Taem yutufala i jes mared, bambae i gat defdefren trabol oli kamaot. Maet yutufala i no gat sem tingting long sam samting. Maet fasin blong yutufala blong mekem sam samting i defdefren. Maet trabol i kamaot from samting we i no joen wetem mared blong yutufala, no from samting we yutufala i no tingbaot.

Long taem olsem, i isi nomo blong yu lego trabol ya i stap from we yu no wantem luksave. Be Baebol i talem se yumi mas stretem ol trabol blong yumi. (Matiu 5:23, 24) Sipos yutufala i folem ol advaes blong Baebol, bambae yutufala i faenem rod we i beswan blong stretem ol problem.

?BAEBOL I TALEM WANEM? I gat ‘taem blong man i toktok.’ (Prija 3:1, 7) Yutufala i mas tekem taem blong tokbaot problem blong yutufala. Yu talemaot tingting blong yu long problem ya, mo yu talem se yu harem olsem wanem. Yu mas “tok tru” oltaem. (Efesas 4:25) Taem yu kros bitim mak, yu no mas sakem ol nogud toktok. Sipos yutufala i toktok kaen, wan smol trabol i no save kam wan bigfala rao.—Ol Proveb 15:4; 26:20.

Maet yutufala i no agri, be yutufala i mas gohed blong toktok kaen, mo lavlavem yutufala, mo soemaot respek long yutufala. (Kolosi 4:6) Yutufala i mas stretem trabol ya kwiktaem. Yutufala i no mas mekem fasin ya we yutufala i no moa toktok long yutufala.—Efesas 4:26.

?YU SAVE MEKEM WANEM?

• Yutufala i jusum wan stret taem blong tokbaot problem

• Taem narawan i toktok, yu lesin, yu no katem tok blong hem. Biaen nomo yu save toktok

?BAEBOL I TALEM WANEM? ‘Yufala i mas lavlavem yufala mo yufala i mas rere blong ona long yufala.’ (Rom 12:10) Taem yu stap lesin long man no woman blong yu, i impoten we yu traem kasem save long tingting blong hem. Blong mekem olsem, yu mas tingbaot hem ‘olsem wan brata no sista blong yu, mo yu mas gat tingting daon.’ (1 Pita 3:8; Jemes 1:19) Taem hem i stap toktok, yu no mas giaman nomo se yu stap lesin. I gud yu lego samting we yu stap mekem mo yu lesingud. Sipos yu no save mekem olsem, yu askem long hem blong yutufala i tokbaot afta. Sipos yu tingbaot se yutufala i olsem wan tim nomo, bambae yu no save “kros kwik.”—Prija 7:9.

?YU SAVE MEKEM WANEM?

• Maet yu no glad long samting we hem i talem, be yu no mas satem tingting blong yu, yu mas lesin nomo

• Yu mas kasem save from wanem nao hem i tok olsem. Yu traem kasem save samting we hem i soemaot long fes mo voes blong hem

?BAEBOL I TALEM WANEM? ‘Sipos man i stap wok had, bambae hem i stap win, be sipos hem i stap toktok nomo, bambae hem i kam puaman.’ (Ol Proveb 14:23) I no naf we yutufala i agri nomo long wan rod blong stretem problem, yutufala i mas folem tu. Yutufala i mas traehad, nao had wok blong yutufala bambae i gat gudfala frut. (Ol Proveb 10:4) Sipos yutufala i wok olsem wan tim, yutufala i save win. Taem tu man i wok wanples, “wok i save gohed gud moa.”—Prija 4:9.

?YU SAVE MEKEM WANEM?

• Yutufala i tokbaot mo agri long samting we yutufala i save mekem blong winim problem

• Wanwan taem, yutufala i tokbaot bakegen se yutufala i stap winim problem ya no nogat