Jehova God i mekem fas mared. a Baebol i talem se Hem i mekem fas woman mo “i tekem hem i kam pas long man.” Adam i glad tumas nao i talem se: “Hemia nao prapa fren blong mi. Bun blong hem i kamaot long bun blong mi, mo bodi blong hem i kamaot long bodi blong mi.” (Jenesis 2:22, 23) Tede tu, Jehova i wantem se olgeta we oli mared oli mas glad.

Taem yu yu mared, maet yu ting se evri samting bambae i gud nomo. Be tingting ya i no tru, evri mared i gat trabol, nating se man mo woman i lavlavem tufala tumas. (1 Korin 7:28) Long buk ya, bambae yu luk ol advaes blong Baebol we i save givhan long mared blong yu mo famle blong yu.—Ol Sam 19:8-11.

?BAEBOL I TALEM WANEM? Man i hed blong famle.—Efesas 5:23.

Sipos yu wan man we i mared, Jehova i wantem se yu lukaotgud long woman blong yu. (1 Pita 3:7) Hem i mekem woman blong i fren blong yu, mo hem i wantem we yu gat bigfala respek long hem mo yu lavem hem. (Jenesis 2:18) Sipos yu lavem tumas woman blong yu, bambae yu no tingbaot yu wan, be yu tingbaot hem fastaem.—Efesas 5:25-29.

Sipos yu wan woman we i mared, Jehova i wantem se yu gat bigfala respek long man blong yu, mo yu givhan long hem. (1 Korin 11:3; Efesas 5:33) Yu mas sapotem ol desisen we hem i mekem, mo yu mas wok gud wetem hem. (Kolosi 3:18) Taem yu mekem olsem, man blong yu bambae i luk se yu naes moa, mo Jehova tu bambae i luk se yu naes.—1 Pita 3:1-6.

?YU SAVE MEKEM WANEM?

• Sipos yu wan man, yu askem long woman blong yu se: ?Mi mi save mekem wanem blong kam gud moa long wok we mi mas mekem long famle? Woman i save askem sem kwestin long man blong hem. Nao yu lesin gud long ansa blong hem, mo yu traehad blong mekem samting we hem i talem

• Yu mas gat longfala tingting. Bambae i tekem taem blong yutufala i save olsem wanem blong mekem yutufala i glad

?BAEBOL I TALEM WANEM? Man i mas tingbaot woman blong hem, mo woman tu i mas tingbaot man blong hem. (Filipae 2:3, 4) Jehova i wantem se yumi “mekem i gud long olgeta man.” Hemia i min se yu mas mekem i gud long man no woman blong yu tu. (2 Timoti 2:24) Mo yu mas tingting gud bifo we yu toktok. Baebol i talem se: “Ol tok nogud we man i sakem we i no tingbaot i save mekem narafala man i harem nogud, olsem we naef blong faet i stikim hem, be tok we i waes i save mekem man i harem gud bakegen.” (Ol Proveb 12:18) Tabu spirit blong Jehova bambae i givhan long yu blong yu toktok kaen mo yu soemaot se yu lavem hem.—Galesia 5:22, 23; Kolosi 4:6.

?YU SAVE MEKEM WANEM?

• Bifo we yutufala i tokbaot ol samting we i impoten, i gud yu prea blong tingting blong yu i stap kwaet mo i klia gud

• Yu tingting gud long toktok we bambae yu talem, mo long fasin blong talem

?BAEBOL I TALEM WANEM? Taem yutufala i mared, yutufala i kam “olsem wan bodi nomo.” (Matiu 19:5) Be maet ol tingting blong yutufala oli defdefren. Taswe yutufala i mas traehad blong yutufala i gat wan tingting nomo. (Filipae 2:2) Taem i gat wan desisen blong mekem, i impoten we yutufala i gat wan tingting nomo. Baebol i talem se: “Yu mas go sidaon wetem ol advaesa blong yu . . . nao biaen, bambae yu save win long evri samting.” (Ol Proveb 20:18) Yutufala i mas folem ol advaes blong Baebol taem yutufala i mekem ol bigfala desisen.—Ol Proveb 8:32, 33.

?YU SAVE MEKEM WANEM?

• Yu no talem nomo tingting blong yu mo givim save, be yu mas talemaot tu se yu harem olsem wanem

• Taem yu wantem mekem wan samting, yutufala i mas tokbaot fastaem