ol gudfala samting ya long man blong wok blong yu.
29 Ale i gud yu glad blong blesem haos blong man blong wok blong yu, mo i gud haos ya i stap long fes blong yu blong olwe,+ from we yu, O Hae Masta Jehova, yu bin promes blong mekem olsem, nao from ol blesing ya, i gud yu blesem haos blong man blong wok blong yu blong olwe.”+
Ol futnot
^ NT: “pales.”
^ PT: “wokbaot.”
^ NT: “laen blong king.”
^ PT: “sid.”
^ PT: “wan we bambae i kamaot insaed long yu.”
^ MNT: “Adam.”
^ PT: “Haos.”
^ NT: “instraksen.”
^ NT: “i laenap wetem wil blong yu.”
^ NT: “laen blong king.”
