God i mekem wol ya blong ol samting oli save laef long hem, taswe hem i mekem we i gat plante wota blong laef i gohed. God i mekem wol i lei smol mo i save muv sloslo i goraon long San, blong mekem se solwota i no kam kolkol tumas, mo i no kam hot tumas. Mo win we i raonem wol mo paoa blong magnet we i kamaot dip insaed long medel blong wol, tufala i protektem olgeta laef samting blong ol doti win oli no spolem olgeta, mo kilim olgeta oli ded. Taswe plante man oli sua se i mas gat wan gudfala risen blong God i mekem wol ya.—Ridim Aesea 45:18.

Ol anamol mo ol tri oli dipen long olgeta bakegen blong oli stap laef, hemia i nambawan tumas. Samting ya i mekem se ol man tu oli save laef long wol ya. Be maet yu tingbaot se: “Sipos God i mekem plan blong ol man oli laef long wol ya, ?hemia i min se fasin safa mo kruked fasin tu i insaed long plan ya?”—Ridim Dutronome 32:4, 5.

Tingting blong God se wol ya bambae i fulap long ol man we oli hapi, oli gat respek, mo oli lavem God ya we i mekem olgeta. From samting ya hem i mekem yumi defren long ol anamol. Yumi naf blong kasem save long hem, yumi lavem hem, mo yumi folem fasin blong hem blong lavem ol man, mo blong mekem ol fasin we oli stret.—Ridim Prija 12:13; Maeka 6:8.

God i naf blong mekem olgeta samting we hem i wantem i kamtru. Taswe, yumi trastem hem se bambae hem i naf blong mekem wol ya i kam wan ples we ol man bambae oli harem gud long hem.—Ridim Ol Sam 37:11, 29; Aesea 55:11.