Samtaem, ol man blong digim graon oli faenem sam samting we i pruvum se sam man we Baebol i tokbaot olgeta, oli bin laef bifo. Wan samting olsem i hapen long yia 2011. Sam man blong stadi long Isrel, oli tokbaot wan bokis we ol man blong digim graon oli faenem. Bokis ya i blong 2,000 yia bifo, ol man oli wokem long laem ston mo oli flasem gud. Sam man oli putum ol bun blong wan dedman insaed long bokis ya, afta we bodi blong hem i roten.

Nem we i stap long bokis ya i talem se: “Miriam gel blong Yeshua boe blong Kaeafas, pris blong Mahasia blong Beth ʹImri.” Wan hae pris we nem blong hem Kaeafas, i bin joen wetem ol man we oli jajem Jisas long kot mo we oli kilim hem i ded. (Jon 11:48-50) Flavius Josephus, wan man blong raetem histri, i tokbaot hae pris ya se hem i “Josef, we ol man oli stap singaot hem se Kaeafas.” I luk olsem se bokis ya i blong wan famle blong hem. Bifo long taem ya, ol man blong digim graon oli bin faenem wan bokis blong bun olsem, we oli ting se i blong hae pris ya. Long bokis ya, i gat nem ya: “Yehosef bar Caiapha,” no Josef boe blong Kaeafas. * From samting ya, maet Miriam i famle blong Kaeafas.

Wan ofis long Isrel, we nem blong hem Israel Antiquities Authority (IAA), i talem se oli bin tekemaot bokis blong ol bun blong Miriam, long sam man we oli bin stilim ol samting long wan olfala beregraon blong ol man bifo. Taem oli stadi gud long bokis ya mo long nem we i stap long hem, oli luk se i tru, bokis ya i blong 2,000 yia bifo.

Bokis ya i soemaot wan niufala samting long yumi. Hem i tokbaot man ya “Mahasia,” we grup blong hem i laswan blong ol 24 grup blong ol pris we oli stap mekem wok long haos blong God, long Jerusalem. (1 Kron. 24:18) Ofis blong IAA, i talem se nem we i stap long bokis ya, i soemaot se “famle blong Kaeafas i joen long grup blong pris ya Mahasia.”

Mo tu, nem we i stap long bokis ya, i tokbaot Beth ʹImri. Ofis blong IAA i talem se nem ya i save minim tu samting: “Faswan se, maet toktok ya Beth ʹImri, hem i nem blong wan laen blong ol pris. Hemia ol pikinini blong Hime. (Esra 2:36-37; Nehemaea 7:39-42) Maet ol bubu blong hem oli stap insaed long grup blong pris ya Mahasia. Nambatu se, maet toktok ya Beth ʹImri, hem i nem blong ples we Miriam i bon long hem, no i nem blong ples blong ful famle blong hem.” Nomata se i olsem wanem, be bokis blong ol bun blong Miriam, i pruvum se Baebol i tru taem i tokbaot ol man mo famle blong olgeta.