Taem ol pikinini oli yangfala, plante taem oli save gat ol problem blong helt, nao maet oli harem se oli no moa gat paoa. Sam yangfala, maet oli gat sam bigfala sik. ?Yu yu olsem tu? Sipos yes, maet ekspiriens blong V’loria, Justin, mo Nisa i save leftemap tingting blong yu. Trifala ya oli Witnes Blong Jehova. Makem olsem wanem trifala ya i dil wetem ol helt problem blong trifala.

•  V’loria

•  Justin

•  Nisa

 Taem mi mi gat 14 yia, ol bodi blong mi oli stap soa. Mo taem mi gat 20 yia, mi kasem sik ya we ol joen blong mi oli soa, sik blong skin, mo sik ya Lyme. I had blong mekem ol samting we yu wantem mekem taem bodi blong yu i taet oltaem. Samtaem, wansaed bodi blong mi i stap ded, stat long hip blong mi i go kasem leg blong mi, mekem se mi mas stap long wiljea.

 Be samting we i moa nogud hemia rong tingting we mi gat long mi wan, from we mi no naf blong mekem ol simpol samting nomo, olsem openem wan botel o raet. Taem mi luk ol pikinini oli stap wokbaot, mi stap tingting se from wanem i had blong mi wokbaot olsem olgeta. Mi harem se mi gud blong nating nomo.

 Mi glad tumas se ol narafala oli givhan long mi, i no ol memba blong ol famle nomo, be ol Witnes Blong Jehova tu we mi stap joen wetem olgeta. Plante taem oli visitim mi, mekem se mi no harem se mi stap mi wan. Samfala oli invaetem mi blong go long sam lafet, nating se i no isi blong oli tekemaot mi long wiljea mo tekemaot mi long trak tu.

 Ol olfala long kongregesen oli givhan tu from we oli kasemsave filing we wan man i gat, taem hem i gat helt problem. Oli no sem blong givhan long mi nating se mi no naf blong mekem plante samting olsem ol narafala. Taem mi stap long miting mo long wok blong prij, hemia nao ples we i mekem mi mi glad tumas. (Hibrus 10:25) Long ol taem olsem, mi kasemsave se nating se mi gat helt problem, be mi no defren long ol narafala.

 Oltaem mi tingbaot se Jehova i stap givim ol samting we yumi nidim blong yumi save stanap strong. Eksampol, Baebol i talem se nating sipos bodi blong wan man i stap kam nogud, be hat mo tingting blong hem i save “kam niuwan evri dei.” (2 Korin 4:16) !Hemia nao filing we mi mi gat!

 Traem Tingbaot: Sipos yu stap safa from ol bigfala problem blong helt, ?from wanem i impoten blong askem help long ol narafala? Sipos yu yu gat gudfala helt, ?olsem wanem yu save givhan long wan man we i sik?—Ol Proveb 17:17.

 Mi bin foldaon i long floa mo mi no moa save girap. Jes blong mi i kam taet mo mi no moa save muv. Oli tekem mi mi go kwik long emejensi rum. Fastaem, ol dokta oli no save wanem i rong long mi. Be afta long sam moa problem, ol dokta oli jes faenemaot se mi kasem sik ya Lyme.

 Sik ya Lyme i stap afektem ol nev long bodi blong mi. Mi bin kasem sik ya plante yia finis, be mi stap seksek yet, mo samtaem mi no save kontrolem mi. I gat ol taem we ol bodi blong mi oli soa o ol fingga blong mi oli soa we oli soa, we mi no save muvum olgeta nating. I olsem se ol joen blong mi oli rosta.

 Mi stap tingting mi wan se: ‘Mi mi yang tumas blong sik,’ mo hemia i mekem mi kros. Evridei mi stap krae i go long God, mi stap askem long hem se: “?From wanem mi stap gotru long hadtaem ya?” Ale mi stat blong gat tingting ya se God i lego mi. Be biaen mi tingbaot eksampol blong Job long Baebol. Job i no iven save from wanem hem i stap kasem plante hadtaem, be yet hem i gohed blong holemstrong long God. Sipos Job i naf blong mekem olsem wetem ol bigfala problem we hem i fesem, mi tu mi save mekem sem mak.

 Ol elda long kongregesen blong mi oli givhan long mi bigwan. Oltaem oli jekem mi mo oli stap askem se mi harem olsem wanem. Wan elda i talem long mi se mi save kolem hem eni taem o eni aoa, sipos mi wantem toktok wetem hem. !Evridei mi talem tangkiu long Jehova from wan fren olsem!—Aesea 32:1, 2.

 Samtaem taem yumi kasem wan bigfala sik, yumi foget samting we i tru, hemia se Jehova i save wanem we yumi stap gotru long hem. Baebol i talem se: “Yufala i mas putum ol trabol blong yufala long Hae God, nao hem bambae i blokem yufala, i sevem yufala.” (Ol Sam 55:22) Mo hemia nao samting we mi traem blong mekem evridei.

 Traem Tingbaot: ?Olsem wanem olgeta we oli lavem yu oli save givhan long yu blong stanap strong tru long wan problem blong helt we yu kasem?—Ol Proveb 24:10; 1 Tesalonaeka 5:11.

 Taem mi yangfala, mi kasem sik ya Marfan syndrome, hemia wan sik we i afektem ol joen, i mekem oli no strong. Mo tu, i save afektem hat, ae mo ol narafala pat blong bodi. Be i no evridei we mi stap harem ol bodi blong mi oli soa, be taem i soa, mi harem i soa tumas.

 Taem mi jes kasem sik ya, plante taem mi krae. Mi stap wari se bambae mi no moa save mekem ol samting we mi laekem blong mekem. Eksampol, mi mi laekem tumas blong danis mo taem mi stap tingbaot se wan dei, maet bambae bodi blong mi i soa tumas blong mekem olsem, mo maet i soa tu taem mi wokbaot, hemia i mekem mi mi fraet tumas long fiuja.

 Bigfala sista blong mi i givhan long mi bigwan. Hem i halpem mi blong mi kamaot long filing ya blong stap sori long mi wan. Hem i talem se mi no mas fraet, from we hemia i save mekem se mi no glad long laef blong mi. Mo tu, hem i leftemap tingting blong mi blong gohed blong prea, from we i no gat eni man i save kasemsave ol filing blong mi, Jehova nomo i save.—1 Pita 5:7.

 Wan vas we i rili leftemap tingting blong mi hemia Ol Sam 18:6, vas ya i se: “Long trabol ya blong mi, mi mi singaot i go long [Jehova] we i God blong mi, blong hem i givhan long mi. Nao hem i stap long haos blong hem, i harem voes blong mi. Hem i harem mi we mi stap krae i go long hem.” Vas ya i givhan long mi blong kasemsave se taem mi prea long Jehova mo mi askem hem blong givhan long mi, bambae hem i harem mi mo i halpem mi. Hem i stap oltaem blong harem mi.

 Mi lanem se i stret nomo blong yumi harem nogud mo kros from ol hadtaem we yumi kasem, i nomol blong gat ol filing olsem. Be samting we i moa impoten, hemia se yumi no letem ol filing ya oli spolem laef blong yumi mo afektem frensip blong yumi wetem God. Hem i no stamba blong ol problem blong yumi, mo bambae hem i neva lego yumi taem yumi putum hem fasples long laef blong yumi.—Jemes 4:8.

 Traem Tingbaot: ?God nao i mekem yumi safa?—Jemes 1:13.