TAEM krokodael i kakae wan samting, hem i gat moa paoa long maot blong hem i bitim ol narafala anamol we oli laef naoia. Yu traem tingbaot krokodael we i stap long solwota klosap long Ostrelia. Maot blong hem i tri taem moa strong i bitim maot blong laeon mo taega. Nating se i olsem, krokodael i haremsave kwiktaem nomo samting we i tajem maot blong hem. Hem i haremsave kwik moa i bitim man we i tajem samting wetem fingga blong hem. From we skin blong krokodael i strong tumas, ?olsem wanem hem i haremsave kwiktaem?

I gat plante taosen smosmol string we oli stap long maot blong krokodael. Man ya, Duncan Leitch, i stadi long samting ya, nao i talem se: “Ol string ya oli kamaot long ol smosmol hol long bun blong hed.” Samting ya i protektem ol string ya, mo i mekem se krokodael i haremsave enikaen smosmol samting we i tajem maot blong hem. From samting ya, hem i haremsave kwiktaem sipos i gat kakae no doti long maot blong hem. Ol saentis oli no naf blong eksplenem samting ya fulwan. Mo tu, fasin ya blong krokodael i mekem se, mama krokodael i save karem pikinini blong hem long maot blong hem be i no skwisim hem tumas. Yumi sapraes se maot blong krokodael i strong we i strong, be i save haremsave samting kwiktaem nomo.

?Wanem tingting blong yu? ?Maot blong krokodael i kamaot olsem nomo, no i gat wan Man we i wokem?