Long nekis yia blong hem, oli anaonsem long Betel famle se oli nidim sam volontia blong go long Saot Afrika branj, blong setemap niufala masin blong printing. Mi putum nem blong mi, mo mi glad tumas taem oli jusum mi blong go. Oli jusum tri narafala brata long Betel blong Kanada, hemia Dennis Leech, Bill McLellan, mo Ken Nordin. !Oli talem se oli pem tikit blong mifala blong go nomo!

Mi kolem mama blong mi mo mi se: “!Mama, mi gat wan nius blong yu, bae mi go long Saot Afrika!” Mama blong mi i no wan woman blong toktok, be hem i gat strong bilif mo hem i frengud wetem Jehova. Hem i no talem tumas samting, be mi save se hem i sapotem mi. Papa mo mama blong mi oli neva agensem desisen we mi mekem, be oli harem nogud from we bambae mi go longwe long olgeta.

Fastaem, mifala i go long Brooklyn Betel, we blong tri manis mifala i kasem trening blong yusum wan kaen printing masin. Biaen mifala i tekem sip blong go long Cape Taon, long Saot Afrika. Long taem ya mi jes gat 20 yia. Taem mifala i tekem tren long Cape Taon blong go long Johannesburg, san i godaon finis. Long eli moning, mifala i stop long wan smol taon long Karoo, wan ples we i drae lelebet. I gat plante das, smok, mo i hot. Mifala i lukluk tru long windo mo mifala i stap tingting se wanem kaen ples ya. Mo mifala i wari se niufala asaenmen blong mifala bambae i olsem wanem. Plante yia biaen, taem mifala i kambak long eria ya bakegen, mifala i luksave se ol smol taon ya oli naes mo oli kwaet.

Blong plante yia mi wok long Linotype masin we i rerem ol laen blong printim ol toktok long Wajtaoa mo Wekap! Wok ya i nambawan, be i had lelebet. Branj ofis i printim plante magasin long ol lanwis blong Afrika, i no jes Saot Afrika, be plante narafala kantri long Afrika. !Mifala i glad tumas se niufala masin ya blong printing we mifala i aot long Kanada blong kam wok long hem, i mekem bigfala wok!

Samtaem biaen, mi go wok long Faktri Ofis we i lukaot long ol defren wok blong printing mo shiping mo translesen wok. Laef blong mi i bisi, be mi glad.

Long 1968, mi maredem Laura Bowen we i laef klosap long Betel. Hem i wan paenia mo tu hem i wok long Betel long Translesen Dipatmen. Long taem ya, olgeta we oli jes mared oli no save stap long Betel, taswe Branj i askem long mitufala blong mekem spesel paenia. Mi mi wari lelebet. Blong ten yia we mi stap long Betel, mi no nid blong wari from kakae mo ples blong slip. Be naoia mi stap tingting se, ?bambae mi naf blong pem evri samting we mifala i nidim wetem smol mane we mitufala i kasem long wok blong spesel paenia? Mitufala i kasem 25 rand (we long taem ya hem i $35, U.S.) evri manis, sipos mitufala i kasem stret namba blong aoa, visit, mo buk. Mitufala i yusum mane ya blong pem rent, kakae, transpot, meresin, mo ol narafala samting.

Oli sanem mitufala blong go paenia long wan smol taon blong Durban, long Indian Osen. Long ples ya i gat plante man India, we oli kamaot long laen blong ol man India we oli kam wok long faktri blong suga long Saot Afrika, samwe long yia 1875. Naoia oli mekem ol defdefren wok, be oli holemtaet yet kastom mo stael kakae blong olgeta, olsem kari. Mo oli toktok Inglis, so i isi blong prij long olgeta.

Ol spesel paenia oli mas spenem 150 aoa evri manis long wok blong prij, so mi mo Laura i mekem plan se long faswan dei bambae mifala i spenem sikis aoa. Ples i hot we i hot. Mitufala i no gat eni visit o Baebol stadi, so mitufala i mas spenem sikis aoa blong prij long ol haos wanwan. !Afta we mitufala i mekem sam doa, mi jekem waj blong mi be i jes 40 minit nomo i pas! Nao mi stap tingting se ?olsem wanem nao mitufala i naf blong mekem spesel paenia?

Sloslo, mitufala i stat blong mekem wan gudfala plan. Evri dei mitufala i rerem sanwij mo putum sup o kofi long wan temos. Taem mitufala i nidim blong spel smol, mitufala i putum trak aninit long wan tri. Samtaem i gat ol naesfala smol pikinini blong India we oli kam stanap blong lukluk mitufala from we mitufala i defren. Sam dei biaen, mitufala i makem se taem mitufala i prij blong tutri aoa, dei i pas kwik nomo.

!I naes tumas blong talemaot trutok long teritori ya we ol man oli glad blong welkamem yu! Mifala i makem se ol man India oli gat respek, oli kaen, mo oli lavem God. Plante Hindu oli akseptem mesej we mifala i talemaot long olgeta. Oli glad blong lanem moa long saed blong Jehova, Jisas, Baebol, niufala wol long fiuja we bambae i gat pis, mo hop blong ol dedman. Wan yia biaen, mitufala i gat 20 Baebol stadi. Evri dei mitufala i kakae wetem wan long ol defdefren famle ya we i stap stadi. Mitufala i glad tumas.

Smoltaem biaen, mitufala i kasem wan narafala asaenmen. Oli sanem mitufala i go long naesfala ples klosap long Indian Osen blong mekem wok blong eria elda. Mitufala i slip wetem ol defdefren famle evri wik, taem mitufala i visitim mo wok wetem ol pablisa long kongregesen, blong leftemap tingting blong olgeta. Mitufala i kam olsem famle blong olgeta. Mifala i laekem spenem taem wetem olgeta, wetem ol pikinini blong olgeta mo ol animol blong olgeta. Mitufala i mekem wok ya blong tu yia. Nao wan dei, olgeta long branj ofis oli kolem mitufala mo oli se: “Mifala i stap tingting blong tekem yu yu kambak wok long Betel.” Mi ansa se: “Yu save, mitufala i laekem wok we mitufala i stap mekem naoia.” Nating se i olsem, mitufala i glad nomo blong mekem eni wok we oli askem mitufala blong mekem.

Long Betel, mi wok long Sevis Dipatmen wetem ol brata we oli gat ekspiriens mo oli bigman long spirit. Long taem ya, wanwan kongregesen i kasem wan leta folem ripot we eria elda i mekem afta we hem i visitim ol kongregesen ya. Ol leta ya oli blong enkarejem kongregesen mo givim eni advaes sipos i nidim. Hemia i wan bigfala wok from we ol brata oli mas transletem leta blong eria elda long lanwis Xhosa, Zulu, mo ol narafala lanwis i go long Inglis mo biaen oli mas transletem ol leta blong branj long Inglis i go long ol lanwis ya. Mi glad long hadwok blong ol transleta ya, we long semtaem oli givhan long mi blong kasemsave long ol hadtaem we ol brata mo sista long Afrika oli fesem.

 Long taem ya, Saot Afrika i stap folem rul ya we gavman i putum long saed blong apartheid. Ol waetman mo ol blakman oli gat prapa eria blong olgeta we i mekem se oli no save joen tugeta. Ol blak brata blong yumi long Afrika oli toktok prapa lanwis blong olgeta, oli prij long lanwis blong olgeta, mo oli go long ol kongregesen we i toktok lanwis blong olgeta.

Mi no save gud ol blakman blong Afrika from we kongregesen blong mi i stap long teritori we i toktok Inglis nomo. Be naoia mi gat janis blong save moa ol blakman blong Afrika, kalja, mo kastom blong olgeta. Mi lanem se ol brata blong yumi oli fesem hadtaem from oli mas dil wetem ol giaman bilif mo kastom. Olgeta ya oli gat strong tingting, oli no fraet blong sakemaot ol giaman kastom mo wok blong ol rabis spirit, nating se ol famle mo ol man long vilej oli agensem olgeta. Long ol rurol eria, ol man oli pua we oli pua. Plante oli no skul gud o oli no skul nating, be yet oli respektem Baebol.

Mi gat privilej blong wok long sam kot kes we i joen wetem fridom blong wosip mo no joen long faet. Bilif blong mi i kam strong taem mi luk olsem wanem ol yangfala Witnes oli no fraet blong holemstrong long Jehova, nating se skul i sakemaot olgeta from we oli no wantem joen long ol prea mo singim ol him.

Ol brata long wan smol kantri long Afrika we long taem ya oli singaot se Swaziland, oli fesem wan narafala traem bakegen. Taem King Sobhuza II i ded, oli askem long olgeta sitisen blong joen long sam kastom we oli mekem taem man i ded. Ol man oli mas sevemaot hea blong olgeta, mo ol woman oli mas katem hea blong olgeta i sot. Ol man oli mekem i nogud long plante brata mo sista from we oli no wantem tekpat long ol kastom ya we i joen wetem wosip long ol olfala bubu we oli ded finis. !Mifala i glad tumas blong luk we oli holemstrong long Jehova! Mifala i lanem plante samting long fasin blong ol brata blong mifala long Afrika, blong holemstrong mo blong gat longfala tingting, mo hemia i mekem bilif blong mifala i strong.

Long 1981, mi gobak long wok blong printing mo mi help blong setemap ol kompiuta blong  yusum long printing. !Hemia i wan nambawan taem! Fasin blong printim ol buk i jenis bigwan. Wan man blong wan kampani i givim niufala masin ya phototypesetter blong branj i testem we i no nid blong pem nating. Ale mifala i jenisim naen olfala Linotype masin wetem faef niufala phototypesetters masin. Mo tu, mifala i instolem wan niufala masin blong printing, hemia i mekem se naoia mifala i printim moa buk i bitim bifo.

Ol kompiuta oli givhan long mifala blong wokem wan niufala program hemia MEPS, (the Multilanguage Electronic Publishing System) blong putum ol toktok i go long ol pej. Mifala i luk we teknoloji i jenis bigwan long ol taem ya we mifala fo i stap wok long Betel long Kanada, kam kasem naoia we mifala i stap long Saot Afrika. (Aes. 60:17) Mo tu, mifala i glad tumas se mifala i mared long ol gudfala paenia sista we oli lavem Jehova tumas. Mi mo Bill i stap wok yet long Betel. Ken mo Dennis oli gat famle mo oli stap klosap nomo long mifala.

I gat plante moa wok blong mekem long branj. Oli transletem mo printim plante moa buk long plante lanwis mo oli sanem i go long plante narafala branj. From samting ya, mifala i nidim wan Betel we i bigwan moa. So ol brata oli bildim wan long naesfala eria long wes blong Johannesburg, mo oli dediketem long 1987. Mi glad tumas se mi save stap blong luk ol jenis ya oli hapen mo blong wok wetem Branj Komiti blong Saot Afrika blong plante yia.

Wan nambawan sapraes i kamaot long 2001, taem oli invaetem mitufala blong go long Yunaeted Stet blong mi wok olsem Branj Komiti. Nating se mifala i harem nogud blong lego wok mo ol fren blong mitufala long Saot Afrika, be mitufala i glad blong statem niufala laef wetem Betel famle long Yunaeted Stet.

Nating se i olsem, mitufala i wari from bambae mifala i go longwe long mama blong Laura we i kam olfala. Bambae mitufala i no save givhan tumas long hem, from we mifala i stap long Niu Yok. Be ol trifala sista blong Laura oli talem se bambae oli lukaot gud long hem mo givim samting we hem i nidim. Oli talem se: “Mifala i no save mekem wok blong Jehova fultaem, be sipos mifala i lukaot long ol nid blong mama, hemia bambae i givhan yutufala blong gohed long asaenmen blong yutufala.” Mitufala i talem bigfala tangkiu long olgeta.

Hemia semfala samting we brata blong mi mo waef blong hem we oli laef long Toronto, Kanada, oli mekem. Oli rere blong lukaot long mama blong mifala we i wido. Long taem ya, mama blong mi i bin laef wetem brata blong mi mo waef blong hem blong bitim 20 yia finis. Mitufala i glad tumas long lav mo kea we oli soemaot long hem kasem we hem i ded, smoltaem afta we mitufala i kasem Niu Yok. !I wan nambawan blesing blong gat ol memba blong famle, we oli rere blong mekem sam jenis long laef blong lukaot long ol olfala papa mama, nating se samtaem i had!

Blong sam yia, mi wok long ples blong printim ol buk long Betel blong Yunaeted Stet. Mo tede fasin blong printim ol buk i jenis bigwan, i kam moa isi. I no longtaem i pas, mi stat blong wok long Dipatmen Blong Pem Ol Samting. !Long ol 20 yia we i pas, mi glad tumas blong wok long branj, we naoia i gat samwe long 5,000 Betelaet mo samwe 2,000 komiuta!

Sikisti yia bifo, mi neva ting se bambae mi stap long ples ya. Long olgeta yia we i pas, Laura i sapotem mi fulwan. !Mi mi gat wan nambawan laef! Mitufala i glad tumas long ol defren asaenmen we mitufala i kasem, mo ol defren kaen man we mitufala i wok wetem olgeta, inkludum olgeta we oli wok long ol defren branj raon long wol we mitufala i bin visitim. Naoia we mi gat bitim 80 yia, mi no moa mekem tumas wok from we i gat plante yangfala brata we oli tren gud blong mekem ol wok ya.

Man blong raetem sam i talem se: “Nesen we God blong hem Jehova, hem i glad.” (Sam 33:12) !Hemia i tru tumas! Mi mi glad tumas se mi save mekem wok blong Jehova wetem ol hapi man blong hem.