?Yu Save Mekem Wanem Blong Stap Sef?

?Yumi save mekem wanem blong stap sef, nating se ol disasta oli stap kam plante moa, mo oli stap mekem moa trabol? Bambae yumi tokbaot sam samting we yumi save mekem.

Yu no stap long ples we trabol i save kasem yu. Baebol i talem se: “Man we i gat gudfala tingting i save luksave we trabol i stap kam, nao i save ronwe long hem, be man we i no save tingting gud, hem i save letem trabol i kam, i kasem hem, we biaen i sore from.” (Ol Proveb 22:3) Hemia advaes we i waes blong yumi folem taem i gat disasta. Sipos i gat woning se bambae volkeno i bosta, no wota i ron bigwan, no hariken i stap kam, i waes blong ronwe mo go long ples we i sef. I moa impoten blong sevem laef blong yumi i bitim we yumi tingbaot haos blong yumi mo olting blong yumi.

Maet yu save jusum blong no stap long ples we i gat bigfala denja. Wan ripot i talem se: “Plante taem, ol disasta oli kasem ol semfala ples. I gat sam ples nomo long wol we oli stap long bigfala denja. Plante long ol bigfala disasta, bambae oli kamaot bakegen long ol ples ya.” Ating samting ya i tru taem yumi tingbaot ol ples we oli stap daon klosap long solwota, mo ol ples we graon i seksek moa (fault lines). I gud sipos yu no stap long ol ples olsem, no yu muv i go stap long wan ples we i moa sef. Olsem nao, bambae yu no stap long bigfala denja.

Yu mas rere gud. Nating se yu traehad blong folem ol advaes ya, be maet yu sapraes se disasta i kasem ples blong yu. Sipos yu rere gud, bambae yu save stap sef taem disasta i kasem ples blong yu. Hemia nao advaes blong Ol Proveb 22:3 we yumi tokbaot finis. ?Olsem wanem? ?Yu yu rerem wan basket finis we yu save karem kwiktaem blong ronwe long disasta? Wan buk (1-2-3 of Disaster Education) i talem se i gud blong fulumap ol samting ya long basket blong yu: Ol meresin mo ol samting we yu nidim sipos yu kasem kil, wota, kakae we i save stap longtaem, mo ol impoten pepa. Mo i gud we yu wetem famle blong yu, yufala i tokbaot ol disasta we oli save kasem ples blong yufala, mo wanem we yufala i save mekem blong stap sef long taem olsem.

Yu mas fren gud wetem God oltaem. Fasin ya blong fren gud wetem God i save givhan long yu nomata wanem samting i hapen long laef blong yu. Baebol i tokbaot God se hem i ‘Papa blong yumi we i gat sore, mo hem i God we i stamba blong fasin blong givhan. Hem i stap givhan long yumi long olgeta trabol blong yumi, blong mekem yumi harem gud.’ Wan narafala vas i talem se God i stap “leftemap tingting blong man we i stap harem nogud.”—2 Korin 1:3, 4; 7:6.

Yes, God i save gud ol samting we oli hapen long laef blong ol man we oli bilif long hem. Hem i God we i lavem ol man mo hem i yusum ol defdefren rod blong leftemap tingting blong ol man. (1 Jon 4:8) I gud yumi prea long God. Yumi no prea blong hem i mekem merikel blong blokem yumi long trabol. Be yumi prea blong God i givim tabu spirit long yumi, blong givhan long yumi nomata wanem trabol i kasem yumi. Tabu spirit i save givhan long yumi blong  tingbaot ol vas blong Baebol we oli save leftemap tingting blong yumi long taem blong trabol, mo oli save mekem tingting blong yumi i kwaet. Bambae yumi save harem olsem King Deved blong Isrel bifo, we i talem se: “Hae God. Nating we mi pas long ples we i tudak olgeta i ples blong ded, be mi mi no save fraet long wan samting, from we yu yu stap wetem mi. Yu stap blokemgud mi long nalnal blong yu mo long wokingstik blong yu, nao mi mi stap sef.”—Ol Sam 23:4.

Ol tru Kristin oli givgivhan long olgeta. Long taem bifo, wan Kristin we hem i wan profet, nem blong hem Agabus, i talemaot se bambae “olgeta man long wol oli gat hadtaem blong kasem kakae. (Hadtaem ya i kamtru long olgeta long taem ya we Klodias, man Rom ya i stap rulum olgeta kantri.)” Plante disaepol blong Jisas long Judia oli harem nogud tumas from hadtaem ya. ?Ol disaepol long ol narafala ples, oli mekem wanem taem oli harem nius se ol Kristin brata sista blong olgeta oli trabol? Baebol i talem se: “Ol man blong Jisas oli tingbaot se bambae olgeta evriwan oli mas sanem sam mane olsem we oli save mekem, blong givhan long ol brata . . . we oli stap long Judia.” (Ol Wok 11:28, 29) Lav i pusum olgeta blong oli sanem sam samting i go long ol Kristin brata sista blong olgeta.

Taem i gat ol bigfala trabol olsem, ol man blong God tede oli mekem sem samting. Ol man oli save gud ol Witnes blong Jehova se oli stap givgivhan long olgeta. Long 27 Februari, 2010, graon i seksek bigwan long Jili. Kwiktaem nomo ol Witnes blong Jehova oli givhan long olgeta we oli stap long ples ya. Afta we graon i seksek, i gat wan bigfala wef we i spolem haos blong plante man. Wan long olgeta, nem blong hem Karla. Hem i talem se: “Long nekis dei nomo, [ol Kristin brata sista] blong ol narafala ples oli kam givhan long mifala. Mi mi harem gud tumas taem mi luk samting ya, mo i leftemap tingting blong mi bigwan. Mi mi save se Jehova i yusum gudfala fasin blong olgeta blong leftemap tingting blong mifala. Mi mi harem se Jehova i lavem mi mo i stap lukaot gud long mi.” Bubu man blong Karla i no wan Witnes, be hem i luk we ol Witnes oli givhan long ol narafala. Hem i talem se: “Mi mi stap long jos blong mi plante yia, be mi no luk se ol man blong jos blong mi oli mekem olsem. Hemia i defren olgeta.” Samting we hem i luk, i pulum hem blong askem ol Witnes blong Jehova blong oli stadi Baebol wetem hem.

Yes, long taem blong trabol, yumi harem gud blong stap wetem olgeta we oli lavem God.

[Tok blong pija long pej 6]

?Yu yu rerem wan basket finis we yu save karem kwiktaem blong ronwe long disasta?

[Tok blong pija long pej 7]

Yumi no prea blong God i mekem merikel, be yumi prea blong God i givim tabu spirit, blong givhan long yumi nomata wanem trabol i kasem yumi

[Tok blong pija long pej 7]

Ol tru Kristin oli givgivhan long olgeta taem oli kasem trabol from ol disasta

[Tok blong pija long pej 7]

“Mi mi harem se Jehova i lavem mi mo i stap lukaot gud long mi”