Mɔgɔ caman ye egilisi taali jɔ, k’a da kan u magoɲɛfɛnw ye min ye alako ta fan fɛ ani u mago bɛ dususaalo min na, u tɛ o sɔrɔ la yen. O la Jehova Seerew bɛ lajɛ minnu kɛ, mun na i ka kan ka taa olu la? I bɛ nafa jumɛn sɔrɔ o la?

Nisɔndiya, ka kɛ ni jɛɲɔgɔn ɲuman ye. San kɛmɛ fɔlɔ krecɛnw tun labɛnnen don jɛkuluw kɔnɔ, u ka lajɛw tun bɛ u dɛmɛ ka Ala bato ani k’a ka kuma kalan ani ka dusu don ɲɔgɔn kɔnɔ. (Heburuw 10:24, 25) Kanuyaba kɔnɔna na, u bɛɛ tun bɛ u janto ɲɔgɔn na, u tun bɛ u dalajɛ ni teri sɛbɛw ye, ni o ye u balimakɛw ni u balimamusow ye alako ta fan fɛ. (2 Tesalonikekaw 1:3; 3 Yuhana 14, 15) An bɛ tugu olu ka misali kɔ, o min bɛ o nisɔndiya kelen di an ma.

O bɛ an labɛn walasa ka Bibulu sariyakolow waleya. I n’a fɔ Bibulu sɛbɛn waati, cɛw ni musow ani denmisɛnninw bɛ ɲɔgɔn dalajɛ. Karamɔgɔw bɛ baara kɛ ni Bibulu ye walasa k’an dɛmɛ, an k’a dɔn cogo min na an bɛ se ka Bibulu sariyakolow waleya, an ka don o don ɲɛnamaya la. (Dutɛrɔnɔmɛ 31:12; Nehemi 8:8) Bɛɛ bɛ se k’a ka dannaya ni a ka jigiya jira, a kɛtɔ k’a sen don baaro la ani dɔnkili dali la.—Heburuw 10:23.

Dannaya kɔgɔlen sɔrɔli nisɔndiya. Ciden Paul y’a fɔ a ka waati jɛkulu kɔnɔ mɔgɔ dɔ ye ko: “Ne b’a fɛ kosɛbɛ ka aw ye, . . . an ka ɲɔgɔn jija dannaya la, aw ka dannaya ni ne ta.” (Romɛkaw 1:11, 12) K’an dalajɛ tuma bɛɛ ni Jehova Seere wɛrɛw ye, o bɛ fanga don an ka dannaya la ani o bɛ dɔ fara an ka cɛsiri kan ka ɲɛnamaya kɛ ka kɛɲɛ ni krecɛnya taabolo ye.

Mun na i tɛ na an ka jɛkulu lajɛ nata la walasa ka nafa sɔrɔ nin ko fɔlenw bɛɛ la? I bɛna kunbɛn ka ɲa. Mɔgɔw bɛ don fu, wari fana tɛ minɛ mɔgɔw la lajɛw kɔnɔna na.

• Ka kɛɲɛ ni an ka lajɛw ye, an bɛ tugu misali jumɛn de kɔ?

• Krecɛn lajɛw bɛ nafa jumɛn lase an ma?