Da sili bia abui Meba m’Éjôé asu bôte mintete betoyini ba dubane mbu ôse. Ajô te, bobejañe ya Wofise wo wulu ésaé melôñ ja bobane si se, be nga ta’a na meba m’Éjôé a lôte 2700 ma yiane lôñeban nge ke kômban mbu 2020. *

 Ve nsôñan ôte ô nji tôéban étome COVID-19. Wofise ya Tin ékôan wo wulu nkulane bekalate ô nga jô bobejañ a besita na be taté telé ésaé melôñ; amu jé? Amu ba kame binyiñe bi bobejañe bete, a amu ba semé metiñe me ngovina. Ve to’o nalé, ôkon ôte ô nga zu koone na bobebejañe be lôñeya a kôme meba m’Éjôé a lôte 1 700. Ane ô vaa nalé, be nga lôñe fe beta Bebéthel 100 a mvuk. Bi tame zu yen aval ésaé éte é nga volô bobejañ.

 Béthel ya Cameroun. Béthel ôsusua a mbe aka’a tyôtyoé. Wofise wo wulu nkulane bekalate ô nga taté fase na be ne nene Béthel ate, ve moné a mbe a sili’i a mbe abui adañ abim be mbe ve kuane nye. Ane be nga simesane na be ne kuse si a lôñ été, nge ke kuse menda a kôme me na me bo Béthel, ve fe’e éte é nga bo fe momo.

 Ane foé é nga kui môs éziñe na ngovina a kômbô kôme njoñe quartier éziñe ya Awolo, vôme bia bo bitôkan a beta bitôkan. Njoñ ôte ô nga ye bo na bôt a bemetua be kui Béthel tyi’ibi, ndemben ésaé é bobane fe tyi’ibi. Jame ki é mbe é sili’ asu Béthel ya Cameroun le. Ane Tin ékôan é nga kañese na be lôñe Béthel abôta si be nga kus asu Aba ba bo bitôkan.

 Bengaa be nga saé a beta belôñe menda, a nalé a nga bo na bi bo te jañele abui moné. Bi nji belane belan abime moné bi mbe bi buni’i, bi nga kui na bi ba’ale bedollar a lôte million ébaé! Bobejañe ya Béthel ya Cameroun be nga bi ma’a na, a ba nyiin mfefé Béthel, a COVID-19 a taté.

 Bebéthélite ya cameroun mbe ñhe ba bi mbamba vôme ya kañe Yéhôva ba! Be nga yene jam ete ane dase da so yôp. Mojañ éziñ ba ngal ba jô na: “Bia kômbô tu’a dañe beta saé amu bi nji kômbô bi das ete éngbwemese.”

 Nda ba kôñelane bekalate nkobô Tojolabal (RTO), e Mexico. Bobejañe ba kôñelane bekalate nkobô Tojolabal be nga bo mimbu mimbu Béthel ya Amérique centrale, fefele tisone ya Mexico. Ve ba dañe kobô Tojolabal Altamirano a e Las Margaritas. Kiliméta bebé 1000 é ne zañe Béthel a bitison bite! Bia yeme ki na ane mimbu mia lôt, nne fe nkobô wo tyendé nalé, nde e mbe e sili’i na bobejañe ba kôñelane bekalate be saé vôm ba kobô nkobô wop. Ane ô vaa nalé, e nji be tyi’ibi na bobejañe ya Béthel be yene bobejañe be ne volô ésaé nkôñelane bekalate, a ve metyiñe map asu bevidéo a b’audio.

 Ane Wofise ya Tin ékôan wo wulu nkulane bekalate ô nga fas aval avé bobejañe be ne ke saé vôme ba kobô nkobô wop. Nde Béthel a nga tyi’i na ba zu kuse nda a veñesane je vôme ba kôñelane bekalate. Ntyi’an ôte ô nga volô na be ba’ale abui moné.

 Mojañ éziñ a jô na: “Me nga saé ane nkôñelane bekalate Béthel mimbu awôm, ve teke môs éziñe me nga tôbane nda bôte jia jia ja kobô nkobô wom. Den bia kôñelane bekalate vôm ébiene ba kobô Tojolabal. Ma laan éyoñe ji a bôte ba kobô nkobô wom môs ôse. Jam ete da volô na me tu’a yeme kobô wô, a na ésaé jam é tu’a bo abeñ.”

 Nge mam mese me wulu ane bia yi, mbu 2021 bia kômbô lôñ a kôme menda ba kôñelane bekalate a bevôme ba bo besikôlô ya Éjôé 75. Bia kômbô fe lôñe beta Bebéthel mwom; nta’ane mam ôte wo fombô fe mfefé Wofise bia kômbô lôñe Ramapo, e New York, a mfefé Béthel ya Argentine a Italie. Bia kômbô fe lôñe mimfefé meba m’Éjôé a lôte 1000, da sili fe na be tyendé bevôm bobejañe béziñ ba bo bisulan a lôte 6000, amu be ne aka’a abé, wônaa bia yiane fe kôme meba m’Éjôé mefe 4000.

 Nne bia nyoñe moné vé asu na bi bo bisaé bite bise? Mojañ Lázaro González ya Wofise ya Béthel ya Amérique du sud, a nga yalane nsili ôte éyoñe be fase’ ajô mfefé nda ba kôñelane bekalate asu nkobô Tojolabal. A nga jô na: “Béthel wongan a nji bi abui moné. Nge bobejañe ya mesi mefe be nji ye volô, bi nji ye bo ngule ya lôñe bobejañe ya minlam miangan nda ba kôñelane bekalate. Moné bobejañe ya si se be nga lôme bia nnye a nga volô na bekôñelane bekalate be bo ngule ya ke saé vôme ba kobô nkobô wop. Bia ve nda bôte jangane ya nsisim angôndô ya abui akiba.” A bobejañ, mimveane mienan mmie mia volô na bisaé bite bise bi boban, a abui ya be mia da bo mie a zene ya donate.pr2711.com.