Mbôle Bengaa be Yéhôva ba nye’e Zambe a bôte bevok, jôm éte nje be ne meva’a ya kate be foé ya Kalate Zambe, to’o bôte be nga yalane be éyoñ ôsu na, “Me nji kômbô vô’ôlô mia.” (Matthieu 22:37-​39) Mbôle bia nye’e Zambe, jôm éte nje bia bo Mone wé mewôk éyoñ a jô bia na, bi “kañete bôt.” (Mam minlôman 10:42; 1 Jean 5:3) Asu na bi tôñ abendé éte, bia ke jome bôt abui biyoñ, avale bekuli mejô be Zambe ya melu mvus be mbe be bo’o. (Jérémie 25:4) Mbôle bia nye’e bôte bevok, bia ve ngule ya kate bôte bese ‘Mbamba foé ya Éjôé Zambe,’ to’o ba be nga taté bene vô’ôlô bia.​—Matthieu 24:14.

Bi nga yene fe na, e ne mfi ya beta ke menda me bôte be nga taté bene vô’ôlô bia. Beamu bela ba tindi bia na bi bo de mbe ba:

• Bôte be ne tyendé nda.

• Bôte befe ya nda éte be ne liti na ba nye’e Mejô me Zambe.

• Bôte ba tyendé. Mam ma kui émo, a minju’u bôt ba tôbane mie me ne bo na môt a su’ulane yeme na a ne ‘azoé nsisim,’ a na a kômbô yeme Zambe. (Matthieu 5:3) Aval ane nlômane Paul, to’o bôte ba wosane bia be ne tyendé.​—1 Timothée 1:​13.

To’o nalé, bia yemete ke bôte na be vô’ôlô bia. (1 Pierre 3:​15) Bia yeme na môt ase a yiane tyik vôm a kômbô kañe Zambe.​—Deutéronome 30:19, 20.