Leta i go long Rom 2:1-29
2 Taswe O maefren, nating se yu yu wanem man,+ be yu no gat eskius sipos yu jajem narafala man, from we taem yu jajem narafala, tok ya blong yu i stap jajem yu bakegen from we yu tu yu stap mekem sem samting ya nomo.+
2 Yumi save se jajmen blong God i laenap wetem trutok, mo hem i jajem ol man we oli stap mekem ol fasin ya.
3 O Maefren, taem yu stap jajem olgeta we oli stap mekem ol fasin ya, be yu tu yu stap mekem ol fasin ya, ?yu ting se yu save ronwe long jajmen blong God?
4 God i kaen tumas,+ mo i no save kros kwik,+ mo tingting blong hem i longfala.+ ?Be olsem wanem? ?Maet yu yu ting nating long ol gudfala fasin ya blong hem, from we yu no save se hem i kaen long yu, mo i traem blong pulum yu blong yu tanem tingting blong yu?+
5 Yu yu stronghed mo yu no tanem tingting blong yu nating, taswe God i kros tumas long yu. Hem bambae i soemaot kros ya long dei blong jajem man, mo bambae hem i jajem ol man long stret fasin.+
6 Mo bambae hem i givim pei long evri man stret long ol wok we oli mekem:+
7 Bambae hem i givim laef we i no save finis long olgeta we oli traehad blong kasem glori, mo ona mo bodi we i no save kam roten samtaem,+ taem oli gohed blong mekem ol gudfala wok.
8 Be bambae hem i kros mo i panisim olgeta we oli stap raorao oltaem mo oli no obei long trutok, be oli stap obei long ol samting we i no stret.+
9 Ol man* we oli stap mekem ol samting we i nogud, bambae oli kasem trabol mo oli safa. Trabol ya bambae i kasem ol man Jiu fastaem, mo biaen ol man Gris.
10 Be ol man we oli stap mekem ol samting we i gud, God bambae i givim glori mo ona mo pis long olgeta. Bambae hem i givim long ol man Jiu fastaem,+ mo biaen long ol man Gris,+
11 from we God i stap mekem i sem mak nomo long olgeta man.+
12 Olgeta we oli no stap aninit long loa, bambae oli ded sipos oli mekem sin, nating se oli no gat loa.+ Be olgeta we oli stap aninit long loa, God bambae i yusum loa ya blong jajem olgeta sipos oli mekem sin.+
13 Ol man we oli stap harem loa, oli no stret man long fes blong God. Be ol man we oli stap mekem samting we loa i talem, God bambae i talemaot se oli stret man.+
14 Ol man blong ol nesen oli no gat loa,+ be taem oli folem tingting blong olgeta, oli stap mekem ol samting we i laenap wetem loa. Taswe, nating se ol man ya oli no gat loa, be oli gat wan samting we i olsem loa insaed long olgeta.
15 Olgeta nao oli stap soemaot se ol samting we loa ya i talem, God i bin raetem long hat blong olgeta. Mo tingting we i jajem olgeta i witnes blong olgeta, nao tingting blong olgeta i save talem se oli mekem i stret o oli mekem i no stret.
16 Samting ya bambae i hapen long dei ya we God bambae i yusum Kraes Jisas blong jajem ol samting we ol man oli stap mekem long fasin haed.+ Samting ya bambae i hapen folem gud nius we mi stap talemaot.
17 Yu we yu stap talem se yu wan man Jiu+ mo yu dipen long loa, mo yu flas se yu yu man blong God,
18 mo se yu save samting we God i wantem, mo se yu naf blong luksave ol samting we oli impoten from we oli tijim yu long Loa,*+
19 mo se yu bilif se yu save lidim ol blaenman, mo se yu yu laet blong olgeta we oli stap long tudak,
20 mo se yu save tijim olgeta we oli no gat hed, mo se yu yu wan tija blong ol smol pikinini, mo se yu save ol stamba save mo trutok we i stap long Loa,
21 yu stap tijim narafala man, ?be from wanem yu no tijim yu wan?+ Yu stap talem se: “Yu no mas stil,”+ ?be from wanem yu stap stil?
22 Yu stap talem se: “Yu no mas mekem adaltri,”*+ ?be from wanem yu mekem adaltri? Yu stap talem se yu no laekem nating ol aedol, ?be from wanem yu stap stilim ol samting long tempol blong ol aedol?
23 Yu stap flas from loa, ?be from wanem yu stap brekem Loa, nao yu spolem nem blong God?
24 Hemia i olsem we Baebol i talem, i se: “Ol man blong ol narafala nesen oli stap tok nogud long nem blong God, be i fol blong yufala nomo.”+
25 Fasin blong sakomsaes+ i save givhan nomo sipos yu stap mekem samting we loa i talem.+ Be sipos yu yu stap brekem loa, sakomsaes blong yu i blong nating nomo.
26 Sipos wan man i no sakomsaes+ be i stap folem ol samting we Loa i talem, God bambae i luk hem olsem we hem i sakomsaes.+
27 Taem man ya we i no sakomsaes i folem Loa, i olsem we hem i jajem yu se yu yu stap brekem loa, nating se yu yu sakomsaes mo yu gat loa ya we oli raetemdaon finis.
28 Samting we i mekem wan man i prapa man Jiu, hem i no samting we man i luk long ae blong hem+ mo i no from we man i sakomsaes long bodi.+
29 Hat blong man nao i mekem se hem i prapa man Jiu+ mo hem i sakomsaes long hat,+ mo spirit nao i mekem samting ya, be i no loa we oli raetemdaon finis.+ Man olsem, God nao i leftemap nem blong hem, be i no ol man.+
