AVBE AKO ỌGHE BAIBOL NA RHAN OTỌ RE
Mak 1:15—“Arriọba Osanobua Sẹ Otọ Fo”
“Ẹghẹ wa sẹ nẹ nian, Arriọba Osanobua sẹ otọ fo! Wa zobọ vbe orukhọ ne a ru, ne uwa vbe do ya iyẹn nọ maan yi.”—Mak 1:15, E Baibol Ẹdo.
Emwi Ne Mak 1:15 Demu
Jesu Kristi tama emwa wẹẹ, Arriọba Osanobua a “sẹ otọ fo,” rhunmwuda, irẹn nọ khian gha re Ọba ọghe Arriọba nii, ghaa gu iran rre evba.
Ẹi re te Jesu ya ọna kha wẹẹ, Arriọba Osanobua suẹn gha kha nẹ vbe ẹghẹ nii. Uhiẹn, ọ gi erhuanegbe ẹre rẹn wẹẹ, ẹghẹ ne Arriọba nii khian ya rre, ye rre odaro. (Iwinna 1:6, 7) Vbọrhirhighayehẹ, ukpo ne Baibol tae yotọ wẹẹ Jesu khian ya rre zẹvbe ọmwa nọ khian gha re Ọba b ọghe Arriọba nii, ẹre Jesu wa ya rre zẹẹ. Ẹi khabe ne Jesu na sẹtin kha wẹẹ: “Ẹghẹ wa sẹ nẹ nian”—ọni ọre ẹghẹ ne irẹn khian ya suẹn gha kporhu iyẹn nọ maan ọghe nene Arriọba.—Luk 4:16-21, 43.
Ne emwa mieke na miẹn avbe afiangbe ne Arriọba nii khian mu rre, te iran gha fi werriẹ, ọni nọ wẹẹ, iran ghi zobọ vbe orukhọ ne iran te ka ru, iran ghi vbe gha ya ilele ọghe Osanobua ru emwi vbe arrọọ ọghe iran. Te emwa ni fi werriẹ rhie ẹre ma wẹẹ, iran yaeyi, iyẹn nọ maan ne iran họn vbekpae nene Arriọba nọ dee.
Emwi Ughughan Ni Ginna Mak 1:15
Te Jesu da suẹn gha kporhu vbe Galili vbe ọ ta ẹmwẹ na. Ebe Matiu 4:17 nọ vbe ta egbe ẹmwẹ nọ rre Mak 1:15, gi ima rẹn wẹẹ, “ke ẹghẹ nii kpa,” ẹre Jesu ya suẹn gha kporhu iyẹn nọ maan vbekpa Arriọba Osanobua. Arriọba Osanobua ẹre ọ wa gha re uhunmwuta ne Jesu ya gha kporhu. Uhiẹn, ọ gberra igba 100 na ya unu kaẹn nene Arriọba vbe Ebe Enẹ Ni Ta Okha Ọghe Jesu c; ne Jesu tobọre ta vbuwe igba 100 na, ẹre ọ bun sẹ. E Baibol gi ima rẹn wẹẹ, Arriọba Osanobua ẹre Jesu wa mobọ guan kaẹn.
Tie ebe Mak uhunmwu ẹnrẹn 1; zẹvbe ne u ya tie ẹre, u ghi vbe gha ghee avbe footnote, ako ọghe Baibol ọvbehe nọ dekaẹn ako ne u tie khian (cross-references), avbe efoto kevbe emapu ni rrọọ.
a Arriọba Osanobua ọre arriọba ne Osanobua mu gbọọ vbe ẹrinmwi, nọ khian ya mu iho ọghẹe sẹ vbe uhunmwu otagbọn na. (Daniẹl 2:44; Matiu 6:10) U ghaa hoo ne u rẹn sayọ vbekpa ọna, ya ghee uhunmwuta nọ khare wẹẹ, “What Is the Kingdom of God?”
b Ọkpa vbe usun ẹmwẹ akhasẹ ughughan na tae yotọ vbekpae Mẹzaia ọre wẹẹ, ọ gha rri ọba; ne ẹmwẹ akhasẹ na ya mwẹ amusẹ, te a gha ma e Jesu ọba. U ghaa hoo ne u rẹn sayọ vbekpa ẹmwẹ akhasẹ ughughan ni rre Baibol, ni so igiẹ yọ wẹẹ Jesu ọre Mẹzaia, ya ghee uhunmwuta nọ khare wẹẹ, “Do Messianic Prophecies Prove That Jesus Was the Messiah?”
c Ebe Enẹ Ni Ta Okha Ọghe Jesu ọre ebe enẹ nokaro ni rre Abọ Ọghe Baibol Na Ya E Grik Gbẹn, ne emwa mobọ rẹn ye New Testament (Ile Nẹdẹ). Ebe enẹ na, ẹre ọ wa guan kaẹn arrọọ ọghe Jesu kevbe iwinna ikporhu ọghẹe.
You May Also Like
ESSENTIAL BIBLE TEACHINGS
De Emwi Ne Arriọba Osanobua Khin?
Arriọba Osanobua ẹre Jesu wa mobọ guan kaan vbe ọ rre uhunmwu otagbọn. Ke ẹghẹ nii gha dee, te erhuaengbe ẹre wa na erhunmwu ne Arriọba na rre.
IMAMWAEMWI NI RRE UWU E BAIBOL
Avbe Emadogua Ne A Ya Ruẹ E Baibol
Tobọ ruẹ zẹ emadogua ne u khian loo ya ruẹ e Baibol, ne emwi ne u ruẹ mieke na sẹ ruẹ ekhọe kevbe nọ vbe gha sẹ ruẹ ọyẹnmwẹ.
