HAF 14
?God i Hivimap Wan Kampani Blong Man Blong i Mekem Wanem?
1. ?God i jusumaot ol man Isrel blong oli mekem wanem?
God i mekem olgeta we oli kamaot biaen long Ebraham oli kam wan neson, mo hem i givim ol loa long olgeta. Hem i singaot neson ya se “Isrel.” Neson ya nomo i mekem wosip long tru God mo i holem tok blong God. (Ol Sam 147:19, 20) Taswe, ol man blong olgeta kantri oli save kasem blesing from ol man Isrel.—Ridim Ol Wok 3:25.
God i jusumaot ol man Isrel blong oli kam ol witnes blong hem. Taem oli obei long ol loa blong God, ol loa ya oli givhan long olgeta. (Dutronome 4:6) Taswe, sipos ol man oli lukluk ol man Isrel, oli save lanem plante samting. Long rod ya, oli kasem save moa long God ya we i tru.—Ridim Aesea 43:10, 12.
2. ?Ol tru Kristin oli wok wanples blong mekem wanem?
Ol man Isrel oli no moa obei long Jehova, ale Jehova i no moa glad long olgeta. Hem i hivimap wan kampani blong ol Kristin blong oli tekem ples blong neson blong Isrel. (Matiu 21:43; 23:37, 38) Bifo, ol man Isrel oli witnes blong Jehova. Be naoia, ol tru Kristin oli witnes blong Jehova.—Ridim Ol Wok 15:14, 17.
Jisas i sanemaot ol man blong hem blong oli prij, mo blong oli pulum ol man blong olgeta kantri oli kam man blong hem. (Matiu 10:7, 11; 24:14; 28:19, 20) Naoia we yumi stap klosap long en blong ol rabis fasin blong wol, wok blong prij i kasem fulmak blong hem. Neva i gat wan taem bifo, we Jehova i pulum plante milian man blong olgeta kantri oli joen blong mekem tru wosip. (Revelesen 7:9, 10) Ol tru Kristin oli joen olsem wan kampani nomo blong oli lefleftemap tingting blong olgeta, mo blong oli givgivhan long olgeta. Long olgeta kantri blong wol, ol tru Kristin oli mekem ol miting blong kasem tijing blong Baebol, mo program we oli folem i sem mak long evri ples.—Ridim Hibrus 10:24, 25.
3. Long taem blong yumi, ?ol Witnes blong Jehova oli stat olsem wanem?
Long ol yia 1870, wan smol grup blong ol Baebol studen i stadi blong faenemaot ol trutok blong Baebol we ol man oli lusum longtaem finis. Ol Baebol studen ya oli save se Jisas i sanemaot ol Kristin long taem bifo, blong oli prij. Taswe, oli statem wok ya blong talemaot gud nius blong Kingdom long olgeta ples long wol. Long yia 1931, oli tekem nem ya ol Witnes blong Jehova.—Ridim Ol Wok 1:8; 2:1, 4, 11; 5:42.
4. ?Jehova i stap lidim ol Witnes blong hem olsem wanem?
Long taem bifo, i gat wan grup blong ol elda we i lukaot long wok blong ol Kristin long plante kantri. Ol elda ya oli luksave Jisas olsem Hed blong olgeta. (Ol Wok 16:4, 5) Long taem blong yumi, i gat ol elda we oli wok olsem Hed Kampani blong ol Witnes blong Jehova. Hed Kampani i lukaot long wok we i stap gohed long hed ofis blong ol Witnes long ol defren kantri. Ol man mo woman we oli wok long ol hed ofis ya, oli tanem ol buk i go long bitim 600 lanwis. Biaen oli printim ol buk ya mo oli sanem olgeta i go long ol defdefren ples. Olsem nao, Hed Kampani i givimaot ol save blong Baebol, blong lidim ol Kristin long bitim 100,000 kongregesen long wol, mo blong leftemap tingting blong olgeta. Long evri kongregesen, i gat ol elda. Oli lavem ol sipsip blong God mo oli lukaot gud long olgeta.—Ridim 1 Pita 5:2, 3.
Ol Witnes blong Jehova oli wok wanples blong talemaot gud nius, mo blong pulum ol man oli kam man blong Jisas. Olsem ol aposol bifo, oli prij long ol man long ol haos blong olgeta. (Ol Wok 20:20) Oli glad blong stadi Baebol wetem ol man we oli wantem save trutok. Ol Witnes blong Jehova oli moa long wan kampani blong man. Olgeta oli olsem wan famle we Jehova nao i Papa blong olgeta, mo hem i lavem olgeta. Oli ol brata mo sista we oli lavlavem olgeta. (2 Tesalonaeka 1:3) Olgeta oli wantem mekem God i glad mo oli wantem givhan long ol narafala. Taswe, bigfala famle blong ol Witnes i glad moa i winim ol narafala famle long wol.—Ridim Ol Sam 33:12; Ol Wok 20:35.
