HAF 9
Joen Blong Wosipim Jehova
‘God i mekem skae mo wol. Yufala i mas mekem wosip long hem.’—Revelesen 14:7
Taem yu stadi long buklet ya, yu luk plante advaes blong Baebol we oli save givhan long yu mo famle blong yu. Jehova i wantem se yufala i harem gud. Hem i promes se sipos yufala i obei long hem fastaem, bambae ‘hem i givim ol narafala samting ya tu long yufala.’ (Matiu 6:33) Hem i wantem se yufala i kam fren blong hem. Taswe, yufala i mas mekem bes blong yufala blong fren wetem hem. Hemia blesing we i bigwan moa long ol narafala blesing.—Matiu 22:37, 38.
1 YU MAS FREN GUD WETEM JEHOVA
?BAEBOL I TALEM WANEM? ‘Mi bambae mi Papa blong yufala, mo bambae yufala i boe mo gel blong mi. Mi mi Hae God, mo hemia tok blong mi.’ (2 Korin 6:18) God i wantem se yu kam wan gudfala fren blong hem. Prea i save givhan long yu blong yu mekem olsem. Jehova i talem se ‘oltaem yu mas prea.’ (1 Tesalonaeka 5:17) Hem i wantem tumas se yu talemaot ol tingting mo wari blong yu long hem. (Filipae 4:6) Sipos yu prea oltaem wetem famle blong yu, bambae oli luksave se yu yu fren gud wetem Jehova.
Taem yu prea, yu stap toktok long God. Be yu mas lesin long God tu. Blong mekem olsem, yu mas stadi Baebol mo ol buk we oli tokbaot Baebol. (Ol Sam 1:1, 2) Yu mas tingting dip long ol samting we yu lanem. (Ol Sam 77:11, 12) Taem yu joen long ol miting, long taem ya tu yu stap lesin long God.—Ol Sam 122:1-4.
Mo tu, yu fren gud wetem Jehova taem yu tokbaot hem long ol narafala. Moa we yu tokbaot Jehova, moa we yu kam klosap long hem.—Matiu 28:19, 20.
?YU SAVE MEKEM WANEM?
-
Yu makemaot taem evri dei blong ridim Baebol mo prea
-
Yu mekem se famle blong yu i putum wosip blong Jehova fastaem long spel mo pleplei
2 YUFALA I MAS LAEKEM FAMLE WOSIP
?BAEBOL I TALEM WANEM? “Yufala i mas stap klosap long God, nao hem bambae i kam stap klosap long yufala.” (Jemes 4:8) Yu mas mekem wan program blong famle wosip evri wik, mo yufala i mas folem gud. (Jenesis 18:19) Be yufala i mas fren gud wetem God evri dei, i no long taem blong famle wosip nomo. Yu mas tokbaot Jehova long famle blong yu taem ‘yufala i stap long haos, mo yufala i stap wokbaot, mo yufala i go slip, mo yufala i girap bakegen.’ Olsem nao, bambae yu givhan long olgeta blong oli fren moa wetem Jehova. (Dutronome 6:6, 7) Yu mas wantem blong mekem olsem Josua, we i talem se: ‘Mi wetem ol famle blong mi, bambae mifala i biaen long Jehova nomo.’—Josua 24:15.
?YU SAVE MEKEM WANEM?
-
Yu mas tingbaot nid blong evriwan long famle taem yu mekem program blong famle wosip, mo yu mas folem gud
