Tɔgɔ bɛ hadamadenw bɛɛ la. Yala a mankan tɔgɔ ka kɛ Ala fana la wa? Ka mɔgɔ tɔgɔ dɔn ani k’a wele a tɔgɔ la o nafa ka bon kosɛbɛ teriya la. Yala a mankan ka kɛ o cogo kelen na an ni Ala ka teriya la wa?

Bibulu kɔnɔ, Ala y’a fɔ ko: “Ne ye Jehova de ye, o ye ne tɔgɔ ye.” (Esayi 42:8, BS 1961) Hali k’a sɔrɔ bonyali tɔgɔ caman bɛ Ala la i n’a fɔ “Ala Sebaayabɛɛtigi”, “Matigi” ani “Dabaa Ala”, a bɛ bonya da a batobagaw kan a kɛtɔ k’a ɲini u fɛ u k’a wele a tɔgɔ la.—Jenɛse 17:1; Kɛwalew 4:24; 1 Piɛrɛ 4:19.

Ala tɔgɔ bɛ sɔrɔ Bibulu bayɛlɛmalen caman kɔnɔ Ekisode 6:3 kɔnɔ. O tɛmɛsira in kɔnɔ a fɔlen bɛ ko: “Ibrahima ni Isaka ni Yakuba ye ne dɔn ne tɔgɔ ‘Ala Sebaayabɛɛtigi’ la, nka ne ma dɔn u fɛ ne tɔgɔ ‘Yawe’ la.”

Bamanakan na Jehova de tun ye Ala tɔgɔ wele cogo ye kabini san caman. Hali k’a sɔrɔ a ka di tariku dɔnbaga caman ye k’a fɔ “Yawe”, Jehova de ye wele cogo ye min dɔnnen don kosɛbɛ. Bibulu yɔrɔ fɔlɔ sɛbɛnna Heburukan na, ni o ye kan ye kalan bɛ daminɛ min na kinin fɛ ka taa numan fɛ. O kan in na, Ala tɔgɔ jiralen bɛ ni nin dafata naani de ye יהוה. O dafata naani minnu bɛ Heburukan na, olu bɛ sɛbɛn tan cogo la—YHWH, olu bɛ wele ko Tetaragaramu.