God i mekem bodi blong yumi long fasin we i save kam gud hem wan. Taem yumi katem, stikim, o skrasem skin blong yumi, “bodi i mekem wan wok we yumi no kasem save long hem, blong mekem soa i kam gud bakegen, nating se i bigwan o i smol.” (Johns Hopkins Medicine) Kwiktaem nomo bodi i stopem blad, i mekem soa i kam gud, mo skin i kam strong.

TINGBAOT: Sipos God i wokem bodi blong i mekem ol soa oli kam gud bakegen, yumi save trastem promes blong hem se ol filing blong yumi tu bambae oli kam gud bakegen. Ol Sam i talem se: “Hem i stap mekem olgeta we oli harem nogud, oli harem gud bakegen, mo i stap fasem ol soa blong olgeta.” (Ol Sam 147:3) Be sipos yu stap harem nogud from wan samting we i hapen long yu bifo, o i stap hapen naoia, ?olsem wanem yu save sua se bambae Jehova i fasem ol soa blong yu, mo i mekem yu yu harem gud bakegen naoia mo long fiuja?

God i promes se: “!Yufala i no fraet! !Mi mi stap wetem yufala! !Mi mi God blong yufala! !Yufala i no seksek! !Mi bambae mi mekem yufala i strong! !Mi bambae mi givhan long yufala!” (Aesea 41:10) Man we i save se Jehova i stap kea long hem, hem i gat paoa blong stanap strong taem i kasem trabol, mo i gat pis long tingting. Pol i talem se hemia “pis ya blong God we i bigwan tumas i bitim olgeta save blong yumi.” Hem i gohed se: “Mi mi gat paoa blong fesem olgeta samting from God ya we i givim paoa long mi.”—Filipae 4:4-7, 9, 13.

Baebol i givhan blong mekem bilif blong yumi i strong long ol promes blong Jehova long fiuja. Traem tingbaot: Revelesen 21:4, 5 i talem samting we God bambae i mekem, mo from wanem yumi save trastem hem:

• “Hem bambae i ravemaot wota blong ae blong olgeta.” Jehova bambae i finisim evri trabol we i mekem yu yu safa mo wari, nating se long tingting blong ol narafala man ol trabol ya oli smol nomo.

• King ya we i stap “sidaon long bigfala jea” long heven bambae i yusum paoa blong hem blong blokem ol trabol we oli mekem yu yu safa, mo blong givhan long yu.

• Jehova i yusum nem blong hem blong mekem tok blong hem i strong, se ol promes ya “oli tru mo ol man oli save trastem.”

‘Hem bambae i ravemaot wota blong ae blong olgeta, i no moa gat man i ded, man i no moa krae, mo man i no moa harem nogud long bodi blong hem. Ol samting ya blong bifo oli lus olgeta. Nao Man ya we i sidaon long bigfala jea blong king, i talem se: “!Yu luk! Mi mi stap mekem olgeta samting oli kam niuwan. Yu raetemdaon ol tok ya from we oli tru mo ol man oli save trastem.”’—Revelesen 21:4, 5.

Ol samting we God i wokem raonabaot long yumi mo Baebol tu, oli soemaot ol nambawan fasin blong Papa blong yumi long heven. Ol samting we God i wokem oli pulum yumi blong yumi wantem save hem olsem wan gudfala fren. Baebol i askem long yumi stret, blong yumi kam ‘klosap long God, nao hem bambae i kam klosap long yumi.’ (Jemes 4:8) Ol Wok 17:27 i talem se: “God ya i no stap longwe nating long yumi evriwan.”

Sipos yu tekem taem blong save God moa, bambae yu trastem moa tok ya we i talem se ‘hem i stap tingbaot yu.’ (1 Pita 5:7) ?Olsem wanem samting ya i save givhan long yu?

Traem tingbaot wan man Japan we nem blong hem Toru. Mama blong hem i wan Kristin, be Toru i go joen long wan rabis grup blong ol man ples blong hem we oli singaot olgeta se yakuza. Hem i talem se: “Mi harem se God i no laekem mi nating, mo taem olgeta we mi lavem tumas oli ded, mi harem se God i stap panisim mi.” Toru i luksave se nogud tingting ya mo ol rabis fren oli mekem se hem i “no gat sore mo i no kea.” Hem i tokbaot tingting we hem i gat long taem ya, i se: “Mi wantem ded taem mi yang nomo, be fastaem mi wantem  kilim i ded wan man we i hae moa long mi, blong ol man oli save nem blong mi.”

Afta, Toru mo waef blong hem Hana i stadi Baebol, nao Toru i mekem sam bigfala jenis long laef blong hem. Hana i talem se: “Mi luk stret long ae blong mi se hasban blong mi i stap jenis.” Naoia, Toru i talem se: “I gat wan God we i kea long yumi wanwan. Hem i no wantem se wan man i ded, mo hem i glad blong fogivim ol man we oli tanem tingting blong olgeta. Taem yumi talem wan samting long hem we yumi no save talem long wan narafala man, hem i lesin mo i kasem save. Klosap nao, Jehova bambae i finisim ol trabol we i mekem yumi safa mo harem nogud long bodi mo tingting. Tede, hem i givhan long yumi long plante rod we yumi no tingbaot. Hem i kea long yumi mo i leftemap tingting taem yumi harem nogud.”—Ol Sam 136:23.

Olsem stori blong Toru i soemaot, taem yumi save se God i gat paoa, mo bambae hem i finisim ded mo ravemaot wota blong ae blong ol man, hemia i givim wan strong hop blong fiuja, mo tu, i mekem laef blong yumi tede i kam gud moa. Nating se wol i fulap long trabol mo ol man oli safa, be yu save kasem blesing from we God i kea long yu.