1-2. Vbọ ya eguọmwadia Osanobua ghọghọ? (Jems 1:​22-25)

 E JEHOVA kevbe Ovbi ẹre wa hoo ne ima gha ghọghọ. Ọmwa nọ gbẹn ebe Psalm 119:2 khare wẹẹ: “Oghọghọ nọ ne iran ni lele iyi ẹre, ni ya ekhọe hia họn ẹmwẹ nẹẹn.” Jesu na vbe kha wẹẹ: “Oghọghọ nọ ne emwa ni danmwehọ ẹmwẹ Osanobua, ni vbe yae ru emwi!”​—Luk 11:28.

² Zẹvbe eguọmwadia e Jehova ne ima khin, te ima wa sọyẹnmwẹ. Vbọzẹ? Emwi bun nọ ya ima sọyẹnmwẹ, sokpan ọkpa nọ wa ru ekpataki ọre ne ima na tie Ẹmwẹ Osanobua vbe ẹghẹ hia kevbe ne ima na hia ne ima gha rhie emwi ne ima ruẹ ye uyinmwẹ.​—Tie Jems 1:​22-25.

3. De ere ne ima miẹn vbọ, vbe ima ghaa ya emwi ne ima tie vbe Ẹmwẹ Osanobua ru emwi?

³ Odẹ ughughan ẹre ima ya miẹn ere vbọ vbe ima ghaa “ya ẹmwẹ Osanobua ru emwi.” Ma rẹnrẹn wẹẹ, deghẹ ima hoo ne ima gha ru emwi nọ yẹẹ e Jehova, te ọ khẹke ne ima gha ya ẹmwẹ ọnrẹn ru emwi. Ma gha ru vberriọ, ma ghi gha ghọghọ. (Asan 12:13) Ma ghaa ya emwi ne ima tie vbe Ẹmwẹ Osanobua ru emwi, ọ ghi ru iyobọ ne ima ya kakabọ gha ya obọ esi mu emwa ima vbe uwu ẹgbẹe kevbe etẹn vbe iko. Ẹ i mwẹ ọna ma he sunu vbe ẹdagbọn ruẹ. Vbe deba ọni, ma i khian de ye ọlọghọmwa na la ẹre miẹn adeghẹ ọmwa ma ya Ẹmwẹ Osanobua ru emwi. Ma wa kue ye ẹmwẹ ne Ọba ighẹ e Devid tae. Vbe ọ ghi guan kaẹn uhi ọghe Jehova, ilele ọghẹe kevbe ibuohiẹn ọghẹe nẹ vbe ihuan nọ so, ọ na kha wẹẹ: “Ọmwa nọ yae ru emwi, keghi miẹn ere nọkhua vbọ.”​—Psm 19:​7-11.

4. Vbọzẹ nẹi na mobọ khuẹrhẹ ne ima gha ya emwi ne ima tie vbe Ẹmwẹ Osanobua ru emwi?

 ⁴ Ọghe ne ẹmwata, ẹ i wa mobọ khuẹrhẹ ne ima gha ya emwi ne ima tie vbe Ẹmwẹ Osanobua ru emwi. Ẹmwata nọ wẹẹ, ma mwẹ emwi nibun ne ima ru vbe obọ, sokpan te ọ khẹke ne ima zẹ ẹghẹ kọ ya gha tie Ẹmwẹ Osanobua, ma ghi vbe gha ruẹ ọre ne egbe ima, ne ima mieke na rẹn emwi ne Osanobua hoo ne ima ru. Nọnaghiyerriọ, gi ima guan kaẹn emwi eso nọ gha ru iyobọ ne ima ya gha tie Ẹmwẹ Osanobua vbe ẹghẹ hia. Ma gha vbe guan kaẹn emwi nọ gha ru iyobọ ne ima ya gha mu emwi ne ima tie roro kevbe odẹ eso ne ima khian ya gha rhie emwi ne ima ruẹ ye uyinmwẹ vbe ẹdagbọn ima.

ZẸ ẸGHẸ KỌ YA GHA TIE ẸMWẸ OSANOBUA

5. De emwi eso nọ rhie ima ẹghẹ?

⁵ Eguọmwadia e Jehova nibun wa mwẹ emwi nibun ne iran ru nọ rhie iran ẹghẹ. Ẹ i re ovbi ẹghẹ kherhe ẹre ima loo ya ru iwinna ughughan nọ khẹke ne ima gha ru zẹvbe nọ rre Baibol. Vbe igiemwi, ma nibun mwẹ iwinna ne ima ru ne ima ya kpemehe ne egbe ima kevbe ẹgbẹe ọghe ima. (1 Tim 5:8) Etẹn nibun vbe gbaroghe emwa iran vbe uwu ẹgbẹe ni khuọnmwi ra ni khian eniwanrẹn nẹ. A ye ta ena ta na, te ima gha vbe gbaroghe egbe ima, ọna wa vbe rhie ima ẹghẹ. Vbe deba ena hia, ma vbe mwẹ iwinna ughughan ne ima ru vbe uwu iko. Ọkpa vbe usun iwinna na, nọ wa kakabọ ru ekpataki ọre ne ima gha kporhu iyẹn nọ maan. Vbe uwu ena hia, vbua khian ya sẹtin zẹ ẹghẹ kọ ya gha tie Baibol vbe ẹghẹ hia, ne u gha mu emwi ne u tie roro kevbe ne u vbe gha rhie ẹre ye uyinmwẹ?

6. Vbua khian ya rhie ẹre ma wẹẹ, emwi nọ ru ekpataki ẹre Baibol na tie khin? (Vbe ya ghee efoto.)

⁶ Zẹvbe Ivbi Otu e Kristi, e Baibol na tie keghi ọkpa vbe usun “avbe emwi ni ru ekpataki sẹ,” rhunmwuda ọni, ọ ma khẹke ne ima yae rhẹghẹrẹ. (Fil 1:10) Ebe Psalm uhunmwu ẹnrẹn nokaro ghi guan kaẹn ọmwa nọ ghọghọ, ọ na kha wẹẹ: “Te uhi e Jehova yẹẹ ọre, ọ ghi gha tie ẹre, ọ ghi vbe gha muẹn roro asọn kevbe avan.” (Psm 1:​1, 2) Ọna rhie ma wẹẹ, te ọ khẹke ne ima zẹ ẹghẹ kọ ya gha tie Baibol vbenian. De ẹghẹ nọ maan sẹ na ya tie Baibol?  Dọmwadẹ ima ẹre ọ rẹn ẹghẹ nọ maan sẹ nọ ya tie Baibol. Ẹmwata nọ rrọọ ọre wẹẹ, ẹghẹ nọ maan sẹ ọre ẹghẹ ne u gha ya sẹtin gha ru ẹre vbe ẹghẹ hia. Ọtẹn nokpia ọkpa na tie ẹre Victor khare wẹẹ: “Agharhemiẹn wẹẹ, I i re ọmwa nọ hoo nọ rherhe rhiọrre vbe owiẹ, owiẹ ẹre I ye ya tie Baibol, rhunmwuda vbe ẹghẹ nii, emwi rhọkpa i rrọọ nọ mobọ rhie mwẹ ekhọe ghee ihe ọvbehe, I ghi sẹtin rhie aro tua emwi ne I tie.” Erriọ vbe ye ne uwẹ ra? Nọ egbuẹ wẹẹ, ‘De ẹghẹ nọ maan sẹ ne I gha ya sẹtin gha tie Baibol?’

MU EMWI NE U TIE RORO

7-8. De emwi nọ gha sẹtin yae gha lọghọ, ne ima miẹn ere vbe Baibol ne ima tie? Ru igiemwi yọ.

⁷ Ma sẹtin wa tie emwi nibun vbene ima i na miẹn emwi rhọkpa ruẹ vbọ. Ọ he ka sunu daa ruẹ ẹdẹ ra, u ghi wa da tie ebe fo, u ma ghi sẹtin ye emwi ne u tie re rre? Emwi vbenian wa sunu daa ima hia. Emwi vbenian sẹtin vbe sunu daa ima vbe ima ghaa tie Baibol. Ọ gha kẹ, ọ mwẹ inu ako ne ima we ima khian gha tie vbe ẹdẹgbegbe. Emwi esi wa ni khin. Ọ khẹke ne ima ru emwamwa vbenian, ma ghi vbe hia ne ima rhie owẹ lelẹe. (1 Kọr 9:26) E Baibol na tie wa maan oo, sokpan ẹ i re ọni ọkpa ẹre ọ khẹke ne ima gha ru, ọ mwẹ emwi nọ khẹke ne ima ru, ne ima mieke na gele miẹn ere vbe Baibol na tie.

⁸ Gi ima ru igiemwi ọkpa: Amẹ nọ rhọọ ke iso rre wa mwẹ iyobọ nọkhua nọ ye ne avbe emwiokọ. Sokpan deghẹ amẹ na rhọọ gbe vbe ovbi ẹghẹ kherhe, amẹ nọ rre uwu otọ ghi do bun gbe. Adeghẹ amẹ na ye gha rhọọ vbe egbe ẹghẹ vbenian, ẹ i khian zẹdẹ gha maan hiehie. Amẹ ma na rhọọ gberra egbe ẹre ọ khian na sẹtin la uwu otọ ẹse, ọ ghi vbe sẹtin ru iyobọ nọ khẹke ne avbe emwiokọ. Erriọ vbe ye, ọ ma khẹke ne ima gha ya okhirhikhirhi tie Baibol, sẹrriọ wẹẹ, ma i ghi rhie ẹghẹ ya mu emwi ne ima tie roro, ẹghẹ nii, ma i ghi ye emwi ne ima tie rre, amaiwẹ te ima khian yae ru emwi.​—Jems 1:24.

9. Vbọ khẹke ne ima ru adeghẹ ima na bẹghe ẹre wẹẹ, okhirhikhirhi ẹre ima ya tie Baibol?

⁹ Adeghẹ u na bẹghe ẹre wẹẹ, okhirhikhirhi ẹre u ya tie Baibol vbe ugbẹnso, de emwi nọ khẹke ne u ru? U ghi hia ne u fẹko gha tie ẹre.  U ghaa tie ebe ra vbe u gha tie ẹre fo nẹ, u ghi hia ne u mu emwi ne u tiere roro. Ọna i lọghọ na ru. Sokpan, adeghẹ u na gha ghee ẹre wẹẹ, ọ lọghọ ghi vbo? U sẹtin rhie ẹghẹ ba ẹghẹ ne u ka ya ruẹ emwi, ne u mieke na miẹn ẹghẹ ya gha mu emwi ne u tie roro. U sẹtin vbe tie ako nọ ma bun gbe, u ghi ya ẹghẹ nọ kẹre ya mu emwi ne u tie re roro. Ọtẹn Nokpia Victor na ka guan kaẹn sin khare wẹẹ, “I i tie ako nọ bun gbe, ọ sẹtin wa gha re uhunmwu ebe ọkpa kẹkan vbe Baibol. Rhunmwuda ne I na tie Baibol vbe owiẹ, ọ keghi ru iyobọ mẹ ya mu emwi ne I tiere roro vbene ẹdẹrriọ te fo.” Odẹ ke odẹ ne u rhirhi hoo ne u ya gha tie Baibol, gi ẹre gha re nọ gha ru iyobọ nuẹn ya gele miẹn ere vbe emwi ne u tie.​—Psm 119:97; ya ghee ẹkpẹti nọ khare wẹẹ, “ Ọta Eso Nọ Khẹke Ne U Mu Roro.”

10. De igiemwi nọ rhie ẹre ma vbene u gha ya sẹtin rhie emwi ne u tiere ye uyinmwẹ hẹ? (1 Tẹsalonaika 5:​17, 18)

¹⁰ Ẹghẹ ke ẹghẹ ne u zẹ kọ ne u ya tie Baibol kevbe inu ẹghẹ ne u loo ya tie ẹre, ọ khẹke ne u hia ne u gha rhie emwi ne u ruẹ ye uyinmwẹ. Ako ne u rhirhi gha tie vbe Baibol, u ghi nọ egbuẹ wẹẹ, ‘Vbia khian ya rhie emwi ne I tie re ye uyinmwẹ nian, ra vbe odaro?’ Gia kha wẹẹ, ebe 1 Tẹsalonaika 5:​17, 18 ẹre u tie re. (Tie ẹre.) U gha ghi tie ako eva na fo nẹ, u sẹtin muẹn roro vbene u kpẹkpẹ sẹ hẹ vbe erhunmwu, kevbe deghẹ ekhọe hia ẹre u ya na erhunmwu. U sẹtin vbe muẹn roro emwi eso ne Osanobua he ru nuẹn ne u gbọyẹmwẹ yi. U sẹtin gualọ emwi eha ne u gha hoo ne u kpọnmwẹ e Jehova yi. Ọ gha khọnrẹn wẹẹ, ovbi ẹghẹ kherhe ẹre u ya sẹtin mu Ẹmwẹ Osanobua roro vbenian, ọ gha ru iyobọ nuẹn ya gha re ọmwa nọ họn Ẹmwẹ Osanobua kevbe nọ yae ru emwi. Muẹn roro, ere ne u gha miẹn deghẹ u na gha ru emwi vbenian vbe ẹdẹgbegbe vbe u ghaa tie Baibol! U ghi do gha re ọmwa nọ gele ya Ẹmwẹ Osanobua ru emwi. Deghẹ a na miẹn wẹẹ, ọ mwẹ ako nibun nọ khẹke ne u winna yan ghi vbo?

GHẸ RU GBERRA VBENE ẸTIN RUẸ SẸ

11. De emwi nọ gha sẹtin ya egbe wọọ ruẹ vbe ugbẹnso? Ru igiemwi yọ.

¹¹ Ugbẹnso, u ghaa tie Baibol, u sẹtin bẹghe ako nibun nọ khẹke ne u winna yan, ọna sẹtin wa ya egbe wọọ ruẹ. Vbe igiemwi: Ẹrẹna u sẹtin wa tie ako nọ dekaẹn vbe na ya ya obọ ọkpa mu emwa hia hẹ. (Jems 2:​1-8) U na ghi ru afiwerriẹ eso rhunmwuda, u hoo ne u gha ya obọ esi mu emwa ọvbehe. Emwi nọ maan ẹre ọni wa khin! Ọ ghi rre ẹdẹ nọ lelẹe, u na vbe tie ako eso nọ guan kaẹn vbe nọ khẹke ne ọmwa ya gha guan hẹ. (Jems 3:​1-12) U na do bẹghe ẹre wẹẹ, ugbẹnso u i ta ẹmwẹ nọ rhie igiọdu ne ọmwa. Rhunmwuda ọni, u na ghi zẹ ọre vbe iro wẹẹ, te u khian gha ta ẹmwẹ nọ rhie igiọdu ne ọmwa. Ako ọghe Baibol ne u ghi vbe tie vbe  ẹdẹ nọ lelẹe, na vbe gha re ako nọ we ne ima ghẹ gha gu agbọn ru ọse. (Jems 4:​4-12) U na vbe bẹghe ẹre wẹẹ, ọ khẹke ne u mu ukpa mu uwerhẹn ghee emwi ughughan ne u ya sọyẹnmwẹ egbe. Ẹ i mwẹ egbe ma wọọ ruẹ vbe ẹdẹ nọ ghi lelẹe, rhunmwuda, u na do bẹghe ẹre wẹẹ, emwi wa bun nọ khẹke ne u winna yan.

12. U ghaa tie Baibol u na bẹghe ẹre wẹẹ, ako bun nọ khẹke ne u winna yan, vbọzẹ nọ ma na khẹke ne egbe wọọ ruẹ? (Vbe ya ghee futnot.)

¹² Adeghẹ u na bẹghe ẹre wẹẹ, emwi wa bun nọ khẹke ne u winna yan, ghẹ gi egbe wọọ ruẹ. Ọna rhie ẹre ma wẹẹ, u mwẹ ekhọe esi kevbe wẹẹ, ọmwa nọ mu egbe rriotọ ẹre u khin. Ọmwa nọ mu egbe rriotọ kevbe nẹi mu egbe ẹre rẹrẹ, ẹre ọ tie ako ọghe Baibol vbe odẹ nọ gha ya miẹn ako nọ khẹke nọ winna yan. a Yerre wẹẹ, na do sẹtin mu “akpa ọghe ọgbọn” yọ i re iwinna ẹdẹ ọkpa. (Kọl 3:10; yae taa study note nọ khare wẹẹ, “is being made new.”) Vbọ khian ru iyobọ nuẹn ya gha re ọmwa nọ ya Ẹmwẹ Osanobua ru emwi?

13. De odẹ nọ maan sẹ ne u gha ya sẹtin rhie emwi ne u ruẹ re ye uyinmwẹ? (Vbe ya ghee efoto.)

¹³ Ne u gha te ya gha hoo ne u rhie emwi hia ne u tie ye uyinmwẹ uhukpa, u sẹtin hia ne u ya ọkpa ra eva suẹn. (Itan 11:2) U sẹtin hia ne u gbẹn emwi eso ne u gha hoo ne u winna yan yotọ, iyeke ọni, u ghi ya ọkpa ra eva suẹn, u ghi ka sẹ enikẹre rae nẹ. De nọ khẹke ne u ya suẹn?

14. De emwi nọ khẹke ne u ya suẹn vbe u gha khian winna yan ako ne u na vburriẹ?

¹⁴ U sẹtin ya enọ ma lọghọ gbe suẹn. Ra u sẹtin ka winna yan ako ne u na gele wa vburriẹ. U gha rẹn emwi nọ khẹke ne u ru nẹ, u ghi ya avbe ebe ọghomwa ru ezanzan, u sẹtin loo e Watch Tower Publications Index ra e Research Guide for Jehovah’s Witnesses. Rinmwian  e Jehova nọ rhie “aguakpa kevbe ẹtin [nuẹn ya] zẹ emwi ru,” ne u mieke na sẹtin winna yan ako ne u hoo ne u winna yan. (Fil 2:13) Iyeke ọni, u ghi rhie emwi ne u ruẹ re ye uyinmwẹ. U gha sẹtin winna yan nokaro na nẹ, u ghi do gha mwẹ aguakpa ne u khian ya suẹn ọvbehe. Uhiẹn, adeghẹ u na sẹtin winna yan ako ọkpa ne u na vburriẹ, ẹ i khian ghi lọghọ ruẹ ne u sẹtin winna yan ọvbehe.

GI ẸMWẸ OSANOBUA GHA “WINNA VBE ẸDAGBỌN” RUẸ

15. De vbene eguọmwadia e Jehova ya lughaẹn ne emwa nibun ni tie Baibol? (1 Tẹsalonaika 2:13)

¹⁵ Emwa eso khare wẹẹ, ẹ i re avbiẹ inugba ẹre iran he tie Baibol. Sokpan, iran gele ya ẹmwẹ nọ rre Baibol yi ra? Iran rhie emwi ne iran tie ye uyinmwẹ ra, iran vbe gi ẹmwẹ nọ rre Baibol winna vbe ẹdagbọn iran ra? Nọ ya da ọmwa ọre wẹẹ, emwa nibun i zẹ owẹ lele emwi ne iran tie vbe Baibol. Te eguọmwadia e Jehova wa lughaẹn! Vbe na ghee Ivbi Otu e Kristi ni ghaa rrọọ vbe ẹghẹ ọghe avbe ukọ, te ima wa ghee Baibol “zẹvbe ẹmwẹ Osanobua nọ gele khin.” Yevbesọni, ma wa vbe hia ne ima gha rhie ẹre ma wẹẹ, Ẹmwẹ Osanobua winna vbe ẹdagbọn ima.​—Tie 1 Tẹsalonaika 2:13.

16. Vbọ khian ru iyobọ ne ima, ne ima gha ya emwi ne ima tie ru emwi?

¹⁶ Ẹ i wa mobọ khuẹrhẹ ne ima sẹtin rhie emwi ne ima tie vbe Baibol ye uyinmwẹ. Ọ sẹtin gha lọghọ ima ne ima miẹn ẹghẹ ya tie Baibol. Ra a sẹtin miẹn wẹẹ, okhirhikhirhi ẹre ima ya tie Baibol rhunmwuda ọni, ma i ghi rhie ẹghẹ ya mu emwi ne ima tie roro. Ra a sẹtin vbe miẹn wẹẹ, te egbe wa wọọ ima rhunmwuda ma bẹghe ẹre wẹẹ, ako wa bun nọ khẹke ne ima winna yan. Vbene emwi rhirhi gha ye hẹ, gha mwẹ ilẹkẹtin wẹẹ, u gha sẹtin musọe. E Jehova gha ru iyobọ nuẹn. Uwa gi ima hia vbe odẹ ke odẹ ne ima miẹn iyobọ ọghe Jehova yi, kevbe ne ima ghẹ gha re ọmwa nọ ya ehọ viọ Ẹmwẹ Osanobua kẹkan sokpan nọ yae ru emwi. Vbene ẹmwata, ma ghaa tie Ẹmwẹ Osanobua, ma na vbe gha rhie emwi ne ima ruẹ ye uyinmwẹ, ọyẹnmwẹ ọyẹnmwẹ ẹre ọ khian gha sẹ ima.​—Jems 1:25.