Smol fis ya blong California we nem blong hem grunion, i putum ol eg blong hem long ol sanbij blong Pasifik long California, Yunaeted Stet, mo long Baja California, Meksiko. Ol fis ya oli save stret dei mo taem we oli mas putum ol eg blong olgeta, blong ol pikinini blong olgeta oli save stap laef.

 Tingbaot: Tri o fo naet afta we solwota i kamso long taem blong fulmun o niu mun, ol grunion oli putum ol eg blong olgeta. Sipos oli putum ol eg bifo long fulmun o niu mun, taem solwota i kam antap, bambae i wasemaot ol sanbij mo karem ol eg oli go long solwota. Be afta long fulmun o niu mun, ol wef oli no moa kam antap tumas, mo tu oli karem ol sanbij i kambak, taswe ol eg oli stap sef aninit long sanbij.

 Mo tu, long hot taem o klosap long hot taem, hemia taem we ol grunion oli putum ol eg blong olgeta, solwota i kam antap moa long naet i bitim long dei. Taswe fis ya i save swim i kam antap moa long sanbij blong putum ol eg long ples we solwota i no save kasem olgeta.

 Blong putum ol eg blong olgeta, ol grunion oli wet long wan bigfala wef, nao oli swim long wef ya go kasem we oli fas long sanbij. Taem wef i gobak, woman fis ya i yusum tel blong hem blong digim wan hol long sanbij go kasem we i berem haf bodi blong hem. Nao hem i putum ol eg blong hem samwe long faef kasem eit sentimeta aninit long sanbij, mo wan man fis o sam man fis, oli kam mo mekem se ol eg ya oli save karem pikinini. Afta, ol fis ya oli muvmuvum bodi blong olgeta long sanbij go kasem we nekis wef i kam karem olgeta oli gobak long solwota.

 Ol eg ya oli stap gud aninit long sanbij we i wetwet, be long taem we i stret blong ol pikinini oli kamaot, i nidim we ol wef oli muvmuvum sanbij blong ol eg oli save brobrok. Taswe, samwe long tu wik biaen we grunion i putum ol eg, taem solwota i kamso, ol smosmol pikinini oli kamkamaot. Be sipos i gat nid, ol eg oli save stap kasem fo wik blong wet long stret taem blong solwota i kam antap kasem olgeta.

 ?Wanem tingting blong yu? ?Fasin blong grunion blong save wetaem mo olsem wanem blong putum ol eg blong hem, i kamaot olsem nomo? ?O i gat wan Man we i wokem samting ya?