An balima kanulenw:

Ala kanuya ani mɔgɔw kanuya min bɛ an na, o de bɛ an bila ka ‘taa siyaw bɛɛ la ka u kɛ kalandenw ye, ka u batise.’ (Matiyu 28:​19, 20; Marka 12:​28-31) Nata tɛ kanuya min na, o kanuya fanga ka bon kosɛbɛ. O kanuya sugu bɛ se ka Ala “ɲinibaaw” dusukun sɔrɔ.—Heburuw 11:6.

Waati tɛmɛnnenw na, an ye an sinsin baro kɛcogo misaliw degeli kan k’u to an hakili la ani ka gafew di mɔgɔw ma. Nka sisan, an mago b’a la ka baara kɛ walisa ka an ka baro kɛcogo ɲɛ ka ta’a fɛ. An b’a fɛ ka kanuya jira mɔgɔw la an kɛtɔ ka baro kɛ u fɛ barokunw kan minnu ka di u ye. O b’a jira ko an ka kan ka to ka an ka ɲɛfɔliw kɛ ka bɛn mɔgɔw magow ma. Mɔgɔw bɛɛ kelen-kelen kunkankow ye minnu ye ani fɛn minnu bɛ u nafa, an ka to ka jateminɛ kɛ koɲuman fana o fɛnw kan. Nin gafenin in bɛna an dɛmɛ cogo di ka o kɛ?

Kalansen 12 de bɛ nin gafenin in kɔnɔ. O kalansenw bɛ an kalan jogow la an mago b’a la ka minnu sɛnɛ an yɛrɛ la walasa ka kanuya jira mɔgɔw la ani ka u kɛ kalandenw ye. Kalansen kelen-kelen bɛɛ sinsinnen bɛ Bibulu maana dɔ kan, min kɔnɔ Yesu walima an san kɛmɛ fɔlɔ krecɛn dɔ ye jogo kɛrɛnkɛrɛnnen dɔ jira waajulibaara kɔnɔna na. An kuntilenna tɛ ka baro kɛcogo misaliw maralen to an hakili la, nka an kuntilenna ye ka cogoyaw ɲini ka an ka kanuya jira mɔgɔw la. An mago bɛ o jogow bɛɛ la an ka waajulibaara fan bɛɛ la. Nka o bɛɛ n’a ta, an bɛna a ye an mago bɛ o jogo dɔw la kɛrɛnkɛrɛnnenya la cogo min na ni an bɛ baro daminɛ mɔgɔw fɛ, ni an bɛ ka segin-ka-bɔnyew kɛ walima ni an bɛ ka Bibulukalanw ɲɛminɛ.

Ni aw bɛ ka nin kalansen o kalansen kalan waati min na, kuma kɛra jogo min kan a kɔnɔ, aw bɛ se ka o jogo waleya koɲuman cogo min na ni aw bɛ kuma mɔgɔw fɛ aw ka yɔrɔ la, a’ye aw hakili jagabɔ koɲuman o kan. Kanuya min bɛ aw la ka ɲɛsin Jehova ani mɔgɔw ma, aw k’a ɲini ka o barika bonya. Aw bɛna se ka aw ka kuntilenna dafa, o min ye ka mɔgɔw kɛ kalandenw ye. Nka fɛn min bɛna aw dɛmɛ o kɛli la ka tɛmɛn kow kɛcogo bɛɛ kan, o ye Jehova kanuya ani mɔgɔw kanuya de ye.

Bonyaba min bɛ an bolo ka baara kɛ ni aw ye ni dusu kelen ye, o ka di an ye kosɛbɛ. (Sofoni 3:9) Jehova ka duba aw ye kosɛbɛ aw kɛtɔ ka ta’a fɛ ka mɔgɔw kanu ani ka u kɛ kalandenw ye!