“BIDI abui bi nto bitôtôlô, ve bôt be akôane bidi be ne tyôtyoé: ajô te, ye’elane mie bidii na, a lôm bebo bisaé be ke kôane bidi bié.” (Luc 10:2) Yésus a nga kobô mejô mete den a nto mimbu bebé 2 000. Été nsisime bôte ya Myanmar da yemete me. Amu jé bia jô nalé? Myanmar a bili bekañete 4 200, a too ke na si éte é bili bôt akui bemillion 55.

Ve Yéhôva, “Mie bidii,” a nga nambe minleme mintete mi bobejañe ya mesi mesi, a bo na be ke su’u ésaé nkañete si ya Myanmar. Jé é nga tindi bôte bete na be kôlô male map? Mam mevé me nga volô be na be kôlô si jap a ke Myanmar? Bibotan bivé ba bi? Bi tame zu yen.

Den a too bone mimbu, Kazuhiro, nkpwa’a mefane ya Japon a nga ku ésesé, a jañele fek, ane be nga kee nye nda biañ. Dokita ve jô nye na a yiane bo mimbu mibaé teke dutu metua. Jam ete e nga bo Kazuhiro mintaé nlem angôndô. A nga sili émiene na: ‘Aval avé ma ye kee ésaé nkpwa’a mefane jam ôsu éyoñe ji?’ Ane a nga ye’elane Yéhôva na a ko nye éngôngol, a volô nye na a bo teke telé ésaé nkpwa’a mefane jé.

Kazuhiro a kañete na: “Mvuse ngone jia, mvôé jam éziñe ya Myanmar é nga wô’ô na me bili njuk. Nde é nga kate ma na: ‘E Myanmar va, bôte ba dañe wulu bebus. Nge ô zuli nné, ô ne kee ésaé nkpwa’a mefane jôé ôsu, to’o ô nji bi metua!’ Nde me nga ke yene dokita wom, a sili nye nge me ne ke Myanmar akôsa bo ôkone wom. Me nga li’i anyu é yoo éyoñ a nga jô me na: ‘Dokita émien a saé ésesé Myanmar a ne Japon melu ma. Ma zu bo na mia nye mi yenan. Éyoñ éte nge ô ku ésesé wôé, a ye saé wo.’ Me nga yene mejô mete ane éyalane ya meye’elane mam.”

Été été, Kazuhiro a nga tili wofis wo tebele ésaé Myanmar kalate na, ba ngal ba kômbô ke bo bekpwa’a mefane wôé. Mvuse melu metan, bobejañe ya Béthel be nga yalane nye na: “Za’an, bia yi bekpwa’a mefan nné!” Ane be nga kuane bemetua bap, a jeñe bevisa, a ya’an avion. Den ba wô’ô mvaé ya su’u angôse mimvuvu’u ya Mandalay, tisone ya Myanmar. Kazuhiro a jô na: “E ke su’u ésaé nkañete aval ete a nga bo na bi tu’a  tabe ndi a mejô ya kalate Besam 37:5 ma: ‘Ke’e Yéhôva zene jôé; tabe’e fe nye mebun, a nnye a ye bo de.’”

Mbu 2014, étôkan é ne ngum aval é nga bobane Myanmar. Abui Bengaa ya mesi mefe e nga zu tabe étôkan éte. Monique, sita éziñe ya États-Unis a bili mimbu 34 a mbe wua y’été; a jô na: “Éyoñ me nga bulan étôkan éte, me nga ye’elane Yéhôva na a ve ma ngule ya tôé minsôñane miam miziñ. Me nga laane fe a bebiaé bam. Ane bia bese bi nga kui tyiñe na ma yiane bulane Myanmar, ve me nga taté kôme nyoñ éyoñe ya fas a ye’elane Yéhôva ôsusua na ma nyoñe ntyi’an ôte.” Amu jé?

Monique a yalane na: “Yésus a nga jô beyé’é bé na be taté ‘tabe a fase tañe ja ye yian.’ Nde me nga sili mamiene na: ‘Ye me bili fo’o abime moné da sili asu dulu éte? Ye ma ye fo’o bo ngule ya nyoñe ngab a mamien éza si ja’a me nji saé môs ôse?’” A beta jô na: “Ane me nga yemelane na me nji bi abim moné da sili na me ke nyiñe si fe.” Nsili ô ne ñhe na, jé é nga volô nye na a ke?​—Luc 14:28.

Monique a jô na: “Môs éziñ, masa wom a nga jô na a kômbô yene ma. Me nga ko woñ amu me nga buni na a zu vaa ma bisaé. Ve a nga viane veve ma akéva asu mbamba ésaé wom; a jô fe ma na, a zu bo na be dasé ma. Moné be nga ve ma a mbe fo’o ve abim e mbe e sili’i na me ya’ane bikôla biam.”

Monique a nga taté ésaé nkañete Myanmar Ngon awôm a baa ya mbu 2014. A wô’ôtan aya? A jô na: “Ma wô’ angôndô ya meva’a ya saé va. Me bili meyé’é mela. Ma yé’é a nya minga éziñ a bili mimbu 67. A wubane ma a mevak éyoñ ése a yene ma. A nga bôé ñyôn môs a nga yé’é na éyôlé Zambe é ne Yéhôva. A nga jô ma na: ‘Nté ane me nga bialé, e taté wô’ô na Zambe a ne jôé na Yéhôva ve den. Ô ne fo’o mongô a ma, ve, mam ô ye’eleya ma, ma dañ ma mese me yé’éya azukui den.’ Mili’i me nga kui ma mis éyoñ me nga wô’ô mejô mete. Mam aval ete mme ma soo bobejañ ba su’u ésaé vôme bekañete ba jemban abui mevak.” Be ndôme bañete Monique sikôlô bekañete mbamba foé ya Éjôé.

Jam afe é nga tindi bobejañ na be ke su’ ésaé Myanmar é ne na, Annuaire Bengaa be Yéhôva ya mbu 2013 a mbe a kobô’ ajô ya si éte. Li, sita éziñ a ndeme bi mimbu 30 a mbe a nyiñi’i Sud-Est ya Asie. A mbe a saé’ môs ôse, ve Annuaire ate a nga bo na a fas aval a ne ke su’u ésaé e Myanmar. A jô na: “Mbu 2014, me nga tôbane mojañ éziñ étôkan é nga boban Yangon, ba minga wé be nga ke Myanmar na ba ke su’u mekônda ya nkobô Chinois. Mbôle me mbe me yeme’e kobô Chinois, ma fe me nga tyi’i na ma ke su’u angôse ya nkobô Chinois. Bia Monique bi nga kui tyiñ, ane bi nga ke Mandalay. Yéhôva a nga volô na be nyoñ bia beye’ele; bi nji be bi ye’ele môs ôse, bi mbe fe bi too fefele nlame sikôlô. Akusa bo ayôñ a minju’u mife, ma nye’e ésaé ma bo va. Bôte ya Myanmar be se ke abui ajô, be ne fe ésemé a ba nye’e be vô’ôlô’ mbamba foé. Avale Yéhôva a su’u ésaé wôé é ne jame ya semé. Me too ndi na Yéhôva a yi na me tabe Mandalay mu.”

Abui bobejañ da su’u ésaé si fe e nga yene mfi ya meye’elan. Bi tame kobô ajô Jumpei a bili  mimbu 37, a minga wé Nao a bili mimbu 35. Be mbe akônda mimvumvu’u ya Japon. Amu jé be nga ke Myanmar? Jumpei a kañete na: “Valé bia minga wom bi jaéya kômbô ke su’u ésaé nkañete si fe. Nde môs éziñ, mojañe ya akônda dangan a nga ke tabe Myanmar. Akusa bo bi nji be bi bili abui moné, bia fe bi nga tôñe nye Ngone tane ya mbu 2010. Bobejañ ya Myanmar be nga nyoñ bia a ôsesa!” Jumpei ba Nao ba yen abôta nkañete mimvumvu’u ya Myanmar aya? Jumpei a jô na: “Abui bôt da nye’e é vô’ôlô’ bia. Bôte be ne fe’e ne vema éyoñ bia liti be bevidéo nkobô mimvumvuk. Bia wô’ô mvaé amu bi nga nyoñ ntyi’an ya zu bo Yéhôva ésaé va.”

Jumpei ba Nao ba bo aya asu na be nyiñe wôé? Jumpei a jô na: “Moné bi nga tôkan a nga volô bia tañe mimbu milal, ve bi mbe teke fe moné ya ya’ane nda asu mbu wo zu. Nde bia minga wom bi nga taté na bia ye’elan Yéhôva mban. E viane teme na môs éziñ, wofis wo tebele ésaé nkañete Myanmar ô nga lôme bia kalate na, bia zu bo bekpwa’a mefan be ne ngum aval abim éyoñ éziñ. Bi mbe bi too ndi a Yéhôva, a teke môs éziñ a nga lume bia mvus. Teke jam éziñ a nga nyume bia.” Jumpei ba Nao fe, be ndeme kui sikôlô bekañete mbamba foé ya Éjôé.

Jé é nga bo na mojañ Simon, môte ya Italie a bili mimbu 43 ba minga wé sita Anne, ngone ya Nouvelle Zélande, a bili mimbu 37 be ke tabe Myanmar? Anne a jô na: “Annuaire ya mbu 2013 a mbe a kobô’ ajô ya Myanmar.” Simon ki a jô na: “Bia wô’ô mvaé ya saé Myanmar va. Ényiñ é ne tene tyi’ibi mu, nalé a ve ma fane ya telé ésaé Yéhôva ôsu. Angôndô ya mbamba jam éyoñ wo wô’ôtan aval Yéhôva a nyoñ ngab a bia éyoñ bia ke su’u ésaé nkañete si fe.” (Bs. 121:5) Anne a jô na: “Ma wô’ô angônda mvaé. Bia jeñe ki abui mam ényiñ. Bia nnôme wom bia lôt abui éyoñe nsamba, a nalé a bo na élate jangan é bo ngul. Bi bili fe mimfefé bemvôé. Bôte be nji vini Bengaa be Yéhôva va, a nkañete wongan wo wum mbamba bibuma.” Bibuma bivé?

Anne a kañete na: “Môs éziñ me nga kañete mona minga makit, ane bi nga kôme na bia ye beta laan môs ôfe. Éyoñ me nga ke jome nye, me nga koone na a nga bañete fe mvôé jé. Môs ôvok a nga bañete bemvôé bé benyin. Mvuse ya valé a nga beta bañete bemvôé bé betan. Den ma yé’é Bible a bemvôé bé betane bete.” Simon a jô na: “Bôte ya vôm ate be ne ôsesa a ba sili abui minsili. Abui ya be be da vô’ôlô bia. Jôme ja jembane bia é ne ve éyoñ.”

 Mam mevé bobejañ be nga taté bo ôsusua na ba nyoñ ntyi’ane ya ke Myanmar? Mizuho a so Japon a kañete na: “Bia minga wom Sachio bi jaéya yi na bia ke saé vôm bekañete ba jemban, ve nne bi bem asu vé? Annuaire ya mbu 2013 a nga nambe bia abui, minlañ bobejañ ba kañete été mi nga bo na bi fas avale biabebien bi ne ke su’u ésaé nkañete Myanmar.” Sachio a beta jô na: “Bi nga tyi’i na bia ke lôte sondô jia Yangon, capitale ya Myanmar, asu na bi yen nge bi ne ke su’u ésaé nkañete wôé. Ane bi nga tyi’i na bia ke.”

Rodney ba ngal Jane, ba so Australie, be bili mimbu bebé 50, be nga ke Myanmar mbu 2010 a bone bap bebaé: Jordan ba Danica. Rodney a jô na: “Bôte be mbe be wô’ô évé ya wô’ô Mejô me Zambe, a jam ete é nga nambe bia abui. Ma lebe menda me bôte mefe na, me jeñe na me ke su’u ésaé nkañete avale vôm ete.” Amu jé? “Mboon ôte ô nga volô nda bôte jam angôndô ya abui. Nté abui bisoé da fase ve ajô betéléfôn, ajô bemetua, ajô mesu bisaé, akeke, bone bangan be ba yé’é mimfefé bifia be ne belane mie nkañete. Ba yé’é fe aval be ne laan a bôte be nji dañe yem Kalate Zambe, a aval be ne ve biyalan ésulan, be bili fe abui mame ya bo akônda.”

Oliver a bili mimbu 37, a so États-Unis, a kate bia amu jé a yi na môt ase a ve’ele fatan nkañete éte; a jô na: “E ke bo ésaé nkañete si fe a soo abui bibotan. Nalé a nga volô ma na me tu’a futi ndi nleme jam be Yéhôva, a na me tabe nye mebun éyoñ ése. E saé fufulu a bobejañe ya si fe a nga bo na me tu’a wô’ô na Éjôé Yéhôva é ne mfi abui adañe mam mese ya émo ji.” Den, Olivier ba minga wé Anne, ba ke ôsu a su’u ésaé akônda ya nkobô Chinois a ayôñ ése.

Trazel, sita ya Australie a bili mimbu 52, a nga ke su’u ésaé nkañete Myanmar mbu 2004. A jô na: “Ma jô môt ase a ne ngule ya bo de na a ke su’u ésaé nkañete vôme bekañete mbamba foé ba jemban. Mfa’a wom, ma yene na, éyoñ môt a bili nkômbane ya tôé minsôñane miziñ, Yéhôva a botane nju’u ôse a wu na a bo de. Me nji ve’ele simesane môs éziñe na me ne bi aval ényiñe di. Teke fatan ényiñ éfe ja soo mevak ane jili.”

Ngo’o nge minkañete mi bobejañe ba, mia tindi wo na, ô fas aval avé wo fe ô ne ke su’u ésaé nkañete vôm éziñ! Yaa, bobejañe bete ba jô wo na: “Za’a nja’a Myanmar, ô zu volô bia!”