?YU YU bilivim se Baebol i kamaot long God? ?O yu ting se Baebol i wan buk we i fulap long tingting blong man nomo?

Hemia wan topik we plante man we oli talem se oli Kristin, oli gat defdefren tingting long hem. Eksampol, long 2014, wan Stadi we oli mekem long Yunaeted Stet i soemaot se bighaf blong ol man we oli talem se oli Kristin oli agri se “Baebol i kamaot long God.” Be long evri 5 man we oli talem se oli Kristin, 1 long olgeta i luk Baebol olsem wan buk we i tokbaot “ol stori blong bifo nomo, ol kastom stori, histri, mo ol loa we man nomo i raetem.” Ol defdefren tingting ya oli mekem se yumi wantem faenemaot stret mining blong tok ya “kamaot” we i stap long Baebol.—2 Timoti 3:16.

I gat 66 smol buk long Baebol, mo 40 defren man oli raetem. I tekem samwe long 1,600 yia blong raetem ful Baebol. Be sipos ol man nao oli raetem Baebol, ?from wanem yumi talem se Baebol “kamaot long God”? Blong talem stret, tok ya “kamaot long God” i minim se man we i Stamba blong ol tok blong Baebol, hem i God. Baebol i talem klia se: “Taem tok blong profet i kamaot, ol profet oli talem, be tabu spirit i putum tok ya long tingting blong olgeta.” (2 Pita 1:21) God i yusum tabu spirit, hemia paoa blong hem we man i no save luk, blong i talemaot ol tok blong hem long ol man we oli raetem Baebol. Hemia i sem mak long wan bisnesman we i wantem sanem wan leta. Hem i toktok long sekretari blong hem mo sekretari ya i stap raetemdaon ol tok blong hem. Taswe leta ya i no blong man we i stap raetemdaon, be i blong man we i stap toktok.

God i yusum wan enjel blong toktok long sam man we oli raetem Baebol. Sam narafala, God i yusum vison blong toktok long olgeta. Mo samfala, God i toktok long olgeta tru long ol drim. Samtaem God i letem ol man we oli raetem ol tok blong Baebol blong oli raetem long prapa fasin blong olgeta blong toktok, be samtaem Hem i talem ol stret tok we oli mas raetem. Nating se i olsem, ol man ya oli stil raetemdaon ol tingting blong God, i no ol tingting blong olgeta.

?Olsem wanem yumi save sua se God nao i toktok long ol man we oli raetem Baebol? Traem luk trifala pruf ya we oli soemaot se ol tok blong Baebol oli kamaot long God.