Jenesis 43:1-34
43 Nao hadtaem ya blong kasem kakae i kam strong tumas long kantri ya.+
2 Mo taem ol sid ya we oli tekem long Ijip i finis,+ papa blong olgeta i talem long olgeta se: “Yufala i gobak blong pem smol kakae blong yumi.”
3 Nao Juda i talem long hem se: “Man ya i talem klia long mifala se: ‘Mi no wantem luk fes blong yufala bakegen sipos brata blong yufala i no kam wetem yufala.’+
4 Sipos yu letem brata blong mifala i folem mifala, bambae mifala i godaon blong pem kakae blong yu.
5 Be sipos yu blokem hem, bambae mifala i no godaon, from we man ya i talem long mifala se: ‘Mi no wantem luk fes blong yufala bakegen sipos brata blong yufala i no kam wetem yufala.’”+
6 Nao Isrel+ i askem se: “?From wanem yufala i talem long man ya se yufala i gat wan narafala brata? !Yufala i spolem mi nomo!”
7 Nao oli ansa se: “Man ya i askem kwestin long saed blong mifala mo famle blong mifala, hem i askem stret long mifala se: ‘?Papa blong yufala i laef yet? ?Yufala i gat wan narafala brata?’ Mo mifala i talemaot evri samting long hem.+ Mifala i no save se bambae hem i talem long mifala se: ‘Yufala i go tekem brata blong yufala i kam.’”+
8 Nao Juda i talem long papa blong hem Isrel se: “Yu letem boe ya i kam wetem mi,+ nao bambae mifala i aot i go, olsem nao bambae yu wetem mifala, mo ol pikinini blong mifala, yumi laef be yumi no ded.+
9 Blong pruvum se boe ya bambae i stap sef, mi mi putum laef blong mi i stap long han blong yu.+ Sipos eni samting i hapen long hem, yu save panisim mi. Mo sipos mi no tekem hem i kambak long yu, hemia bambae i wan sin we mi mekem agens long yu blong olwe.
10 Mifala i sud aot longtaem finis, sipos mifala i bin go, ating mifala i mekem tu trip finis.”
11 Nao Isrel we i papa blong olgeta, i talem long olgeta se: “Sipos i mas olsem, ale yufala i fulumap ol nambawan samting blong kantri ya long ol bag blong yufala, mo yufala i tekem i go long man ya olsem wan presen.+ Yufala i tekem smol hani, pistasio, almon, smol blad blong ol tri ya balsam+ mo labdanum we i gat gudfala smel blong hem, mo skin blong ol tri we oli gudfala smel.+
12 Yufala i dabolem mane we bambae yufala i tekem, mo yufala i tekembak ol mane blong laswan trip ya we oli stap long maot blong ol bag blong yufala.+ Maet samting we oli mekem lastaem i wan mastik.
13 Yufala i tekem brata blong yufala, yufala i aot, mo yufala i gobak long man ya.
14 Prea blong mi se God Ya We i Gat Olgeta Paoa bambae i mekem man ya i sore long yufala, nao i letem Benjamin mo Simeon i go fri. !Be mi, sipos mi mas lusum ol pikinini blong mi, be bambae i mas olsem!”+
15 Nao ol man ya oli tekem ol presen ya, ol mane we oli dabolem, mo Benjamin, nao oli girap mo oli godaon long Ijip. Oli go stanap bakegen long fored blong Josef.+
16 Taem Josef i luk Benjamin wetem olgeta, kwiktaem nomo hem i talem long man we i bos long evri samting long haos blong hem, se: “Yu tekem ol man ya oli go long haos, yu kilim ol animol, mo yu kukum blong ol man ya oli kakae wetem mi long medel dei.”
17 Kwiktaem nomo man ya i mekem samting we Josef i talem,+ mo i tekem olgeta oli go long haos blong Josef.
18 Be taem man ya i tekem olgeta i go long haos blong Josef, olgeta oli fraet mo oli stap talem se: “Oli tekem yumi i kam long ples ya from mane we i stap insaed long bag blong yumi lastaem. !Naoia bambae oli atakem yumi, oli mekem yumi kam slef, mo oli tekemaot ol dongki blong yumi!”+
19 Nao oli kam klosap long man ya we i lukaot long evri samting long haos blong Josef, mo oli toktok long hem long fored blong haos ya.
20 Oli talem se: “!Sore masta blong mifala! Lastaem, mifala i kamdaon long ples ya blong pem kakae.+
21 Be taem mifala i gobak mo mifala i kasem ples we bambae mifala i slip long hem long naet, mo mifala i openem ol bag blong mifala, mifala i luk olgeta mane blong mifala long maot blong ol bag ya.+ Taswe mifala i wantem givimbak mane ya long yu.
22 Mifala i no save se hu i putum ol mane ya long ol bag blong mifala. Be mifala i gat sam moa mane blong pem kakae.”+
23 Nao man ya i talem se: “I oraet nomo. Yufala i no fraet. God blong yufala mo God blong papa blong yufala, hem nao i putum presen ya long ol bag blong yufala. Mi mi kasem mane ya fastaem nao biaen oli putum long ol bag blong yufala.” Biaen hem i tekem Simeon i kam long olgeta.+
24 Nao man ya i tekem olgeta oli go insaed long haos blong Josef mo i givim wota long olgeta blong oli wasem leg blong olgeta, biaen hem i givim kakae long ol dongki blong olgeta.
25 Mo oli harem nius se Josef bambae i kam kakae wetem olgeta long medel dei, nao oli rerem presen ya+ we oli karem i kam blong givim long hem.+
26 Taem Josef i kam insaed long haos, oli tekem presen blong hem i kam long hem, mo oli bodaon we fes blong olgeta i go long graon, blong ona long hem.+
27 Biaen long samting ya, hem i askem sipos oli oraet mo i talem se: “?Olsem wanem long olfala papa blong yufala we yufala i bin tokbaot hem? ?Hem i laef yet?”+
28 Nao oli ansa se: “Papa blong mifala we i man blong wok blong yu, hem i oraet mo i laef yet.” Biaen oli bodaon we fes blong olgeta i go long graon, blong ona long hem.+
29 Taem Josef i leftemap hed blong hem mo i luk brata blong hem Benjamin we i boe blong mama blong hem,+ hem i talem se: “?Hemia nao smol brata blong yufala we yufala i bin tokbaot hem long mi?”+ Mo hem i gohed i se: “Boe blong mi, prea blong mi se God bambae i blesem yu.”
30 Nao kwiktaem nomo Josef i goaot from we hem i wantem krae taem hem i luk brata blong hem, ale hem i go lukaot wan ples blong i krae. Nao hem i go insaed long wan rum we i no gat man long hem mo i krae.+
31 Biaen hem i mekem tingting blong hem i kam strong, nao i wasem fes blong hem mo i gobak long olgeta, mo hem i talem long ol man blong wok blong hem se: “Yufala i kasem kakae.”
32 Nao hem i sidaon long wan tebol mo oli kasem kakae blong hem. Mo oli kasem kakae blong ol brata blong hem we oli sidaon long wan narafala tebol. Mo ol man Ijip we oli stap wetem hem, oli kakae long wan narafala tebol bakegen, from we fasin ya blong kakae wanples wetem ol man Hibru, i wan samting we i nogud we i nogud long ae blong ol man Ijip.+
33 Ol brata blong hem oli sidaon folem yia blong olgeta stat long fasbon+ i go kasem lasbon, oli sidaon long fored blong Josef, mo oli sapraes tumas nao oli stap lukluk olgeta.
34 Mo Josef i gohed blong sanem ol kakae we i stap long tebol blong hem i go long tebol blong olgeta. Be kakae we hem i sanem i go long Benjamin i faef taem moa long kakae blong ol brata blong hem.+ Ale olgeta oli gohed blong kakae mo dring wetem hem kasem we oli fulap gud.
