Naoia, mobaelfon mo Intenet, i mekem se yu save storian wetem plante fren, mo mekem sam samting we i neva hapen bifo. Be maet fasin blong yu blong fren wetem narafala, i no rili strong. Wan yangfala i talem se: “Mi harem olsem se i no longtaem, bae mi no moa gat ol fren. Be papa blong mi i gat ol fren we oli joen gud, blong plante yia.”

?From wanem tede, i had blong fren gud wetem narafala blong longtaem?

Mobaelfon mo Intenet i save spolem ol fren. Fasin blong sanem mesej long mobaelfon mo Intenet, i mekem se wan man i save gohed blong fren wetem narafala, nating se hem i no luk fes blong man ya. Ol man oli sanem plante teks mesej blong tokbaot plante impoten samting. Buk ya Artificial Maturity, i talem se: “Naoia, ol man oli gat smoltaem nomo blong sidaon wanples mo storian. Ol studen oli spenem plante taem long mobaelfon mo Intenet, mekem se oli no moa gat taem blong storian wetem narafala.”

I no oltaem we mobaelfon mo Intenet, i save mekem se yu save fren gud wetem narafala. Brian * we i gat 22 yia, i talem se: “I no longtaem i pas, mi luksave se mi nomo mi stap sanem ol teks mesej long ol fren blong mi. Biaen, mi stop blong sanem mesej long olgeta, from mi wantem luk sipos oli tingbaot mi, no nogat. Blong talem stret, i gat samfala nomo we oli sanem mesej long mi. Be samfala, oli no mekem olsem we mi tingbaot.”

?Olsem wanem? ?Yu save gohed yet blong fren gud wetem narafala sipos yu no yusum mobaelfon mo Intenet? Yes, yu save mekem olsem sipos yu stap yusum sam narafala rod tu, blong fren gud wetem narafala. Oltaem, fasin blong sanem mesej long mobaelfon mo Intenet, i olsem wan brij we yu wokem blong joen wetem narafala, be i no save mekem se yu go klosap long narafala.

Raetemdaon ol fasin blong wan trufala fren. ?Wan trufala fren hem i olsem wanem? Baebol i talem se, wan trufala fren i “save mekem i gud moa long yu, i winim ol brata blong yu.” (Ol Proveb 18:24) ?Yu yu wantem gat wan fren olsem? ?Yu yu stap mekem olsem? Blong faenem ansa blong kwestin ya, i gud yu raetemdaon tri fasin we yu wantem se wan fren blong yu i gat. Mo tu, yu raetemdaon tri fasin we yu save mekem long wan fren blong yu. Yu traem tingbaot ol kwestin ya, taem yu sanem mesej long ol fren blong yu long mobaelfon mo Intenet: ‘?Weswan long ol fren blong mi, i stap soemaot ol fasin we mi laekem? ?Wanem ol fasin we ol fren blong mi, oli wantem se mi gat?’​—Rul blong Baebol: Filipae 2:4.

Luksave samting we i moa impoten. Plante man oli yusum mobaelfon mo Intenet blong fren gud wetem narafala, from we maet oli gat sem tingting long wan samting. Be, samting we i moa impoten hemia blong soemaot ol gudfala fasin long narafala, i bitim we oli gat sem tingting long wan samting. Leanne, we i gat 21 yia, i talem se: “Maet mi no gat plante fren, be ol fren we mi gat oli givhan long mi blong gat ol gudfala fasin.”​—Rul blong Baebol: Ol Proveb 13:20.

Go storian wetem ol narafala. Taem yu sidaon wanples mo storian wetem narafala, bambae yu kasemsave moa long ol filing blong hem. Hemia from we yu save luk fes blong hem, mo ol aksen we hem i mekem taem hem i toktok. Be bambae yu no save luk ol samting ya, sipos yu yusum mobaelfon mo Intenet blong storian wetem narafala.​—Rul blong Baebol: 1 Tesalonaeka 2:17.

Raetem wan leta. I tru se fasin blong raetem leta, i wan olfala stael blong fren gud wetem narafala. Be, taem yu raetem leta i go long wan narafala, hemia i soemaot se yu kea long hem mo yu intres long hem. Be tede, ol man oli no moa tinghae long fasin ya. Long buk ya Alone Together, we Sherry Turkle i raetem, hem i tokbaot wan yangfala we i neva kasem wan leta long ol fren blong hem. Yangfala ya i talem se: “Mi laekem fasin ya blong toktok wetem narafala tru long leta, nating se i wan olfala stael.” ?Olsem wanem sipos yu yusum ‘olfala stael’ ya blong fren wetem narafala?

Samting we i impoten: Blong fren gud wetem narafala, i no minim nomo se oltaem yutufala i mas sanem ol mesej long yutufala. Be i min se, yutufala i mas soemaot ol gudfala fasin olsem, lav, sore, longfala tingting, mo fasin blong fogivim narafala. Ol fasin ya, oli save mekem yu fren gud wetem narafala blong olwe. Be, i had blong soemaot ol fasin ya, sipos yu gat ol fren we yu toktok nomo wetem olgeta long mobaelfon mo Intenet.