Iran Keghi Miẹn Vbene Etẹn Gele Hoẹmwẹ Iran Hẹ
Ọ MWẸ okhuo ọkpa na tie ẹre Yomara, ọ mwẹ etẹn nikpia eva, eni iran ọre Marcelo kevbe Hiver, ovbi igue ọkpa nọ rre Guatemala ẹre iran ye. Avbe Osẹe Jehova keghi suẹn gha gu e Yomara ruẹ e Baibol, vbene ẹghẹ ya khian, etiọnrẹn nikpia eva na ghi deba ẹre. Sokpan ọ mwẹ ọlọghọmwa ọkpa ne iran ghaa mwẹ. Te iran eha wa rhu aro, iran i vbe gua tie ebe ne avbe arhuaro tie (braille). Rhunmwuda ọni, ọtẹn nokpia nọ gu iran ruẹ emwi gha khian ma iran emwi, ọ ghi tie iruẹmwi nii kevbe Baibol na wẹẹ na tie, ma iran.
Ọlọghọmwa ọvbehe ne iran ghaa mwẹ, ọre vbene iran khian ya gha yo iko hẹ. Ifuanro 40 ẹre a gbe vbe odẹ, a ke sẹtin sẹ Ọgua Arriọba nọ sikẹ iran sẹ, sokpan iran i khian sẹtin tobọ iran yo. Rhunmwuda ọni, etẹn ni rre iko keghi ru emwamwa, ne iran mieke na sẹtin gha yo iko. A ghi vbe suẹn gha rhie ọta ne iran vbe iko na do vbe uwu uzọla, etẹn na gha ru iyobọ ne iran, ne iran mieke na rẹn ọnrẹn ye uhunmwu, ẹmwẹ ne iran khian ta vbe abọ ọghe iran.
Vbọ ghi rre May 2019, a keghi suẹn gha do iko vbe igue ọghe iran. Vbe ẹghẹ na, ọdọ vbe amwẹ ni re arọndẹ ọghe ẹghẹ hia suẹn gha ga nẹ vbe igue nii. Ọdọ vbe amwẹ na i gua tie braille, sokpan iran kegha hoo ne iran ma etẹn eha na, vbe na ya tie braille hẹ kevbe vbe na ya gbẹn ọnrẹn hẹ. Rhunmwuda ọni, iran na ya dẹlẹ ebe ọghe braille, iran na vbe ruẹ ọre, ne iran mieke na rẹn vbene iran khian ya ma emwa ọvbehe hẹ.
E Marcelo gha zẹ ewanniẹn vbe iko
Vbọ ghi rre uki eso vba, etẹn eha na, keghi do guẹ vbe na ya tie braille hẹ, erriọ iran ghi do ya gha mwẹ alaghodaro vbe odẹ ọghe ẹmwata. a Arọndẹ ọghe ẹghẹ hia ẹre Yomara, Marcelo, kevbe Hiver ghi khin nian. Ọguọmwadia iwinna ẹre Marcelo vbe khin vbe iko. Te iran wa rhiegba ye iwinna ugamwẹ ọghe Jehova. Izọghae ọghe iran, keghi gu etẹn ọvbehe kpa ne iran gha ya egbe taa iran.
Etẹn eha na, wa gele gbọyẹmwẹ ye iyobọ ne etẹn ni rre iko ru ne iran. E Yomara khare wẹẹ: “Ẹghẹ okaro ne ima ya miẹn Avbe Osẹe Jehova, ẹre iran ya rhie ẹre ma wẹẹ, iran hoẹmwẹ ima.” E Marcelo vbe kha wẹẹ, “Ma mwẹ ọse nibun vbe iko ne ima ye, ima vbe mwẹ etẹn vbe uhunmwu otagbọn hia ni ga e Jehova kugbe, te iran wa vbe hoẹmwẹ egbe.” E Yomara kevbe etiọnrẹn nikpia, wa ya aro ye ẹghẹ ne Jehova khian ya ya uhunmwu otagbọn na khian e Paradais.—Psm 37:10, 11; Aiz 35:5.
a Rhunmwuda avbe arhuaro kevbe emwa nẹi bẹghe ẹse, ẹre a na gbẹn ebe na tie ẹre Learn to Read Braille, ne iran mieke na sẹtin ruẹ vbe na ya tie braille hẹ kevbe vbe na ya gbẹn ọnrẹn hẹ.
