Ne iyẹn nọma nọ guan kan rẹn wẹẹ, emwa gha die agbọn na ya vbe etẹbitẹ, keghi re na gbẹn ye uwe Baibol. (Psalm 37:29) Ebe ne giẹrẹ 66 ẹre ọ rre uwe Baibol. Osanobua keghi loo ikpia 40 ya gbẹnnọẹn yotọ. E mozis ẹre ọ gbẹn ebe isẹn nokaro vbe odẹ ukpo 3,500 nọ gberra. Ukọ Jọn ẹre ọ gbẹn ebe nokiekie vbe odẹ ukpo 1,900 nọ gberra. De iziro ọghe ọmwa ne iran 40 gbẹnnẹ ye uwe Baibol? Osanobua keghi loo orhiọn nọhuanrẹn ọghẹe ya gu emwa ni gbẹn e Baibol guan. (2 Samuẹl 23:2) Iziro ọghe Osanobua ẹre iran gbẹnnẹ yotọ, ẹi re ọghe obọ iran. Ọni rhiema wẹẹ, obọ e Jehova ẹre Baibol ke rre.—Tie 2 Timoti 3:16; 2 Pita 1:20, 21.

Ghee vidio nọ mwẹ uhunmwuta nọ khare wẹẹ De Obọ Ọmwa Ne Baibol Ke Rre?

Ma rẹnrẹn wẹẹ, obọ Osanobua ẹre Baibol ke rre, rhunmwuda te ọ wa tae yotọ zẹẹ, emwi nibun nọ khian sunnu vbe odaro. Ọmwa nagbọn ọkpa i rrọọ nọ gha sẹtin ta egbe emwi vberriọ. (Jọsua 23:14) Osanobua ne udazi ọkpa ẹre ọ khian sẹtin bẹghe ẹre yotọ, emwi nọ khian gele sunnu dae emwa nagbọn vbe odaro.—Tie Aizaia 42:9; 46:10.

Ọ khẹke nima yarọ yọ wẹẹ, ebe nọ ke obọ Osanobua rre gha wa lughaẹn, erriọ gele wa ye. Ẹbo nibun ọghe Baibol ẹre a he ghae vbe urhuẹvbo iyisẹn nibun. Agharhemiẹn wẹẹ ebe nẹdẹ ẹre nọ, emwi ne Baibol tae keghi guaero emwi ne umẹwaẹn gualọ otọre miẹn. Deba ọni, ẹmwẹ ne iran 40 na gbẹnnẹ ma gbodan ghe egbe. * Yevbesọni, e Baibol keghi suigiẹ yọ wẹẹ, Osanobua keghi re Osa ọghe ahoẹmwọmwa, kevbe wẹẹ, ọ wa ye mwẹ ẹtin nọ ya fie emwa werriẹ, ne iran do khian ọmwa nọ rẹn enegbe. Ena hia, ẹre ọ ye emwa nibun  yayi wẹẹ, ẹmwẹ ọghe Osanobua ẹre Baibol khin.—Tie 1 Tẹsalonaika 2:13.

Ghee vidio nọ mwẹ uhunmwuta nọ khare wẹẹ De Emwi Nọ Khian Ye Ima Yayi Wẹẹ Ebe Ẹmwata Ẹre E Baibol Khin?

Emwi ne Baibol wa mobọ niania, keghi re emwamwa nọma ne Osanobua mwẹ ne emwa nagbọn. Evbagbẹn nọhuanrẹn rhan otọre vbene paradais ya wii emwa nagbọn hẹ vbe ẹghẹ omuhẹn, ọ na vbe tama ima vbene a khian ya werriegbe miẹ nẹ e paradais hẹ.—Tie Arhie Maan 21:4, 5.

Avbe uhi, ilele, kevbe ibude keghi rre uwe Baibol. Deba ọni, e Baibol keghi gbọẹn yotọ okha ọghe obọ ne Osanobua ya mu emwa nagbọn ke otọ gha de. Okha na keghi rhiẹre ma akpa ọghe Osanobua. Ọni ẹre ọ siẹre ne Baibol gha na sẹtin ru iyobọ nuẹ ya rẹn Osanobua. Ọ vbe rhan otọre vbene u khian ya gha re ọse ọghe Osanobua hẹ.—Tie Psalm 19:7, 11; Jems 2:23; 4:8.

Ebe ẹmu na gha ru iyobọ nuẹ ya rẹn ototọ e Baibol, adeghẹ u na lele igiemwi ọghe Jesu. Irẹn keghi sunnu ye ako ọghe evbagbẹn nọhuanrẹn nibun, kevbe wẹẹ, ọ vbe rhan otọre ‘evba ye ne evbagbẹn nọhuanrẹn kha.’—Tie Luk 24:27, 45.

Emwi nọ gbọmwa otiti vbe na ghe iyẹn nọma nọ ke obọ Osanobua rre i rrọọ. Ọrheyerriọ, emwa eso i mwẹ ẹkorhiẹnrhiẹnmwẹ da re, eso rrọọ nẹi kue hoo nọ ye ehọ họn ne iyẹn nọma. Ghẹ gie ọna ye egbe wọọ ruẹ. Adeghẹ u yaro yọ nu gha rrọọ vbe etẹbitẹ, ọ khẹke nu rẹn Osanobua.—Tie Jọn 17:3.