•  Oltaem, plante taem, samtaem, o neva . . .

  •  mi tok tru

  •  narafala i save trastem mi

  •  mi kam long stret taem

  •  mi wok had

  •  mi mekem evri samting folem oda

  •  mi givhan long narafala

  •  mi mekem i stret

  •  mi soemaot respek

  •  mi soemaot lav

•   ?Yu yu strong moa long weswan long ol fasin ya?

   I gud yu gohed olsem.—Filipae 3:16.

•   ?Yu mas kam gud moa long weswan long ol fasin ya?

 Ol save ya bambae i givhan long yu blong kam gud moa.

 Blong mekem gud ol wok long haos, long skul, mo long komuniti, man i mas luksave se ol aksen blong hem oli gat frut blong olgeta. Taem hem i mestem, hem i no traem blong haedem, be hem i talem sore mo hem i traem blong stretem mastik blong hem.

 Baebol i talem se: “Olgeta man wanwan oli gat prapa basket blong olgeta blong karem.”—Galesia 6:5.

Man we i mekem gud ol wok blong hem i yusum gudhan blong hem long waes fasin. Taswe ol narafala oli tinghae long hem, oli mekem long hem olsem we hem i bigman finis, oli letem hem i fri blong mekem plante moa samting, mo oli givim spesel wok long hem blong mekem.

 Baebol i talem se: “?Yu yu luk finis wan man we i gat gudhan long wok blong hem? Bambae hem i stanap long fored blong ol king.”—Ol Proveb 22:29.

  Man we i mekem gud ol wok blong hem, plante taem hem i glad blong givim samting long narafala, mo hem i gat ol gudfala fren.

 Baebol i talem se: “Yufala i mas gat fasin ya blong givim samting long ol man, nao ol man oli save givim samting long yufala.”—Luk 6:38.

Man we i mekem gud ol wok blong hem, i praod long wok ya, i harem gud from, mo hemia i givhan long hem blong i gat strong tingting.

 Baebol i talem se: “I gud man i jekem wok we hem nomo i mekem, blong faenemaot se wok ya i olsem wanem. Olsem nao, hem i save glad from wok we hem nomo i mekem.”—Galesia 6:4.

 Blong ansarem kwestin ya, tingbaot ol tok ya we samfala oli talem. ?Weswan i stret long filing blong yu?

 “!I nogud sipos yu olsem wan bebi we Mami mo Dadi i mas jekem yu evri aoa!”—Keri.

 “Klosap oltaem papa mo mama blong mi i letem mi mi goaot wetem ol fren blong mi.”—Rijad.

 “Taem mi luk ol nara yangfala mo olsem wanem papa mo mama blong olgeta i letem olgeta blong mekem plante samting, mi stap tingting se: ‘!Man! ?From wanem papa mo mama blong mi i no olsem?’”—An.

 “Klosap oltaem Papa mo Mama i letem mi mi mekem samting we mi wantem. Mi glad tumas we tufala i letem mi mi fri olsem.”—Marina.

 Stamba poen: Sam mama mo papa oli letem ol yangfala blong olgeta i fri moa i bitim sam nara papa mo mama. ?From wanem i olsem?

 Trutok: Plante taem ol papa mo mama oli letem yangfala blong olgeta i fri sipos oli luk se oli save trastem hem.

 Traem luk samting we tufala yangfala we yumi tokbaot finis, i talem.

 Rijad: “Fastaem, Papa mo Mama i no trastem mi taem tufala i letem mi mi fri. Be naoia tufala i trastem mi from we mi no giaman long tufala. Mi talem stret long tufala weples bambae mi go mo hu bambae mi go wetem. Plante taem mi talemaot plan blong mi long tufala bifo we tufala i askem.”

 Marina: “Tu taem long laef blong mi, mi giaman long Papa mo Mama, mo long tufala taem ya, tufala i faenemaot mi. Taswe naoia mi tok tru long tufala. Oltaem mi talemaot samting we mi stap mekem, mo taem mi aot, mi ring long tufala. Naoia tufala i trastem mi moa.”

 ?Yu wantem se yu olsem Rijad mo Marina? Ale, jekem yu wan long ol samting ya:

LONG HAOS

•   ?Yu yu finisim ol wok we Papa mo Mama i givim long yu long haos?

•   ?Yu yu kamhom long stret taem we Papa mo Mama i talem?

•   ?Yu yu soemaot respek long Papa mo Mama mo ol brata mo sista blong yu?

 ?Weswan long ol poen ya we yu mas kam gud moa long hem?

 Baebol i talem se: “Yufala i mas obei long papa mo mama blong yufala.”—Efesas 6:1.

EDUKESEN

•   ?Yu yu finisim ol homwok blong yu long stret taem?

•   ?Yu yu stap traehad blong kasem ol mak we oli hae moa?

•   ?Yu yu gat wan gudfala program blong stadi?

 ?Weswan long ol poen ya we yu mas kam gud moa long hem?

 Baebol i talem se: “Waes i protektem man.” (Prija 7:12) Wan gudfala edukesen i save givhan long yu blong yu gat waes.

GUDNEM

•   ?Yu yu stap tok tru long Papa mo Mama mo ol narafala?

•   ?Yu stap yusum gud mane blong yu?

•   ?Ol narafala oli tingbaot yu olsem wan man we oli save trastem?

 ?Weswan long ol poen ya we yu mas kam gud moa long hem?

 Baebol i talem se: “Yufala i mas werem niufala fasin.” (Efesas 4:24) Yu yu naf blong kam gud moa long ol fasin blong yu mo gat wan gudnem.