Bengaa be Yéhôva be ne te ke bita amu mam ma:

1. Bia bo Zambe mewôk. Kalate Zambe a jô na bebo b’ésaé be Zambe “b’aye bibi minkpwaté mekône miap a lui mie” a “b’aye bo te beta yé’é mewosan.”—Ésaïe 2:4.

2. Bia bo Yésus mewôk. Yésus a nga jô Pierre na “somô’ nkpwaté mekône wôé abam: amu bôte bese be abi nkpwaté mekôn be aye wu a nkpwaté mekôn.” (Matthieu 26:52) Yésus a nga liti na beyé’é bé b’aye bo te balane mengal bita.

   Beyé’é be Yésus ba ba’ale atiñe d’ajô be na be “nji bo bôte ya si nyô”. Nalé a tinane na be nji tebe ngame éziñe ya bôte b’asuñe éjôé ya si nyô. (Jean 17:16) Beyé’é be Yésus ba ndeñele ke bezimbi éyoñe be tyi’iya na ba bo bita. Nge kamane bôte ba tyi’i na ba nyiine bezimba.

3. Nye’ane bôte bevok. Yésus a nga jô beyé’é bé na be “nye’esan.” (Jean 13:34, 35) Bese ba yiane bo jôme jia. Be wô’ane mintaé aval é ne na, kal ba ndôme be teke wosan.—1 Jean 3:10-12.

4. Éve’ela bekristene ya melu mvus. Kalate ba loene na Encyclopédie de la religion et de la guerre (angl.) a jô na : “Beyé’é be Yésus ya ntete mimbu ôsusua be nga bene bo bita a be nga bene fe nyiine e bezimba,” be mbe be yeme na mboane bita a nyiane bezimba “wo lu’ane ke a nye’ane Yésus a nga nye’e bia, a atiñe a nga ve bia na, bi nye’e to’o ba b’asiñe bia”. Avale te fe, Pete Meinhold, Théologien Allemand a nga kobô a jô ya beyé’é Yésus ya ntete mimbu ôsusua na: “Môte a mbe ke bo kristen a too fe mone bezimba.”

Bengaa be Yéhôva be ne mbamba be bôte vôm be too. Be nji bo ézezam vôm be né. Ba semene metiñ a éjôé avale kalate Zambe a jô na:

• “Môt ase a bo’o ba be tele ôsu mewôk.”—Beromain 13:1.

• “Va’ane César biôm bi César, a Zambe biôm bi Zambe”—Matthieu 22:21.

Ajô te bia, bia tôñe metiñe, bia ya’ane toya, bia ve fe ngule na bôte bese be nyiñe mvo’é.