LONG 1970, long Ein Gedi long Isrel, klosap long Ded Si long saed i go long wes, ol man blong faenem ol samting blong bifo, oli digim ol ston blong wan haos prea we i bon samwe long yia 500 o 550, nao oli faenem wan skrol. From we faea i bonem skrol ya, oli no save openem blong ridim. Be oli yusum wan masin blong luk ol raeting long hem. Mo ol teknoloji blong naoia i mekem se oli save ridim skrol ya.

?Wanem i stap long skrol ya? I gat sam vas blong Baebol, hemia ol vas long stat blong Levitikas. Long ol vas ya, i gat fo Hibru alfabet we oli minim nem blong God. I luk olsem se oli raetem skrol ya samwe long ol yia 50 kasem 400. Hemia i min se, skrol ya i olfala moa i bitim olgeta Hibru hanraet blong Baebol we oli faenem afta long hanraet blong Qumran. Gil Zohar i raetem long The Jerusalem Post se: “Bifo we oli faenem skrol blong Levitikas long Ein Gedi, i gat Skrol blong Ded Si nomo we oli raetem samwe long yia 100 bifo Kraes, wetem Skrol blong Aleppo Codex we oli raetem 1,000 yia biaen. Ol man blong stadi oli talem se skrol blong Ein Gedi i soemaot se Torah we ol Masoraet oli raetem, “i no jenis long ol taosen yia we i pas, mo tu, ol mastik blong ol man we oli kopi long ol hanraet bifo oli no jenisim ol save insaed.”