?Baebol i Save Halpem Yu Blong Winim Fasin Ya Blong Tekem Drag?

PLEI

Evri yia, plante milian man oli ded from ol drag. Long COVID-19 pandemik, problem ya i kam antap moa. Waes advaes blong Baebol i givhan long plante blong oli winim fasin ya blong tekem drag. Sipos yu tu yu gat problem ya, waes advaes blong Baebol i save halpem yu. a

Long atikol ya

?From wanem i gud blong folem advaes blong Baebol blong winim wan fasin we yu yu slef blong hem?

Ol man blong mekem risej oli faenemaot se plante man oli tekem drag from we oli harem se oli no gat fren, oli stres, oli wari, o tingting blong olgeta i foldaon. Baebol i save halpem yu blong wokem bilif we yu nidim, blong winim samting we i pulum yu blong tekem drag. Baebol i tijim yumi olsem wanem blong fren gud wetem God. (Ol Sam 25:14) Hem i save halpem yu blong winim ol problem we maet yu no naf blong winim yu wan.—Mak 11:22-24.

Fo advaes we Baebol i givim

1. Kasem save gud long Jehova God. b (Jon 17:3) Jehova i Krieta, mo hem i Stamba blong paoa we i no save finis. Antap long hemia, hem i Papa blong yu long heven, we i lavem yu. Hem i wantem fren gud wetem yu mo yusum paoa blong hem blong halpem yu. (Aesea 40:29-31; Jemes 4:8) Hem i promes blong givim wan nambawan fiuja long yu, sipos yu akseptem lav blong hem.—Jeremaea 29:11; Jon 3:16.
2. Askem long Jehova blong i halpem yu. Prea long God mo askem long hem blong i halpem yu blong winim fasin ya we yu kam slef blong ol drag. Olsem nao, bambae yu kam “tabu [o klin],” mo “God i glad” long yu. (Rom 12:1) Bambae hem i yusum tabu spirit, o paoa blong hem, blong givim “paoa ya we i bigwan bitim mak.” (2 Korin 4:7; Luk 11:13) Paoa ya bambae i halpem yu blong yu no moa slef blong ol drag, mo yu wokem “niufala fasin” we God i glad long hem.—Kolosi 3:9, 10.
3. Putum ol tingting blong God long maen blong yu. (Aesea 55:9) God bambae i halpem yu ‘blong mekem paoa we i stap pusum tingting blong yu, i kam niuwan.’ Hemia i min se bambae yu jenisim tingting blong yu fulwan, nao yu naf blong lego ol drag. (Efesas 4:23) Ol tingting blong God oli stap long Baebol, taswe i impoten blong ridim Baebol evri dei. (Ol Sam 1:1-3) Plante oli askem help blong kasem save long ol tijing blong Baebol. (Ol Wok 8:30, 31) Ol Witnes blong Jehova oli givim wan fri Baebol kos. Mo tu, mifala i singaot yu blong kam long ol miting blong mifala. Long ples ya, mifala i stadi Baebol mo tokbaot olsem wanem blong folem ol tijing blong hem long laef blong mifala.
4. Jusum ol gudfala fren. Ol fren oli save mekem i isi moa o i had moa, blong yu winim faet blong yu blong lego ol drag. (Ol Proveb 13:20) God i save givim ol gudfala fren we oli wosipim hem, mo hem i wantem se yu letem olgeta oli halpem yu. (Ol Sam 119:63; Rom 1:12) Jusum gud ol samting we yu mekem blong spel, from we i olsem se yu stap spenem taem wetem olgeta we yu wajem, o lesin long olgeta, o olgeta long buk we yu ridim. Blokem eni samting we i save mekem i had blong folem stret rod.—Ol Sam 101:3; Amos 5:14.

Sam vas blong Baebol we oli save givhan long yu

Ol Sam 27:10: “Nating sipos papa mo mama blong mi i lego mi, Jehova bambae i tekem mi, i lukaot long mi.”

“Mi neva save stret papa blong mi, mo from samting ya, mi filim se mi no gat wan risen blong laef. Taem mi save Jehova God olsem wan trufala Man we i lavem mi, laef blong mi i gat mining, mo mi naf blong winim ol drag.”—Wilby, blong Haiti.

Ol Sam 50:15: “Yu singaot long mi long taem blong trabol. Bambae mi tekemaot yu.”

“Plante taem, vas ya i givim paoa long mi blong gohed blong traehad, nating se samtaem mi foldaon bakegen. Jehova i holem promes blong hem.”—Serhiy, blong Yukren.

Ol Proveb 3:5, 6: “Yu mas trastem Jehova long fulhat blong yu, mo yu no mas dipen long prapa save blong yu. Long olgeta samting we yu mekem, yu mas tingbaot hem, nao hem bambae i mekem ol rod blong yu oli stret.”

“Ol vas ya oli halpem mi blong mi no trastem mi wan, be mi trastem Jehova. Long paoa blong hem, mi mi naf blong jenisim laef blong mi.”—Michele, blong Itali.

Aesea 41:10: “Yu no mas fraet, from we mi mi stap wetem yu. Yu no mas wari, from we mi mi God blong yu. Bambae mi mekem yu yu strong, yes, bambae mi halpem yu, bambae mi holemtaet yu long raethan blong mi we i blong stret fasin.”

“Taem mi no moa gat ol drag blong tekem, mi harem se mi stres bitim mak. Vas ya i mekem mi mi bilif se God bambae i halpem mi blong winim stres ya, mo i tru se hem i halpem mi bigwan.”—Andy, blong Saot Afrika.

1 Korin 15:33: “Yufala i no mas letem ol narafala oli lidim yufala i go krangke. Ol rabis fren oli save spolem ol gudfala fasin.”

“Ol rabis fren oli givim drag long mi, mo sloslo mi kam wan slef blong ol drag ya. Taem mi lego ol rabis fren ya mo mi fren wetem olgeta we oli laekem ol klin fasin blong laef, long taem ya nomo mi mi naf blong lego ol drag.”—Isaac, blong Kenia.

2 Korin 7:1: “Yumi mas wasemaot ol samting we oli mekem bodi mo tingting blong yumi i kam doti.”

“Ol tok ya i pulum mi blong gohed blong traehad blong mekem laef mo bodi blong mi i klin, mo lego ol samting we oli stap spolem mi.”—Rosa, blong Kolombia.

Filipae 4:13: “Mi mi gat paoa blong fesem olgeta samting from God ya we i givim paoa long mi.”

“Mi save se mi no strong inaf mi wan, blong lego ol drag, ale mi prea long God blong i halpem mi. Hem i givim paoa we mi nidim.”—Patrizia, blong Itali.

Sam moa laef stori: Baebol i halpem olgeta blong winim wan fasin we oli slef blong hem

Joseph Ehrenbogen i luk plante raf fasin taem hem i stap gruap, mo hem i stat blong dring bitim mak, smok, mo tekem ol drag ya maruana mo heroin. Klosap hem i ded plante taem, from we hem i tekem tumas drag. Wan vas blong Baebol i mekem hem i bilif se hem i naf blong jenis. Ridim stori blong hem long haf ya “Naoia Mi Respektem Ol Woman Mo Mi Wan.”

Dmitry Korshunov i traehad blong lego alkol, be plante taem hem i foldaon bakegen. Wajem video ya “Mi No Glad Long Laef Blong Mi” blong luk wanem i givhan long hem blong winim fasin blong dring bitim mak.

Sore, media player i no wok.Daonlodem Video Ya

?Baebol i talem se i nogud blong folem tritmen we dokta i givim blong winim fasin we yumi slef blong hem?

Nogat. Baebol i talem se: “Ol man we oli no sik, oli no nidim dokta, be olgeta we oli sik, yes, oli nidim.” (Matiu 9:12) Mo tu, U.S. National Institute on Drug Abuse i talem se: “Taem wan man i slef blong ol drag, hemia wan strong sik, mo i no naf we hem i wantem blong lego, mo we hem i strong long hem wan, hem i nidim moa.” Help we God i givim i strong moa i bitim tingting blong man. Nating se i olsem, plante we oli folem advaes blong Baebol blong lego ol drag oli nidim tritmen blong dokta tu. c Tingbaot wan man we nem blong hem Allen. Hem i talem se: “Taem mi stap traem blong lego alkol, bodi blong mi i soa bitim mak from mi wantem tumas blong dring bakegen. Long taem ya, mi luksave se mi mas kasem tritmen blong dokta tu, antap long help we mi stap kasem from ol advaes blong Baebol.”

?Baebol i talem se yumi no mas tekem drag we dokta i givim olsem meresin?

Nogat. Blong talem stret, Baebol i talem se i oraet blong givim alkol long olgeta we oli sik o klosap oli ded, blong oli no harem i soa tumas. (Ol Proveb 31:6; 1 Timoti 5:23) Be man i save kam slef blong alkol, mo i sem mak long saed blong ol drag blong kilim soa long bodi. Taswe, i waes blong luksave denja mo lukaot gud taem yumi yusum ol drag we dokta i givim.—Ol Proveb 22:3.

a Haf ya i tokbaot moa ol drag, be ol advaes ya blong Baebol i save givhan tu long olgeta we oli stap traehad blong winim ol narafala fasin we oli kam slef blong olgeta, olsem alkol, tabak, kakae, plei laki, ponografi, o sosol media.

b Jehova i prapa nem blong God. (Ol Sam 83:18) Luk haf ya “?Hu Ya Jehova?”

c I gat plante klinik, hospital, mo ol defdefren program blong givhan long man blong i winim problem ya. Wanwan man i mas tingting gud long olgeta, mo mekem desisen se weswan i moa gud long hem.—Ol Proveb 14:15.