TRAEM LUK SIPOS YU SAVE

Traem talem sipos ol save ya oli tru no oli giaman.

TRU GIAMAN

1. Ol Witnes blong Jehova oli Kristin.

2. Ol Witnes blong Jehova oli bilif se God i mekem olgeta samting long sikis dei stret.

3. Ol Witnes blong Jehova oli no tekem meresin mo tritmen we dokta i givim.

4. Ol Witnes blong Jehova oli bilif fulwan long Baebol.

5. Ol Witnes blong Jehova oli yusum Baebol blong olgeta nomo we oli wokem.

6. Ol Witnes blong Jehova oli jenisim Baebol blong olgeta, blong i laenap wetem bilif blong olgeta.

7. Ol Witnes blong Jehova oli no joen blong mekem ol wok blong komuniti.

8. Ol Witnes blong Jehova oli no respektem ol man blong narafala skul.

Blong luk ol ansa, yu go long nekis pej.

1.  1 TRU. Mifala i traem blong folemgud ol tijing mo ol fasin blong Jisas Kraes. (1 Pita 2:21) Be, i gat sam samting we i mekem se mifala i defren long ol narafala skul, we oli talem se oli Kristin. Eksampol, mifala i faenemaot we Baebol i talem se Jisas i pikinini blong God, be hem i no wan Triniti. (Mak 12:29) Mifala i bilif se sol blong man i save ded, mo i no gat wan vas blong Baebol we i talem se God bambae i bonem ol nogud man long helfaea. Mo tu, mifala i no bilif se ol man oli mas singaot olgeta we oli gat wok long jos long sam spesel nem, blong leftemap olgeta.​—Prija 9:5; Esikel 18:4; Matiu 23:8-10.

2. 2 GIAMAN. Mifala i bilif se God i wokem evri samting. Be mifala i no agri se God i wokem evri samting long sikis dei stret. ?From wanem? From we tingting ya i no laenap wetem samting we Baebol i talem. Eksampol, samfala oli talem se God i wokem wol ya long ol sikis dei blong 24 aoa. Be long Baebol, tok ya “dei” i save minim wan taem we i longfala moa i bitim wan dei. (Jenesis 2:4; Ol Sam 90:4) Mo tu, sam man oli talem se wol ya i stap sam taosen yia nomo. Be, Baebol i soemaot se wol mo skae oli stap longtaem finis, bifo we God i wokem evri samting. ¹​—Jenesis 1:1.

3. 3 GIAMAN. Taem mifala i sik, mifala i tekem ol meresin. Mo tu, sam long mifala oli wok olsem dokta, sem mak olsem Luk, we i wan disaepol blong Jisas. (Kolosi 4:14) Be, mifala i no save tekem eni tritmen we i agensem ol rul blong Baebol. Eksampol, mifala i no givim blad, mo mifala i no tekem blad blong narafala. Hemia from we Baebol i no agri long fasin ya, blong kakae blad.—Ol Wok 15:20, 28, 29.

   Taem mifala i sik, no wan famle blong mifala i sik, mifala i lukaot meresin mo tritmen we i beswan. I gat sam tritmen we ol Witnes oli folem blong no tekem blad. Mo naoia, ol dokta oli yusum ol tritmen ya long fulap man. Long plante kantri, eni man i save jusum blong no tekem blad blong narafala. Hemia i save protektem man long ol sik we oli save pas tru long blad, mo mastik blong putum rong blad, mo ol sik we oli save kamaot taem blad i no givhan long bodi.

4. 4 TRU. Mifala i bilif se ful Baebol i ‘kamaot long God mo olgeta tok blong hem oli stret gud blong tijim yumi.’ (2 Timoti 3:16) Hemia i minim olgeta tok blong, Ol Testeman mo Niu Testeman. Plante taem mifala i kolem tufala haf blong Baebol ya se, Hibru mo Grik haf blong Baebol. Long rod ya, mifala i no givim tingting ya se sam haf blong Baebol oli olfala, no oli no stret.

5.  5 GIAMAN. Mifala i yusum plante defren Baebol, taem mifala i stadi. Long sam lanwis, i gat Baebol ya New World Translation of the Holy Scriptures, mo mifala i yusum from we i gat nem blong God, ol save blong hem oli stret, mo i isi blong kasemsave. Long wan Baebol, oli raetem nem blong 79 man we oli wokem Baebol ya. Be, oli tekemaot prapa nem blong man we i raetem Baebol, hemia Jehova God. Defren olgeta, long Baebol ya, New World Translation, oli putumbak prapa nem blong God long evri ples we nem blong God i kamaot long hem, long ol faswan hanraet blong Baebol. ²

6. 6 GIAMAN. Taem mifala i faenemaot se ol save we mifala i bilif long hem, oli no laenap wetem Baebol, mifala i jenisim olgeta. Bifo we mifala i wokem Baebol ya New World Translation of the Holy Scriptures long 1950, mifala i yusum ol defren Baebol, mo ol bilif blong mifala oli stanap finis long ol save blong ol Baebol ya.

7. 7 GIAMAN. Wok we mifala i mekem blong tijim narafala long Baebol, i givhan long plante man long ol komuniti. Wok ya i givhan long plante man blong oli lego ol fasin we oli stap spolem olgeta, olsem fasin blong tekem drag mo fasin blong drong. Mo long olgeta ples long wol, mifala i givhan long plante taosen man blong oli lanem blong rid mo raet. Mo tu, long taem blong disasta, mifala i halpem ol Witnes blong Jehova, mo olgeta we oli no Witnes blong Jehova. Long taem olsem, mifala i givhan long ol man blong oli gohed blong fren gud wetem God. ³

8. 8 GIAMAN. Mifala i folem advaes blong Baebol, blong “ona long olgeta man” nomata wanem bilif we oli gat. (1 Pita 2:17) Eksampol, long sam kantri, i gat plante taosen Witnes blong Jehova. Be mifala i no traem fosem ol gavman, blong oli blokem no oli putum tabu long wok we ol narafala skul oli stap mekem. Mo mifala i no mekem kampen blong gavman i putum wan loa blong fosem ol man long komuniti, blong oli gat sem fasin mo bilif olsem mifala. Mifala i respektem ol narafala man, mo mifala i glad taem olgeta tu oli respektem mifala.​—Matiu 7:12

Ol save long haf ya oli kamaot long Websaet blong mifala, jw.org/bi. Blong save moa, yu luk long MIFALA > KWESTIN WE PLANTE MAN OLI STAP ASKEM.