OL YANGFALA
10: Narafala i Trastem Yu
?I MINIM WANEM?
Yu folem ol rul, yu holem ol promes blong yu, mo yu tok tru oltaem. Taswe, papa mo mama blong yu, ol fren, mo bos blong yu long wok, oli trastem yu.
?FROM WANEM I IMPOTEN?
Sipos yu mekem ol samting we i pulum olgeta blong oli trastem yu, bambae oli letem yu yu fri moa blong mekem samting, we oli no jekem yu oltaem.
“Nambawan rod blong pulum Papa mo Mama blong trastem yu, hemia blong soemaot se yu yu bigman long tingting, mo yu save mekem ol gudfala desisen taem yu stap yu wan, i no long taem ya nomo we yu stap wetem tufala.”—Sarahi.
RUL BLONG BAEBOL: “Yufala i mas gohed blong faenemaot se yufala i wanem kaen man.”—2 Korin 13:5.
?YU SAVE MEKEM WANEM?
Sipos yu wantem se narafala i trastem yu, o yu wantem se hem i trastem yu bakegen afta we yu mekem wan mastik, i gud yu mekem ol fasin ya:
Tok tru oltaem. Sipos yu giaman, kwiktaem nomo ol narafala bambae oli no moa trastem yu. Be sipos yu tok tru mo yu no haedem ol mastik blong yu, bambae oli trastem yu.
“I isi blong tok tru taem ol samting oli stap ron gud. Be ol man bambae oli trastem yu moa sipos yu tok tru long saed blong ol mastik we oli save spolem gudnem blong yu.”—Kamen.
RUL BLONG BAEBOL: “Mifala i wantem tumas we oltaem mifala i stap mekem i stret nomo long olgeta samting.”—Hibrus 13:18.
Narafala i save dipen long yu. Long Amerika, 78 pesen blong ol bos blong ol kampani oli talem se, wan impoten samting we oli lukaotem long ol man we oli givim wok long olgeta, hemia se oli save dipen long olgeta. Sipos yu lanem ol fasin we oli mekem se narafala i save dipen long yu naoia, bambae i givhan long yu long fiuja.
“Taem mi mekem ol wok blong mi we Papa mo Mama i no nid blong rimaenem mi, tufala i luksave. Moa we mi mekem olsem, moa we tufala i trastem mi.”—Sera.
RUL BLONG BAEBOL: “Mi trastem yu se bambae yu mekem samting we mi askem . . . bambae yu go moa i bitim tok ya blong mi.”—Filimon 21.
Gat longfala tingting. I isi blong ol narafala oli luk se yu stap gruap, be i tekem taem blong oli luksave se yu stap kam bigman long tingting mo filing.
“I no wan samting we yu mekem nomo, we bambae i pulum Papa mo Mama mo ol narafala blong oli trastem yu. Be sipos yu gohed blong soemaot se oli save dipen long yu, sloslo bambae oli trastem yu.”—Branden.
RUL BLONG BAEBOL: “Yufala i mas werem ol fasin ya olsem we oli klos blong yufala: . . . yufala i mas gat longfala tingting.”—Kolosi 3:12.
Maet Yu Laekem Hemia Tu
OL YANGFALA OLI ASKEM
?From Wanem Yu Mas Tok Tru?
?Mi luk se ol man we oli giaman oli stap kasem gudfala risal?
KATUN WE MAN I DROEM
?Olsem Wanem Blong Toktok Gud Wetem Papa Mo Mama?
?Olsem wanem yu save toktok gud wetem papa mo mama blong yu taem yu harem se yu no wantem toktok?
OL YANGFALA OLI ASKEM
?Mi Mekem Gud Ol Wok We i Stap Long Han Blong Mi?
Sam papa mo mama oli letem yangfala blong olgeta i fri moa i bitim sam nara papa mo mama. ?From wanem i olsem?
