EKSPLENESEN BLONG OL VAS

Jenesis 1:1—“Fastaem, Bifo Olgeta, God i Wokem Heven Mo Wol”

PLEI

“Fastaem, bifo olgeta, God i wokem heven mo wol.”—Jenesis 1:1, Niu Wol Translesen.

“Fastaem, bifo olgeta, God i krietem heven mo wol.”—Jenesis 1:1, King James Version.

Mining Blong Jenesis 1:1

I gat tu impoten trutok we i stap long faswan vas ya blong Baebol. Faswan, “heven mo wol,” o yunives blong yumi i gat stat blong hem. Sekenwan, God nao i krietem olgeta.—Revelesen 4:11.

Baebol i no talem stret taem o yia we God i krietem yunives, mo i no eksplenem tu se God i krietem ol samting ya olsem wanem. Be hem i tokbaot se God i krietem yunives long ‘paoa blong hem we i strong we i strong.’—Aesea 40:26.

Tok ya “krietem” oli transletem folem wan Hibru veb, we oli yusum nomo blong diskraebem wan wok we God i mekem. a Baebol i tokbaot Jehova b God se hem nao i Krieta blong olgeta samting.—Aesea 42:5; 45:18.

Ol Vas Raonabaot Long Jenesis 1:1

Faswan vas ya long buk blong Jenesis, i pulum man i go long olgeta samting we God i krietem, we Jenesis japta 1 mo 2 i tokbaot. Stat long Jenesis 1:1 kasem 2:4, Baebol i eksplenem long wan simpol wei olsem wanem God i wokem wol mo ol laef samting insaed long hem, wetem faswan man mo woman. Biaen, Baebol i tokbaot klia moa olsem wanem God i wokem man mo woman.—Jenesis 2:7-25.

Jenesis i tokbaot se olgeta samting ya we God i krietem, oli hapen long wan period blong sikis “dei.” Ol dei ya oli no ol prapa dei blong 24 aoa, be i wan longfala taem. Yes, tok ya “dei” i save minim wan longfala period blong taem, be i no 24 aoa nomo. Jenesis 2:4 [NW] i soemaot samting ya, taem i yusum toktok ya “dei” mo “taem” olsem se tufala i gat sem mining nomo, mo i talem se ol sikis dei ya we God i wokem olgeta samting, i olsem we oli hapen long wan “dei” nomo.

Rong Tingting Long Saed Blong Jenesis 1:1

Rong Tingting: God i krietem yunives sam taosen yia i pas.

Trutok: Baebol i no talem wetaem God i krietem yunives. Tok we i stap long Jenesis 1:1 i no go agensem tingting blong ol saentis tede se yunives i bin stap plante bilian yia finis. c

Rong Tingting: Jenesis 1:1 i soemaot se God i wan Triniti, from Hibru tok we oli yusum blong tokbaot “God,” i givim tingting se i gat plante god.

Trutok: Hibru tok ya ’Elo·himʹ, we oli transletem i kam taetel ya “God,” i no givim tingting se i gat plante god, be i soemaot se God nomo i hae olgeta o i gat olgeta paoa. New Catholic Encyclopedia i talem se tok ya ’Elo·himʹ long Jenesis 1:1 “oltaem i joen wetem wan singula veb blong soemaot . . . se hem nomo i hae olgeta o i gat olgeta paoa, be i no blong minim se i gat plante god.”—Second Edition, Volium 6, pej 272.

Ridim Jenesis japta 1 mo ol futnot blong hem wetem ol kros-refrens.

a Long saed blong tok ya, HCSB Study Bible i eksplenem se: “Hibru veb ya bara’ we i minim ‘krietem,’ oli neva yusum blong tokbaot wan samting we man i wokem. Taswe, tok ya bara’ i minim wan wok we God nomo i mekem.”— Pej 7.

b Jehova i prapa nem blong God.—Ol Sam 83:18, NW.

c The Expositor’s Bible Commentary i eksplenem Hibru tok ya “fastaem, bifo olgeta” se: “Tok we oli transletem i kam “fastaem, bifo olgeta” i no soemaot se taem ya i longfala olsem wanem.”—Revised Edition, Volium 1, pej 51.