Ston ya we i gat ol pija raeting i hae kasem eit meta mo i stap klosap long wan doa we i go insaed long olfala tempol blong god ya Amun long Karnak, Ijip. Ol man blong stadi dip, oli talem se ston ya i tokbaot ol faet blong Fero Sisak we i winim agensem ol ples long not is blong Ijip, we insaed i gat Juda mo Noten Kingdom blong Isrel.

 Ston ya i soem we Amun i stap givim bitim 150 prisena we oli fasem olgeta i go long Sisak o Sesang a. Wanwan prisena i representem wan long ol taon o ol pipol we hem i winim. Nem blong ol taon ya i stap insaed long sekol we oli makem long bodi blong wanwan prisena. Oli save ridim klia yet sam long ol nem ya, we samfala Baebol i tokbaot olgeta tu. Olsem, Betsan, Gibeon, Megido, mo Sunem.

 Baebol i tokbaot faet we Ijip i mekem agens long Juda. Mo tu, Baebol i talemaot klia wanem samting Sisak i yusum. (1 King 14:25, 26) Blong talem stret, Baebol i tokbaot stret ol samting we Sisak i mekem, i se: “Long namba faef yia blong hem. . . . King Sisak blong Ijip i gat twelef handred kat blong faet blong hem, mo sikisti taosen soldia, blong hem we oli ron long hos, mo ol narafala soldia we oli plante we plante . . . Hem i stap mekem faet long ol taon ya long Juda . . . i stap winim olgeta, i stap holem olgeta, gogo i kam kasem Jerusalem.” 2 Kronikel 12:2-4

 Be tu, oli faenem wan narafala olfala samting blong bifo we i soem klia se Sisak i bin mekem faet long kantri blong Isrel. Long ples we Megido blong Baebol i bin stap long hem, oli faenem wan smol haf blong wan impoten ston, mo nem ya “Sesang” i stap long hem.

 Stret rikod blong Baebol we i soem se Sisak i winim Juda i wan eksampol we i soem se ol man blong raetem Baebol oli tok tru. Oli talem stret ol faet we kantri blong olgeta i winim mo we i lusum. Plante man blong raetem histri oli no mekem olsem.